1 Isasa Wandugu zetu, tivike ili mbui ya Zumbe idahe kuendeea kwa kuambazika kinyio na kuhokewa kwa kutunywa inga via weivyo gatigati yenu. 2 Naho vikani ili Muungu atiohoe na wantu wafyaimi na wenye mavigaviga, kwaviya khio wose wazumiao mbui inu.

3 Akini Zumbe Yesu ni yedi, endaawatintimaze na kuwainda kulawana na yuda mfyaimi. 4 Nae Zumbe atipatia kauwio kuu kuusu ninywi kuwa mwagosoa na mwendamwendeee kugosoa yada tekuwaagiiayo.

5 Zumbe aiongoee mioyo yenu mwe ukundiso wa Muungu na mwe uzizimizi tekhigwao na Klistu.

6 Wandugu, tawaagiiya kwa zina da Zumbe yetu Yesu Klistu, ekaeni hae na kiya wandugu ambao khawakunda ndima yoyose na ambae khekaa kwa kutongea miagiiyo tekuwekhayo. 7 Nywie wenye mwamanya kuwa mwakundigwa kubasa msimo wetu. Swie tekuwaho hamwe nee tagosoa kia ndima. 8 Khatokuda khande kwa mntu yoyose kwesiho kumuiha. Tigosoa ndima kwa bidii na suuba musi na kio ili tisekumzamia mntu yoyose gatigati yenu. 9 Tigosoa ivyo khio kwaajii khatina haki ya kukunda uwambiizi wenu, iya kwaajii takunda kuwekha msimo wa kutongea. 10 Tekuwaho hamwe nanywi netiwa tikawamba, "Mntu yoyose aemeae kugosoa ndima, asekuda khande."

11 Tawagombeka mbui iyo kwaajii tisikia kuwa waaho wamwe wenu ambao khawakunda ndima na ambao khawagosoa chochose, iyadu wengiza mwe mbui za wantu watuhu. 12 Kwa zina da Zumbe yetu Yesu Klistu tawaagiiya na kuwahaza wantu awo wawe na utuivu wa kugosoa ndima ili wepatie khande yao wenye.

13 Akini nywie wandugu, msekusokea kugosoa yedi. 14 Na ikawa mntu yoyose ati khategeeza Mbui yetu he bauwa inu, ekaeni nae hae mntu uyo na wala msekutamwiiya nae ili aone soni. 15 Mwesekumuona mntu uyo inga ni mmasa, akini mhazeni inga ndugu.

16 Zumbe mwenye ambae ni vokeo da uivanisi, awajaie uivanisi misi yose kwa kiya sia. Zumbe awe nanywi nyose.

17 Kwa mkono wangu mie Paulo nawaandikia ivi, unu nee utangio wa kumanyika he bauwa zangu zose, ivi nee nekuandikavyo.

18 Wedi wa Zumbe yetu Yesu Klistu iwe hamwe nanywi.