1 Ni Mie Paolo mwagiiwa wa Yesu Klistu viya ekukundavyo Muungu, kaniagiiya kubiikia kia kiaga cha ugima tekuikiwacho kiaga mwe kuwa hamwe na Klistu Yesu.

2 Nakuandikia bauwa inu Timoseo, mwanangu nikukundisae.

Nakukundia wedi, mbazi na kwekaa kwa uivanisi kulawa kwa Muungu Tate na Klistu Yesu Zumbe yetu.

3 Namtogoa Muungu, nimgosweeaye ndima kwa moyo mtana, inga wekugosoavyo baba zangu. Namtogoa Muungu kia nikukumbukaho he miviko yangu kio na musi. 4 Nakumbuka mesozi yako na nina hovu muno kukuona ili niwe na nyemi. 5 Nakumbuka uzumizi wako wa kwei na yesayo kuwa uhokho, ambayo aho bosi iwa kwa woo yako Loisi na viavia kwa mami ako Eunike naho mie namanya hata wee wenayo. 6 Kwaajii inu nakukumbusa wesekubada kukigosoeya ndima ida funge wekwekhigwacho ni Muungu kwa kuikiwa mikono yangu. 7 Kwaviya Muye tekwekhigwao na Muungu khio wakutitenda tiwe taogoha, iya ni Muye wa udaho na ukundiso na kuukindia moyo.

8 Ivyo, wesekuona soni kuwavuhuzia mbui za Zumbe yetu, naho wesekunionea soni mie nekuwae mwe kifungo kwaajii yakwe, akini kuwa hamwe na miye mwe masuumizo kwaajii ya Mbui Yedi, kuigana na nguvu wekwekhigwayo ni Muungu. 9 Yee mwekutiohoa na kutetanga tiwe wantu wekuikwao kwaajii yakwe, akini khio kwa ntendwa zetu iya kwaviya ekukundavyo mwenye na mboto zakwe, nee katekha mboto iyo ya Muungu kwembokea Klistu Yesu tangia misi yose kwesaho kisiikizi, 10 akini igubwiiwa kwetu isasa kwa kweza kwakwe Mwoohozi wetu, Klistu Yesu. Yee akakanya kihemphe nguvu ya ufe na kwembokea Mbui Yedi akagubuwa ugima wa misi yose kwesaho kisiikizi.

11 Mie khisagulwa niwe mwaagiiwa na mhinya kwaajii ya kubiikia Mbui Yedi, 12 inu nee iniekayo nasuumika kiivyo, akini khiona soni kwaviya nammanya yee nekumzumiiaye, na nazumiiya kuwa yee endaainde kia ambacho kiikwa ndani yangu adi msi wa uwamuiyo wendahoubue. 13 Toza vitana mahinyo yada ya kwei nekukuhinyayo na kusigaa mwe uzumizi na uwo ukundiso wetu mwe kuwa hamwe na Klistu Yesu. 14 Ikauwe mbui ida ntana wekwekhigwayo kwa uwambizi wa Muye wa Muungu mwekaa ndani yetu.

15 Inga umanyavyo, wantu wose wa mzi wa Asia wanibada, wamwe wao waumo Filego na Helomogene. 16 Zumbe awaonee mbazi wantu wa kaya ya Onesifolo, kwaajii kanitamiza mwe muye maa nyingi, naho khekuionea soni minyololo yangu, 17 iya vuu puu ekubuaho Lumi, akavoka kuniondeza kwa bidii akanipata. 18 Zumbe amjaiye mbazi mwe msi uda! Nawe wamanya vyedi, mangi ekunigosweayo uko Efeso.