1 Bosi ya mbui zose, nawahembeeza muombeze uviki kwa Muungu kwayada myakundayo, mmuombeze Muungu, muwavikie wantu watuhu na mviko wa ntogoo yagosolwe kwaajii ya wantu wose, 2 kwaajii ya maseuta na wose watigookeao ili tidahe kwekaa kwa uivanisi na kwekaisa kwesiho khumbizi kwa kumtegeeza Muungu na kwa ntunyo. 3 Mbui inu ni yedi na yamtamiza Muungu mwohozi yetu, 4 ambae awakunda wantu wose waoholwe na wamanye ukwei. 5 Kwaviya yuuko Muungu yumwe na viyaviya yuuko yumwe awaikae wantu wevane na Muungu, mntu uyo ni Klistu Yesu, 6 yee mwenye kauya na nyuma ili kuwakomboa wantu wose, na mbui inu itamwiiwa mwe kisingi chakwe kuwa Muungu akunda kuwaohoa wantu wose. 7 Kwaajii iyo mie khiagiiwa niwe muagiiwa na mhinyi wa wantu wesao kuwa Wayahudi nibiikie mbui inu ya uzumizi na ukwei. Kwaivyo nagombeka ukwei wala khigombeka uhokho!

8 Hohose hada mkintanaho na kuvika nakunda wagosi wavike, wekweavyao kwa Muungu na ambao wadaha kwenua mikono yao yekusuntwayo kuvika kwesiho maya wala uhigani. 9 Viyaviya nakunda wavyee wehambe kwa kuvaa nguo za ishima na wawe na khacho ntana, waoneke vikundigwavyo na khio kwa kusuka fii zenu na kuvaa heleni za zahabu na vishaufu na nguo zitamazo vitana iya kwa kugosoa yada yamtamiayo Muungu, 10 iya kwa ntendwa mgosoazo yawe yedi inga wakundigwavyo kugosoa wavyee wamtegeezao Muungu. 11 Wavyee wakundigwa kunyamaa myee na wesao kukunda makuu kisingi cha kwehinya. 12 Khimwekha mvyee uhusa ya kuhinya hambu kumwekaiya mgosi. Mvyee akundigwa kwekaa kwa kunyamaa 13 kwaviya Adamu kavoka kuumbwa nee atongea Hawa. 14 Naho khio Adamu mwekutiiwa iya mvyee nee mwekutiiwa akagosoa mavigaviga. 15 Akini mvyee enda aoholwe kwa kuvyaa kwake inga akaendeea kwekaa na uzumizi na ukundiso na ukuu hamwe na kuukindia moyo.