1 Kisiikizi nee khatidaha kuzizimiza vituhu. Ivyo nee tiona vyedi kusigaa kuda Asene swiswi ikedu, 2 na kumuagiiya kwenu ndugu yetu Timoseo, ambae ni mgosoa ndima mwezwetu kwaajii ya Muungu mwe kubiikia Mbui Yedi ya Klistu. Nee timuagiiya awatintimaze na kuwagea moyo mwe uzumizi wenu, 3 ili mntu yoyose gatigati yenu asekufa maya na mageezo aya, kwaajii nywie wenye mwamanya kuwa itikunda kusuumizwa ivi kwaviya Muungu mwenye kakunda mbui izi zitipate. 4 Kwa kwei kisingi tekuwaho hamwe nanywi, netiwa tikawamba kuwa tendatisuumizwe na inga mmanyavyo, nee ivyo iwalawiavyo. 5 Nshekudaha kuzizimiza muno, nee mana khimuagiiya Timoseo kwenu ili amanye mbui za uzumizi wenu. Isekweza ikawa yuda msongeezi kawageeza na ndima yose tekugosoayo gatigati yenu ikaga bue.

6 Isasa Timoseo kauya kae, nae katekha mbui za nyemi za uzumizi na ukundiso wenu. Naho katigombeka kuwa mwatikumbuka misi yose, na mna hovu ya kutiona swie inga naswi teivyo na hovu ya kuwaona. 7 Ivyo ndugu zetu mbui tekutegeezazo kulawa kwa Timoseo za uzumizi wenu zitekha moyo etiho timwe suuba na masumiizo, 8 kwaviya isasa tekaa kwa nyemi kwaviya nywie mgooka kwa utintimavu mwe Zumbe. 9 Isasa tadaha kumtogoa Muungu muno kwaajii ya nyemi tekuwayo nayo hemeso ya Muungu kwaajii yenu. 10 Tatendesa kumvikia Muungu kio na musi kwa moyo wose ili tidahe kuonana vituhu na kuwahinya yada yakundigwayo mwe uzumizi wenu.

11 Tamuombeza Muungu, Tati yetu mwenye, na Zumbe yetu Yesu atijaie kweza kwenu. 12 Zumbe awaambize nywie kutendesa kukundisana na kuwakundisa wantu wose, inga via swie tiwakundisavyo nywie. 13 Ivyo endaaitintimaze mioyo yenu, nanywi mwendamuwe wesao kuwa na mavigaviga na wantu wekuikwao kwaajii ya ndima yakwe hemeso ya Muungu Tati yetu, kisingi Zumbe yetu Yesu endahoeze hamwe na wose wekuwao wakwe.