1 Muye wa Muungu wagombeka pwii kuwa mwe misi ya kisikizi wamwe wa wantu wenda wabadane na uzumizi na kutongea muye zitiizazo na mahinyo ya mazaiko. 2 Mahinyo ya namna iyo yaambazwa na wantu wabakha watamwiao uhokho ambao khwiina zao zifa. 3 Wantu awo wahinya wantu wasekutegua, na kuwakunda wekae hae na khande ambazo Muungu kazigosoa zihokewe kwa ntogoo na awo wekuwao na uzumizi wenye kuimanya iyo kwei. 4 Kwaviya kia kintu ekugosoacho Muungu ni chedi naho khahana kintu chochose cha kuemewa ati vikahokewa kwa kumtogoa Muungu, 5 kwaajii visuntwa kwembokea kwa Mbui ya Muungu na kwa kuvika.

6 Inga ukawamba wantu mbui iyo wendauwe mndima yedi wa Klistu Yesu na mwekweeya mwe kwei yose ya uzumizi na mahinyo matana wekuyatongeayo. 7 Ekana na ntamwiizi zesazo kuwa na mana zesazo kumtamiza Muungu. Ezoeshe kwekaa ugima wa kumtamiza Muungu. 8 Kwaviya mazoezi ya mwii yana faida ndodo, akini kwekaisa inga viya Muungu akundavyo kuna faida za kia namna, kwamana yatiikia kauwiyo da ugima tekaavyo isasa na uda wezao. 9 Inu ni mbui ya kwei naho yakundigwa kuzumiiwa kabisa. 10 Swie tafundana kugosoa ndima kwa bidii muno kwaviya timuikia kauwiyo detu Muungu mwekuwa mgima ambae ne mwohozi wa wantu wose na asa wada wamzumiiao.

11 Isasa uwaagiiye na kuwahinya mbui izo. 12 Mntu yoyose asekukubea kwaajii wee uke mbwanga, akini wee fundana uwe msimo kwa wazumiiyao mwe ugombekaji wako na viya wekaavyo na ukundiso wako na kuzumiiya kwako na kwekaa wedi. 13 Fundana kuwaangiza wantu Maandiko hewazo na kubiikia na kuhinya adi nendahoneze. 14 Wesekubada kukigosoeya ndima kipaji chekulawacho kwa Muye wa Muungu chekuwacho umo mwako ambacho kwekhigwa na kuikwa pwii kwa mbui ya waoni wa Muungu na kwa kuikiwa mikono mwe mtwi na wadaa. 15 Umamakhanye mbui izo na kuzigosoa, ili kiya mntu aone uendeeavyo kukuwa. 16 Kauwa muno mbui zako mwenye na mahinyo yako. Endeea kugosoa ayo, kwaviya ukatenda ivyo, wendaweohoe wee mwenye na wada wose wakutegeezao.