1 Akini umanye mbui inu, mwe misi za kisiikizi kwendakuwe na kisingi cha suuba. 2 Wantu wendawawe wekundisa wenye na wenye kukunda hea na wetapao na wenye kibui na wenye kudumua na wesaokutegeeza wavyazi wao na wesaokuwa na ntogoo na wesaokuikwa kwaajii ya ndima ya Muungu, 3 wendawaawiiye wantu wesaokuwa na ukundiso na wesaokuekea na wasongeezi na wesaokuikindia mioyo yao na wakai waemeao dodose dekuwado dedi, 4 wendawawe wahitukaji na wenye mbifya na wekumemao kibui na wendawakundise mbui zao wenye kusima kumkundisa Muungu. 5 Wantu awo kwa chongoi wendawaooneke inga wantu wamtegeezao Muungu, akini wenda waemee udaho wakwe, ekaa hae na wantu inga awo. 6 Wamwe wao waita mwe nyumba za wantu na kuwadoa wavyee wesao kuwa na udaho wa uzumizi, wekuzamiwao na ndundu za mavigaviga na ambao waongoewa na khwiina za ufyaimi za kia namna, 7 wavyee awo wageeza kia msi kuhina akini khawadaha kuumanya ukwei. 8 Wantu awo wahigana na ida kwei inga Yane na Yambule wekuhiganavyo na Musa, awa ni wantu wekubanikao akii ambao waemea kwa mbui ya uzumizi. 9 Akini khawanawadahe kuendeea muno, kwaajii ubahau wao wendauoneke pwii kwa wantu wose nee yekoonekanavyo kwa Yane na Yambule.

10 Akini wee kuyatongea mahinyo yangu, khachu zangu na kia nikundacho mwe kwekaisa kwangu, weye ukatongea uzumizi wangu, ukundiso wangu na uzizimizi wangu, 11 masuumizo na suuba. Wamanya mbui zekunipatazo uko Antiokia na Ikonio na Lisitila. Khizizimiza masuumizo na suuba khuu muno, akini Zumbe kaniohoa he mbui izi zose. 12 Kia mntu akundae kwekaa kwa kumkundisa Muungu na mwe uhamwe na Yesu Klistu yamkunda asuumizwe. 13 Wantu wenao makwasukwasu na watiizi wendawaendee kuwa wafyaimi muno, wakatiia watuhu na woo wenye waketiiwa. 14 Akini wee ekaa mwe ukwei uda wekuhinywaho na ukauzumia. Wawamanya wada wekuwao wahinyi wako, 15 nawe wakumbuka kuwa kuvokea uteke wako nee kumanya Maandiko ya Muungu yadahayo kukwekha umanyi uetao uohozi kwembokea uzumizi wa Klistu Yesu. 16 Maandiko ya Muungu yaandikwa kwa uwongoezi wa Muungu, yafaa kuhinyia ukwei, kuwahaza wantu masa yao na kuwaongweeya wantu wekae kwa kugosoa mbui yedi kwa kumkundisa Muungu, 17 ili mntu wa Muungu awe kaigania na kaikwa tayali kwaajii ya kugosoa kia ndima yedi.