1 Miye Paolo hamwe na Silivano na Timoseo.

Tawaandikia bauwa inu zumwezumwe da wantu wamzumiiyao Klistu da Sesalonike wekuwao hamwe na Muungu tati yetu na Zumbe Yesu Klistu.

2 Tawaombea wedi na uivanisi gatigati yenu kulawa kwa Muungu Tate yetu na kwa Zumbe yetu Yesu Klistu.

3 Wandugu zetu, takundigwa kumtogoa Muungu misi yose kwaajii yenu. Yakundigwa kutenda ivyo kwaajii kuzumiiya kwenu kwagenyea muno na kukundisana kwenu kwagenyea muno. 4 Nee mana swie tevunia nywie mwe mazumwezumwe ya wantu wamzumiiyao Klistu ya Muungu kwaajii ya kuzizimiza na kuzumiiya kwenu kwembokea suuba na masuumizo mpatayo.

5 Ayo yose ni utangio kuwa uwamwiio wa Muungu ni wakwei, na kwaajii iyo nywie mwendamuoneke kuwa mwafaa mwe Useuta wa Muungu, ambao nywie mwasuumizwa kwaajii ya uwo. 6 Muungu endaagosoe mbui ya kwei na endaawaihe masuumizo wada wawasuumizao nywie, 7 na endaawatende nywie msuumikao mhumwiize hamwe na swie. Endaagosoe mbui iyo kisingi Zumbe Yesu endahoeze kulawa uko uwanga kwa Muungu hamwe na wandima wa uko uwanga wa Muungu wenye udaho, 8 na miale ya moto, kuwekha sugusa wada wamuemeao Muungu na wada wesaokutegeeza Mbui Yedi ya Zumbe yetu Yesu. 9 Sugusa yao yendaiwe kudagamizwa misi yose kwesiho kisiikizi na kuikwa hae na Zumbe na ukuu wakwe wenye udaho, 10 msi uda endahoeze kuhokea Ukuu kulawa kwa wantu wakwe na ntunyo kulawa kwa wantu wose wazumiiyao. Viyaviya nywie mwendamuwe gatigati yao, kwaviya mzumiiya ida mbui tekuwagombekayo.

11 Nee mana tawaombea nywie misi yose. Tamuomba Muungu yetu awatende ninywi mkundigwao kwekaisa inga ekuwetangavyo kwekaisa, awadahize kuiganiza kwa udaho wakwe yada yose yedi mkundayo na kuiganiza ndima zose za uzumizi. 12 Tavika ivi ili zina da Zumbe yetu Yesu dipate ukuu kulawa kwenu, na nywie mwendampate ukuu kulawa kwakwe kwa wedi wa Muungu yetu na Zumbe yetu Yesu Klistu.