1 Wandugu zetu, nywinywi wenye mwamanya kuwa ntambo yetu ya kweza kwenu nee iwa khio bue. 2 Kwaviya mwamanya ni viivihi tekusuumizwavyo na kudumulwa uko Filipi kisingi khatizati kubua kwenu Sesalonike, akini ata ivyo kwa uwambizi wa Muungu yetu, netiwa na utintimavu wa kuwabiikia Mbui Yedi etiho ni kwa uhigani mkuu muno. 3 Mbui tiisigiiayo kwenu khailawana na unyanyi wala nia ya ufyaimi, wala khatikunda kumtiiya mntu yoyose. 4 Akini swiswi tagombeka misi yose inga Muungu akundavyo kwaani yee nee kationa kuwa tafaa, akatekha ndima inu ya kuwabiikia Mbui Yedi. Khiyo tikundavyo kuwatamiza wantu, iya takunda kumtamiza Muungu ambae amanya mioyo yetu adi ndani. 5 Kwaviya inga mmanyavyo, swie khatokutumia mbui ya kuwahembeeza naho mbui za unyanyi za kufisa kintu na Muungu nee mgombekaji wetu. 6 Khatikuondeza ntunyo kulawa kwa wantu, wala kulawa kwenu, wala kulawa kwa mntu yoyose, 7 hamwe na kuwa swiswi ni wagiiwa wa Klistu, nee tidaha kuombeza mbui yoyose kwenu. Akini netiwa wahuhusi gatigati yenu inga mmaa awakauwavyo wanawe. 8 Nee tiwakundisa nywinywi muno adi tikawa na nyemi kuwa hamwe naywi, khiyo kwa Mbui Yedi ya Muungu du, naho hata kwekaa kwetu, kwaajii nemuwa wantu wedi muno kwetu. 9 Wandugu zetu, mwakumbuka ndima tekugosoazo kwa masuumizo. Nee tagosoa ndima kio na musi, ili tesekuwa wegazi kwa mntu yoyose wa kwenu kisingi tekuwaho tawabiikia Mbui Yedi ya Muungu.

10 Nywinywi wenye muona na viavia Muungu kaona mwadaha kutamwiiza kuusu swiswi kuwa tigosoa yada ambayo Muungu ayakunda na kugosoa yada yekuwayo yedi tekuwaho gatigati yenu na wala khahana mntu gatigati yenu adahae kutilaumu. 11 Mwamanya kuwa timgosweeya yedi kiya yumwe yenu inga via tate awagosweeavyo wanawe mwenye. Nee tawagombeka msekufa maya, nee tawekha nyemi na kuwashuutiza, 12 Nee tawashuutiza msekufa maya, tukawahinya na kuwahaza ili mpate kwekaa wekazi wa kumkundisa Muungu awetangae muwe hantu ha useuta wakwe na ukuu wakwe.

13 Tinayo mbui ntuhu ya kumtogoa Muungu. Tekuwaeteaho Mbui ya Muungu, nywinywi nemuwa hamwe, mkautegeeza, na kuuhokea, khiyo inga via mbui ya mntu, iya inga Mbui ya Muungu, na kwei nee vyeivyo. Kwaviya Muungu agosoa ndima ndani yenu nywie mzumiiao. 14 Wandugu nywinywi nee mpatwa na mbui idaida yekuwapatayo zumwezumwe da Muungu wekumzumiiyao Klistu, uko mwe mzi wa Yudea, ambao ni wa Klistu Yesu. Nywinywi nee msuumizwa na wantu wenu wenye inga viya wayahudi wa Yudea wekusuumizwao na Wayahudi wezwao, 15 ambao wamkoma Zumbe Yesu na waoni wa Muungu, nee watisuumiza na swiswi. Wantu awo nee wamsukiza Muungu, naho ni wamasa wa kiya mntu, 16 kwaajii wageeza kutikindia kuwabiikia wantu wesao kuwa Wayahudi mbui yendayoiwaetee kuwaohowa. Nee ivyo wekuiganyavyo ntaazia ya mavigaviga yose wekugosoao misi yose. Akini isasa maya ya Muungu iwezee.

17 Wandugu, kubadana kwetu na nywie nekuwa kwa kisingi du, naho kubadana uko nekuwa kwa mwii du na khiyo kwa muye. Kisingi kwemboka, nee tatozwa na hovu muno ya kuwavuiya vituhu. 18 Naho nee tikakunda kuwavuiya vituhu. Mie Paolo nee nikageeza kweza kwenu maa nyingi, akini ibiisi akatikindia. 19 Tendaho tigooke hemeso ya Zumbe Yesu kisingi endahoeze, kwaajii ya kwevunia kwetu yendaiwe mbwai? Yendaiwe ni ninywi wenye, kwa kwei ninywi nee kauwio detu na nyemi yetu. 20 Kwa kwei nywinywi ni ukuu wetu na nyemi yetu!.