1 Viyaviya wandugu zangu mwehina kuawa mwetu, ivyo mwakundigwa kwekaa na kumtamiza Muungu. Na kwei mwekaa ivyo. Isasa tawaombeza na kuwahembeza kwa zina da Zumbe Yesu naho mgosoe vitana muno. 2 Kwaviya mwamanya ida miagiiyo tikumyekhayo kwa udaho wa Zumbe Yesu. 3 Mana aya nee yamtamizayo Muungu akunda muwe wantu wedi hemeso yakwe na mwekae hae na ugoni. 4 Kiya yumwe gatigati yenu ehinye kuukauwa mwii wake mwenye kuuwika vyedi na kwa ntunyo. 5 Iya khio kwa khwiina ya ufyaimi, inga wantu wesao kummanya Muungu 6 Mntu asekumkonya nduguye wala kumbanangia mwe mbui inu, kwaajii Zumbe nee aihizae mfundo cha aya yose inga tekuwagombekavyo aho bosi, tikabiikia muno. 7 Muungu khekutetanga tekae wekazi wa ugoni iya tekae kwa kumkundisa yee. 8 Kwaivyo, mntu yoyose aemeaye mahinyo aya khamuemea mntu iya amuemea Muungu awekhae nywinywi Muye wa Muungu.

9 Kuusu ukundiso wa ndugu khamna haja niwaandikie, kwamana nywie wenye mhinywa ni Muungu kukundisana. 10 Kwaviya mwagosoa mbui inu mwe Makedonia yose. Akini tawahembeza wandugu muendee muno kukundisana. 11 Mtendese kwekaa kwa utwiivu, kiya mntu agosoe mbui zakwe mwenye na kugosoa ndima kwa mikono yakwe, inga via tekuwaagiavyo, 12 ivyo mwendamwepatie ntunyo ntana kwa wada wesao kuwa wazumizi Waklistu na khamna muwe na lazima ya kuwakauwa watuhu mwe wekazi wenu.

13 Wandugu, takunda mmanye ukwei wa wada wekuuyao kae na nyuma, ili mwesekweza mkagea huzuni inga wantu watuhu wesao kuwa na makauwiyo. 14 Kwaviya tazumiiya kuwa Yesu nekauya na nyuma na akayuyuka, ata ivyo swie twazumiia kuwa Muungu endaawaete hamwe na Yesu wada wekuuyao kae na nyuma uku wakawa wamzumiiya Yesu.

15 Inu tiwambiayo ni hinyo da Zumbe, kuwa swie tekuwao wagima, ambao tendatiwe tisigaa kisingi Zumbe endahoeze haika khatina tiwaongoee wada wekuuyao kae na nyuma kumuona Zumbe. 16 Kwamana Zumbe Yesu mwenye endaaseee kulawa uwanga kwa Muungu nakulavya mwiko kwa mgutio mkuu hamwe na mgutio wa mndima mkuu wa uwanga kwa Muungu na mgutio wa gunda da Muungu na wowo wada wekuuyao na nyuma wakawa wamzumiiya Klistu wendawawe wa bosi kuyuyuswa. 17 Naho swie tekuwao wagima, tekusigaao tendatidoigwe hamwe nao wowo mwe mazunde na kumhokea Zumbe uwanga na ivyo tendatiwe hamwe na Zumbe kae na kae. 18 Isasa geaneni moyo kwa mbui izi.