1 Nakuagiiya hemeso ya Muungu, na hemeso ya Klistu Yesu endaeawaamwiiye wantu wenye ugima na wekuuyao na nyuma, na kwaajii ya kweza kwakwe na kwaajii ya Seuta wakwe, 2 biikia iyo mbui, fundana kuambaza iwe ni kisingi kikundigwacho au kisingi chesachokukundigwa, wakia na uwahaze na kuwagea wantu moyo kwa uzizimizi wose na kwa kuwahinya vitana. 3 Kisingi cheza ambacho wantu khawanawategeeze mahinyo ya kwei, sia zao wendawatongee khwiina zao wenye na wendawepatie zumwezumwe da wahinyi wendaowawambe mbui zia du ambazo magutwi yao yendayakunde kutegeeza. 4 Wendawaemee kuutegeeza ukwei, wendawahitukie ntamwiizi zesazo kuwa na mana. 5 Akini wee uwe meso kwa mbui zose na zizimiza suuba na gosoa ndima ya kubiikia Mbui Yedi, naho gosoa ndima zako zose inga mndima wa Muungu.

6 Kwaviya, mie isasa ni hehi kae na kulavigwa inga lavyo da kudomea, na kisingi cha kuuswa kwangu mwe inusi kihehi. 7 Khitoana khondo vitana na uguuko khiubinda na uzumizi kiuinda. 8 Na isasa kusigaa du kwekhigwa funge ya uvoti ya kwekaa vyedi, ntunyo ambayo Zumbe mwaamua wa kwei, endaanekhe mie msi uda wa uwamuio na wala khio mimidu iya na wada wose wahufiizao kwa ukundiso ulawiao kwakwe.

9 Fundana kweza kwangu kinyio, 10 Kwaajii Dema kakundisa mbui za inusi akanibada na kuita Sesalonike. Nae Kelesike kaita Galatia na Tito kaita Dalimatia. 11 Luka ikedu nee mwekuwa hanu hamwe na mie. Mdoe Maliko weze nae, kwaviya adaha kuniambiiza mwe ndima ya Muungu. 12 Khimwaagiia Tukiko uko Efeso. 13 Wendahoweze nietea koti dangu dilehalo nekudibadayo kwa Kalipo kuda Toloa, naho unietee via vitabu, asa viya vya babu.

14 Yuda mhunzi wa madini ya shaba etangwae Alekizanda kanigosweea mafyaimi mangi, Zumbe endaamwiihe kutongeana na ntendwa zakwe. 15 Ekaa nae hae kwaajii kaemea mbui yetu kwa ukai.

16 Kisingi nekwevuniaho kwa maa ya bosi khahana mntu mwekugooka phande yangu, wose nee wanibada. Muungu asekuwaamuiya kwa idi. 17 Akini Zumbe kekaa hamwe na mie, akanekha udaho umo nikadaha kubiikia mbui zose, na wantu wesaokuwa Wayahudi wautegeeze, vituhu nikaoholwa kulawa mwe ufe inga kanwa cha simba. 18 Zumbe endaaniohoe na mbui zose za makwasukwasu na kunidoa pheho adi mwe useuta mkuu wakwe wa uwanga kwa Muungu. Kwakwe kuwe ukuu wa misi yose kwesiho kisiikizi.

19 Wauguse Pilisila na Akula hamwe na kaya ya Onesifolo. 20 Elasito kasigaa Kolinto, nae Tilofimo khimbada Mileto kwaajii nekawa mtamu. 21 Gosoa kinyio kweza kisingi cha pheho khaizati kuvoka.

Ebulo na Pudesi na Lino na Kilaudi wakuugusa, viavia ndugu watuhu wose wakuugusa.

22 Zumbe awe hamwe na wee na muye wako.

Wedi yakwe iwe hamwe nanywi.