1 Wandugu zangu khatikunda kuwaandikia kuusu kisingi na misimo ya mbui izi zendahozilawiiye. 2 Kwaviya nywie wenye mwamanya kwa kwei msi wa kuuya kwa Zumbe wendaweze inga mbavi ezavyo na kio. 3 Wantu wagombekaho kutwiia na nikwedi, neaho ubanasi uwezeaho vuu puu, inga via usungu umwezeaho vuu puu mvyee mwenye ifu kisingi akundaho kwefungua wala haika khawana wainyiike. 4 Iya nywie wandugu khammo mwe kiza, hata msi uda khaukundigwa uwezee vuu puu inga via ezavyo mbavi. 5 Kwaviya nywie nyose muwa wana wa ung'azi na wana wa musi swie khi wa kio wala wa kiza. 6 Iya tisekugona usisiza inga watuhu, takundigwa kucheeza na kuwa tayali na kuidaha mioyo yetu. 7 Wantu wagonao wagona na kio na wakolwao, wakolwa na kio. 8 Akini swie ni wantu wa musi takundigwa kweika tayali kwa kuvaa uzumizi na ukundiso inga vazi da chuma da khondo da kwekinga kifua na kauwio detu da uohozi dituinde inga khofia da chuma da khondo. 9 Kwaviya Muungu khekutisagua ili kudagamizwe kwa maya yakwe iya tiupate uohozi kwembokea kwa Zumbe yetu Yesu Klistu, 10 yee kauya na nyuma kwaajii yetu, ili tekae hamwe nae iwe tiwagima hambu tifa kae. 11 Ivyo geaneni moyo na kuambizana nywie kwa nywie inga mgosoavyo isasa.

12 Isasa tawaombeza wandugu, watunyeni wada wagosoao ndima gatigati yenu, wada wawagookeao na kuwahinya kwekaa inga wantu wamzumiiyao Klistu. 13 Watunyeni muno na kuwakundisa kwaajii ya ndima wagosoayo. Mwekae kwa uivanisi gatigati yenu.

14 Wandugu tawaagiiya muwahaze wada wabwa, muwagee moyo wantu wekufao maya, muwaambize wada wesao kuwa na udaho na zizimizani na wantu wose. 15 Kauwani mntu asekumwihiza mweziwe fyaimi kwa fyaimi, iya mamakhanyi zenu ziwe kugosoeana yedi misi yose na kuwagosoea yekuwayo yedi wantu wose.

16 Kuwani na nyemi misi yose, 17 mvikeni Muungu naho msekusokea, 18 mtogoeni Muungu kwa kiya mbui, kwaviya aya nee ukundiso wa Muungu kwaajii yenu mwe Yesu Klistu.

19 Mwesekumkindia Muye wa Muungu, 20 msekubea uwoni wa Muungu, 21 akini sungumanyeni mbui zose. Gosoani yekuwayo yedi, 22 ekaeni hae na makwasukwasu yose.

23 Muungu mwenye atekhae uivanisi wasunte kwa sia zose na kuiinda muye zenu na mioyo yenu na mii yenu hae na masa yoyose kisingi cha kweza kwakwe Zumbe yetu Yesu Klistu. 24 Yee mwekuwetanga nywie endaagosoe kwaviya yee ni yedi.

25 Wandugu tiombeeni na swie.

26 Wauguseni wandugu wose kwa uugusi wa ukundiso.

27 Nawaagiiya kwa zina da Zumbe muwasomee ndugu wose bauwa inu.

28 Wedi wa Zumbe yetu Yesu Klistu uwe hamwe nanywi.