1 Inu ni mbui ya kwei, Mntu akakunda kuwa mgookezi wa zumwezumwe da wantu wa Muungu wamzumiao Klistu atamiwa ndima ntana. 2 Isasa yakundigwa mgookezi uyo awe ni mntu mwesaekuwa na lawama, mgosi wa mvyee yumwe akindiae moyo wakwe, egookeae vyedi na atunywae na mhokeaji wantu na amanyae kuhinya, 3 asekuwa mkozi hambu mntu wa khumbizi iya awe mhuhusi na akundae kwekaisa kwesiho khumbizi na asekuwa mntu wa kukundisa hea, 4 yakundigwa awe ni mntu adahae kugookea vitana kaya hakwe na kuwaeya wanawe vyedi ili wamtegeeze kwa ntunyo. 5 Kwa mana inga mntu khadaha kugookea kaya hakwe mwenye enda adahe viivihi kuwagookea zumwezumwe da wantu wa Muungu wamzumiao Klistu? 6 Mntu ambae khazati kudahaa mwe uzumizi asekutendwa kuwa mgookezi wa wantu wekumzumiiyao Klistu, ili asekweza akevuna na kuamuiwa inga viya ibiisi ekuamuiwavyo. 7 Yakundigwa awe na ntunyo yedi kwa wantu wesaokumzumiiya Klistu ili asekweza kuoneka khafaa na kugwiiya mwe mtego wa ibiisi.

8 Wambiizi wa zumwezumwe da wantu wa Muungu wamzumiao Klistu wakundigwa kuwa wantu wa kutunywa na khio wantu wa khanga nikude khanga nikueke na wasekuwa wadomeaji muno wa phombe na wala wasekuwa na khwiina kwemboka vintu wakundigwavyo. 9 Yakundigwa kutozeeza muno kwei ya uzumizi kwa moyo wedi. 10 Awa wambiizi wakundigwa kugeezwa bosi na wakaoneka kuwa wafaa ndiho wekhigwe ndima yao ya uwambiizi. 11 Wavyee wao wakundigwa wawe wantu wakutunywa na wasekuwa wateti kwa wantu na waikindie mioyo yao na wawe wazumiwa kwa mbui zao zose. 12 Mwambizi wa zumwezumwe da wantu wa Muungu wamzumiiyao Klistu yakundigwa awe na mvyee yumwedu na adahae kugookea vitana wanawe na kaya yakwe. 13 Kwaviya wambiizi wagosoao ndima yao vitana wepatia ntunyo ntana na wadaha kutamwiiya kwesiho kuogoha uzumizi wao mwe Klistu Yesu.

14 Ati inga nakuandikia bauwa inu nakauwiya kweza hako ivi hehi, 15 akini ati nikacheewa, namanya, bauwa inu yendaikumanyise viya tikundigwavyo kwekaa mwe Nyumba ya Muungu ekuwae mgima ambado ni zumwezumwe da wantu wa Muungu wamzumiiao Klistu ambao ni mhindo na msingi wa kwei. 16 Haika sii ya mbui zekufiswazo za Muungu ni khuu muno,

Akaoneka ana umbo da mntu

Akaikwa pwii na Muye wa Muungu kuwa ni wa kwei

Nee aoneka na wandima wa uwanga kwa Muungu,

Akabiikiwa gatigati ya wantu wesao kuwa Wayahudi,

Nee azumiwa mwe inusi ngima,

Akadoigwa uwanga kwa Muungu akahokewa na ukuu.