1 Bauwa inu yalawa kwa miye Paolo, muagiiwa wa Yesu Klistu kwa amli ya Muungu ambae ni mwohozi yetu na Klistu Yesu kauwio detu.

2 Nakuandikia weye Timoseo mwanangu wa kwei mwe uzumizi.

Nakukundia kwekaisa kwa uivanisi na mbazi na wedi wa Muungu Tati yetu, na Klistu Yesu Zumbe yetu.

3 Inga nekukugombekavyo nekuwaho nikatamba kuita Makedonia, nakunda wekae mzi wa Efeso ili uwaemeze wantu watuhu wasekuhinya mahinyo ya uhokho. 4 Uwambe wasekuzitongea hadisi zesazokuwa na mana na kwetanga mazina ya miango ilehayo yesaho kuwa na kisikiizi ya mababa zietazo kuhigana, khaziiganiza ntenganyi za Muungu imanyikanayo kwa uzumizi. 5 Mbui khuu mwe agiiyo ido ni ukundiso ulawao mwe moyo wedi na nia ntana na uzumizi wa kwei. 6 Wantu watuhu wagiwa kae kulawana na aya na kuhitukia ntamwiizi zesazokuwa na mana. 7 Wakunda kuwa wahinyi wa miko ya Muungu, akini khawamanya mbui wayagombekayo wala mbui wagombekazo kwa utintimavu.

8 Tamanya kuwa miagiiyo ya Muungu ni yedi ati ikatumiwa ikundigwavyo. 9 Akini takundigwa kumanya kuwa mwiko khauikwa kwaajii ya wantu wedi, iya kwa wantu mabagaa na wesao kutegeeza na wesao kumtongea Muungu na wata mavigaviga, wantu wesao dini na wantu wesao kuikwa kwaajii ya Muungu, na wantu wasanganyayo na mbui za inusi na wantu wakomao tati zao na mami zao na wakomaji wose, 10 wakianga na wagosi wawagonao wagosi wezwao na wawagwiiyao wantu na kuwataga na wahokho waahao kwa uhokho na mbui yoyose ntuhu yesayokwevana na mahinyo ya kwei. 11 Mahinyo aya yapatikana mwe Mbui Yedi ya ukuu wa Muungu yetu yedi, ambao nchekhigwa mie ili nizibiikie.

12 Namtogoa Zumbe yetu Yesu Klistu mwekunekha udaho kwaajii ya ndima yangu. Namtogoa kwa kunikauwa kuwa mie ni yedi, akanisagua nimgosoee ndima, 13 etiho aho bosi khiwa nee nikamdumua na kumsuumiza na kuwa mntu wa khumbizi. Akini Muungu nee kanifiiya mbazi kwaviya nchekuwa na uzumizi, nahodu ivyo nchekumanya nekuwado nagosoa. 14 Akini Zumbe yetu kanekha mboto yakwe nyingi muno, akanekha na uzumizi na ukundiso kwakuwa hamwe na Klistu Yesu. 15 Mbui inu ni ya kwei nahodu yafaa kutongewa, kuwa Klistu Yesu nee keza mwe inusi kuohoa wata mavigaviga ambao mie nekhiwa mfyaimi kusima wose, 16 akini Muungu nee anifiiya mbazi, ili Klistu Yesu aoneshe uzizimizi wakwe wose umu mwangu mie, niwe inga msimo kwa wada wose ambao wenda wamzumiiye na kuhokea ugima wa kae na kae. 17 Isasa kwa Seuta wa misi zose mwesekuwa na kisikiizi, na mwesekuoneka ambae ni Muungu wa ikedu ekhigwe ntunyo na ukuu wa kae na kae! Pepa.

18 Mwanangu Timoseo nakwekha agiiyo idi kutongeeana na mbui za uwoni zekugombekwazo kwako aho kae. Tumia mbui izi inga vitowano vya kutoana khondo kwa sia ikundigwayo, 19 naho utoze uzumizi wako na kumanya kugosoa yedi. Kwaviya wantu watuhu waemea ayo na ivyo nee waubananga uzumizi wao. 20 Wamwe wao ni Hemenayo na Alekizanda ambao khimwekha Ibiisi, ili wahinywe wasekumdumua Muungu.