1 Watumwa wose ambao ni wantu wamzumiao Klistu wakundigwa kuwatunya wakuu wao ili kwesekuwa na mbui yoyose ya wantu kudibea bue zina da Muungu na mahinyo yetu. 2 Nahodu wada ambao wakuu wao ni wantu wekumzumiiyao Klistu wasekuwabea kwaani ni wazumizi wezwao. Badala yakwe wakundigwa wawagosoee ndima naho kwa utana muno, mana awo wapatao mwengizo kulawana na ndima yao, ni wazumizi wezwao ambao wawakundisa.

Wakundigwa kuhinya na kubiikia mbui izi. 3 Mntu yoyose ahinyae mahinyo ya uhokho naho khazumia mahinyo ya kwei ya Zumbe Yesu Klistu na wala mahinyo yahusuyo wekaisi wa kumkundisa Muungu, 4 uyo kamema kwevuna nahodu khamanya dodose naho ni mntu wakukundisa kuhigana na khumbizi na agombeka mbui zesaokuwa na mana, ivyo ubibiiza kinyuu khumbizi na kudumua na kumamakhanya wantu ya ufyaimi, 5 na mahigano yesayokusia kulawa mwa wantu ambao akii zao zamamakhanya mafyaimi na ambao khawana ukwei vituhu. Wamamakhanya kuwa kwekaisa kwa kumkundisa Muungu ni sia ya kwepatia mai nyingi.

6 Ni kwei kwekaisa kwa kumkundisa Muungu kwa mtenda mntu awe na mai nyingi muno, ikawa atosheka na vintu ekuavyo navyo. 7 Kwaviya khatokweza na kintu chochose mwe inusi, naho khatina tidoe kintu chochose. 8 Akini tikawa na khande na magwanda ivyo vyawatosha. 9 Akini wada wantu watamiwao kuwa na mai webwiiya wengia mwe mageezo na kugwiwa na khwiina nyingi muno za kibahau na zietazo ubanasi ambazo zawengiza wantu mwe udagamizi. 10 Kwamana kukundisa hea nee vokeo da kuwa na makwasukwasu yose. Wantu watuhu watamiwa muno wapate hea wajaibu kuavya na makafaa na kubadana na uzumizi, na waivuza na nyuma mioyo yao kwa mbazi nyingi.

11 Akini weye mntu wa Muungu wekae hae na mbui izo, fundana kugosoa yedi, wekae kwa kumkundisa Muungu, mwe uzumizi na ukundiso na uzizimizi na uhuhusi. 12 Toana ida khondo ntana ya uzumizi ukepatie funge da ugima wa kae na kae wekwetangiwayo kisingi wekumzumiaho Klistu hemeso ya wantu wangi. 13 Nikawa hemeso ya Muungu avyekhae viumbe vyose ugima na hemeso ya Klistu Yesu mwekuonae na mwekugombeka ukwei hemeso ya Pontio Pilato, nakuagiiya 14 utoze amli inu na kwesekuwa na kwasu dodose wala lawama adi kweza kwakwe Zumbe yetu Yesu Klistu. 15 Ambae Muungu endaamwete kwa kisingi chakwe kifaacho endaajaiwe, mwekuwa ukedu Mgookezi, Seuta wa maseuta na Zumbe wa mazumbe. 16 Yee ukedu ekaisa kae na kae na ekaisa mwe mweenge wesao kudahika kubwiiwa ni mntu. Khahana mntu mwekupata kumwona hambu adahae kumwona. Kwa yee iwe ntunyo na udaho wa kae na kae! Pepa.

17 Uwaagiie wekuwao na mai mwe inusi wasekwevuna nahodu wasekuzikauwiya mai zao zesazo kuwaambiza, iya wamkauwiye Muungu atekhae vintu vyose kwa nyemi. 18 Waagiie wagosoe mbui ntana na wawe na mai kwa mbui zedi, wawe tayali kulavya vintu vyao kwa kuwambiza wantu watuhu. 19 Kwa sia inu wendaweikie kiikizo inga vokeo kwaajii ya kisingi chezacho na ivyo wenda wepatie ugima, yani uda ugima ambao ni wa kwei.

20 Timoseo yaike vitana yada yose wekwekhigwayo wekae hae na ntambaisano zesazokumkundisa Muungu na uhigani wa kihezi kwa kia ambacho wantu watuhu wetanga, "Umanyi." 21 Wantu ambao watuhu kwa kwevuna nayo, waubada uzumizi.

Mboto ya Muungu iwe nanywi nyose.