1 Mdaa usekumwakiya kwa maya, akini tamwiiya nae inga tati yako. Na wabwanga nao utamwiiye nao inga wanduguzo, 2 wavyee wadaa utamwiiye nao inga via mami zako na wandee inga maumbudo kwa ntunyo.

3 Uwambize wavyee wekufiiwao ni wagosi ambao ni wavyee wekufiiwao ni wagosi wao kwei. 4 Akini mwekufiiwa ni mgosi ati ana wana hambu vyezukuu, awo wakundigwa kwehina kugenyeza yada ya kidini kwa wantu wawo wenye, kwakugosoa ivyo wendawawe wavuza wedi kwa wavyazi na wadaa wao, kwaani iyo ni mbui ntana imtamizayo Muungu. 5 Mvyee mwekufiwa ni mgosi mwesaekuwa na mntu wa kumuambiiza, kamuikia Muungu kauwio dakwe na aendeea kuvika, akamuombeza Muungu uambizi kio na musi. 6 Akini mvyee mwekufiwa ni mgosi, mwekaa mwe wekaisi wa kwetamiza uyo kauya kae na nyuma, etiho ake mgima. 7 Ivyo wekhe wantu miagiiyo inu ili asekulawiiya yoyose wa kulaumu. 8 Inga mntu mwesaekuwakauwa wada wa mwe kaya yakwe endaawe kaemea uzumizi, nahodu mntu inga uyo ni mfyaimu kusima yee mwesaekuzumiiya.

9 Mwekufiiwa ni mgosi yoyose asekuikwa mwe ntaazia ya wavyee wekufiiwao ni wagosi adi kabuza myaka makumi mtandatu. Na awe mvyee ekutegulwae maa mwenga du, 10 naawe na ntunyo ntana mwekuwaeya wanawe vitana, ekuwahokeaye wageni mwe nyumba yakwe na mwekuwasunta miundi wandima wa Muungu, mwekuwaambiza wantu wekuwao na usuumizi, na mwekweavya kugosoa mbui zedi muno.

11 Wesekuwaandika wavyee wekufiiwao ni wagosi wake wandee, kwaviya khwiina zao za mii zikatendesa kuwa na nguvu muno kusima kuda kweavya kwao kwa Klistu wendawakunde kutegulwa vituhu, 12 nawo wendawaoneke kuwa wana masa kwaviya waeka kiaga chao cha bosi. 13 Wavyee wekufiwao ni wagosi inga awo wana khachu ya ubwa na kuzuua zuua mwe nyumba za wantu; nawala khawana ubwa du iya wawagombeka wantu ya ufyaimu, na kwengiza mwe mbui za wantu, kutamwiiya mbui zesazokukundigwa kutamwiiwa. 14 Ivyo nakunda wekufiiwao ni wagosi na ambao khio wadaa wategulwe na wavyae wana na wawaee na kuzikauwa nyumba zao, ili wamasa wetu wasekwepatia phasi ya kutigombekea ya ufyaimi. 15 Kwaviya wekufiiwao ni wagosi watuhu wahituka kae na kumbasa Ibiisi. 16 Inga mmaa mumzumiia Klistu ana wekufiiwao ni wagosi mwe wanduguze yee mwenye akundigwa awakauwe na khio kudibadia zumwezumwe da wantu wa Muungu wekumzumiiyao Klistu wawakauwe, ili zumwezumwe ido da wazumizi didahe kuwakauwa wada wekufiiwao ni wagosi na khawana wantu wa kuwakauwa.

17 Wadaa wagookezi wa wekumzumiiayo Klistu wagookeao wantu vitana wakundigwa kutunywa muno asa wada wafundanao kubiikia na kuhinya. 18 Kwaviya Maandiko ya Muungu yamba, "wesekumfunga kanwa ng'ombe ahuuaho khande," viyaviya Maandiko yamba "Mgosozi wa ndima akundigwa ekhigwe maiho yakwe." 19 Wesekuhokea masa ya mdaa adi yawe yaonwa ni wantu waidi hambu watatu. 20 Wada wagosoao mavigaviga uwahaze hewazo, ili watuhu wadahe kuogoha.

21 Nakuagiiya hemeso ya Muungu na ya Klistu Yesu na hemeso ya wandima wedi wa uwanga kwa Muungu, ugosoe miagio iyo na kwesiho kuiyeka hata umwe nahodu usekumkundisa mntu yoyose mwe kintu ugosoacho. 22 Usekuwa na kinyio cha kumuikia mntu mikono kwaajii ya ndima ya Muungu na wala wesekuwa hamwe na mavigaviga ya wantu watuhu mwekae mwe wekaisi wa kumkundisa Muungu.

23 Kuvokea isasa usekudomea mazi du akini tumia divai ncheche, kwaajii ya ifu dako na matamu upatayo maa kwa maa.

24 Mavigaviga ya wantu watuhu yaoneka pwii nayo yawaongoeya he kuamuiiwa na watuhu mavigaviga yao yendayaoneke he mgongo wao. 25 Viyaviya mbui zedi zamanyika pwii na ata yada yedi ya sii khayadaha kwefisa.