1 Miye Paolo, hamwe na Silivano na Timoseo.

Tawaandikia bauwa inu nywie zumwezumwe da wantu wamzumiiayo Klistu da Wasesalonike mumzumiiyao Klistu ambao muwa hamwe na Muungu Tate na Zumbe yetu Yesu Klistu.

Tawaombea wedi na uivanisi uwe nanywi.

2 Tamtogoa Muungu misi yose kwaajii yenu nywie wose na kuwavika misi wose he miviko yetu. 3 Kwaviya kiya timvikiaho Muungu Tati yetu, tawakumbuka kwa yose mwekuyagosoayo kwaajii ya kuzumiiya kwenu, viivihi ukundiso wenu uwadahizavyo kugosoa ndima kwa kufundana na via mwekuwavyo watintimavu kwaajii ya kauwio denu mwe Zumbe yetu Yesu Klistu. 4 Wandugu zetu, tamanya kuwa Muungu awakundisa na kwaviya kawasagua muwe wantu wakwe. 5 Kwaviya kisingi tawabiikia ida Mbui Yedi khayekuwa mbui yebue, nee ni kwa udaho na kwa Muye wa Muungu, tikawa twazumiia kuwa mbui iyo iwa ni yakwei. Mwamanya tekuwavyo tekaa hako Makedonia na Akaya. 6 Nywie mubasa msimo wetu na msimo wa Zumbe, kwaviya etiho msumiizwa muno, muhokea mbui ya Muungu kwa nyemi ilawayo kwa Muye wa Muungu. 7 Kwa sia inu muonyesha msimo mtana kwa wazumiiyao wose wa Makedonia na Akaya. 8 Kwaviya, kulawa kwenu mbui ya Zumbe iyambazika khiyo ukodu Makedonia na Akaya, iya uzumizi wenu kwa Muungu umanyika hose. Vituhu khatina cha kugombeka. 9 Wantu awo wose watamwiia ni viivihi mwekutuhokeavyo kisingi tekuwavuiaho. Na via mwekubadavyo vizuu na kumhitukia Muungu ekuwaye mgima na wa kwei, 10 na isasa mwamgoja Mwanawe asee kulawa uwanga kwa Muungu yaani Yesu, ambae Muungu kamyuyusa kulawa mwe wekuuyao na nyuma na ambae atiohowa kulawa mwe maya ya Muungu yezayo.