1 Naho, wee mwanangu, uwe na udaho mwe wedi tiipatayo mwe kuwa hamwe na Yesu Klistu. 2 Doa yada mahinyo wekuyateegezayo nikabiikia hemeso ya wavuhuzi wangi, uyekhiize kwa wantu wazumiiwao, ambao wendawadahe kuwahinya watuhu.

3 Zizimiza he suuba inga asikai wakuzumiwa wa Klistu Yesu. 4 Asikai akawa mwe khondo ekaa hae na mbui zakwe zose, ili adahe kumtamiza mkuu wa maasikai. 5 Viyaviya mguukaji yoyose khadaha kuvota na kupata funge ya uvoti, ati khategeeza mwiko wa msizigo uwo. 6 Muimi mwekugosoa ndima khai akundigwa kwekhigwa hantu ha bosi ha ubosi. 7 Mamakhanya ayo nitamwiiayo, kwaviya Zumbe endaakwekhe uve wa kia kintu.

8 Mkumbuke Yesu Klistu mwe kuyuyuswa kulawa kwa wekuuyao na nyuma, mwekuwa uvyaigwa wa Daudi inga igombekavyo Mbui Yedi niibikiayo. 9 Kwaajii ya kubiikia Mbui Yedi, nasuumizwa ata kufungwa kwa minyololo inga mbanasi, akini Mbui ya Muungu khaidaha kuvugalwa kwa minyololo, 10 kwaivyo nazizimiza kiya kintu kwaajii ya wantu wekusagulwao ni Muungu ili viyaviya awo wekhigwe uohozi upatikanao kwembokea Yesu Klistu na uetao ukuu wa misi yose kwesaho kisiikizi. 11 Ugombeki unu ni kuzumiiwa.

"Ikawa tiuya na nyuma hamwe nae,

Tenda tekae hamwe nae.

12 Tikaendeea kuzizimiza,

Tendatigookee hamwe nae

Ati tikamuemea,

Yee nae endaatiemee.

13 Inga tikesekuzumiiya,

Yee endaasigae kuwa mzumiiwa,

Kwaviya yee khadaha kweemea mwenye."

14 Nakuhembeeza wakumbuse wantu wako mbui izi na kuwahaza hemeso ya Muungu waeke uhigano wa mbui zesazo kuwa za mana, uhigano uwo khaufaa, iya waeta du ubanasi mkuu kwa wada wautegeezao. 15 Fundana kweonyesha wantu kuwa kukundigwa hemeso ya Muungu, inga mgosoa ndima mwesekuona soni, kuusu ndima na ambae ahinya vyedi ida mbui ya kwei ya Muungu. 16 Ekaani hae na ntamwiizi fyaimi zesazo kuwa na mana na zakibahau zesazokumtogoa Muungu, kwaviya ayo yatendesa kuwabahua wantu hae na Muungu. 17 Mahinyo ayo ni inga kionda cha phaamba wamwe wa awo wekuhinyayo ayo ni Himenayo na Fileto. 18 Ambao waibada ida kwei, wamba kuwa kuyuyuka kwa wekufao kubindakae kuwaaho, nao kubananga uzumizi wa wamwe wa wantu. 19 Akini msingi wekuikwao ni Muungu uko mntintimavu, uwanga yakwe uandikwa mbui izi, "Zumbe awamanya wada wakwe," na viyaviya "Kia agombekaye zina da Zumbe yakundigwa aekane na mavigaviga."

20 Mwe nyumba ya tajii ziaho nyiga na via vya kiya mbai vituhu ni vya madini ya feza na zahabu vituhu vya mbao na vituhu vya dongo, vituhu ni vya matumizi ya ntunyo na vituhu kwaajii ya matumizi yesayo kuwa na ntunyo. 21 Naho ati mntu endaesunte kwa kwebahua hae na mbui izo zose za ufyaimi, endaawe kia cha ntunyo, chekuikwacho kwaajii ya ndima ya Zumbe yakwe na ambacho chamfaa mwenye nyumba na yu tayali kwa kiya ndima ntana. 22 Ekaa hae na khwiina za ufyaimi za ubwanga, gosoa mbui zedi akundazo Muungu, na uzumizi na ukundiso na uivanisa hamwe na wose wada wamwetangao Zumbe kwa moyo wekusuntwao. 23 Ekaa hae na mahigano yesaho kumkundisa Muungu na ya kibahau, kwaviya wamanya ayo yaeta khumbizi. 24 Mndima ya Zumbe asekuwa mntu wa khumbizi na aondigwa awe mhuhusi kwa wantu wose na mhinya mtana na mzizimizi, 25 vituhu yakundigwa kuwahinya kwa uhuhusi wada wahiganao nae, kwa kukauwia kuwa Muungu endaawajaie kuhituka na kueka mavigaviga na kuimanya kwei. 26 Aho umanyi wao wendauwauwie vituhu, wakalawa mwe mtego wa Ibiisi ekuwagwiiae na kuwagosoa wayategeeze akundayo yee.