1 Bauwa inu yalawa hangu mie Paolo mndima wa Muungu naho ni mwagiiwa wa Yesu Klistu.

Khiagiiwa kutintimaza uzumizi wa wantu wekusagulwao ni Muungu na kuwaongoea waumanye ukwei wekae wekazi wa kumkundisa Muungu, 2 ambao msingi wakwe ni kauwio da kwekhigwa ugima wa kae na kae. Muungu mwesaekugombeka uhokho nee kaika kiaga cha ugima uwo kabla inusi khaizati kuikwa, 3 naho kwa kisingi chakwe akagubua mbui yakwe mwenye kwembokea mabiikizi ambayo miye nee khiikiwa kwa amli ya Muungu Mwohozi yetu.

4 Nakuandikia wee Titu mwanangu wa kwei mwe uzumizi tekuao hamwe.

Nakukundia wedi na kwekaa kwesiho khumbizi kuawa kwa Muungu Tate na kwa Yesu Klistu Mwohozi yetu.

5 Khikubada Kilete ili uike vyedi mbui zia zekusigaazo na kuwasagua wadaa wa zumwezumwe da wantu dekumzumiado Klistu mwe kia mzi. Inga nekukuagiiyavyo. 6 Mdaa wa zumwezumwe da wantu dekumzumiado Klistu akundigwa kuwa mntu mwesaekutamwiiwa ya ufyaimi na awe mgosi azumiwae na mkaziwe na wanawe wakundigwa kuwa wazumizi naho wasekumanyika kuwa ni wakhumbizi wala wesaokutegeeza. 7 Kwaviya mwoongoezi wa wantu wamzumiao Klistu ni mgookezi wa ndima ya Muungu, akundigwa kuwa mntu mwesaekutamwiiwa ya ufyaimi na asekuwa mwenye kwevuna na asekuwa na maya kinyio na asekuwa mkozi na asekuwa mntu wa khumbizi naho asekuwa mdoa hea kwa sia ya utiizi. 8 Akundigwa kuwa mhokeaji wageni, mkunda mbui zedi, mkindia moyo, agosoae yamkundisayo Muungu na mntu mwekuikwa kwaajii ya Muungu na mwenye khachu ntana. 9 Akundigwa atoze mbui ya uzumizi inga ikuhinywavyo, ndiho endaho adahe kuwagea moyo watuhu kwa mahinyo ya kwei na kuonyesha masa ya wada wahiganao na mahinyo ayo.

10 Kwaviya waaho wantu wangi wekulawao mwe wazumizi wa Kiyahudi awo wahigana, naho wawatiia wantu kwa uhezi wao. 11 Yakundigwa mbui zao zinyamae, kwaajii wawatenda kaya nyingi wasekwevana wakawahinya mbui zesazokukundigwa kuhinywa kwa nia ya kupata hea. 12 Naho yumwe wa waoni wa Kilete ambae viavia ne ni Mkilete nee kagombeka, "Wakilete wazoeya kugombeka uhokho misi zose ni inga wanyama wafyaimi na wabwa naho ni wameo." 13 Mbui izo ekugombekazo ni za kwei kwaivyo uwaakie muno wadahe kuwa watintimavu mwe uzumizi, 14 wasekuendeea kutegeeza mbui za Kiyahudi zesazokuwa na mana na miagiiyo yekulawayo kwa wantu wauemeao ukwei. 15 Kia kintu kikundigwa hemeso ya Muungu kwa wantu wakundigwao hemeso ya Muungu, akini khakuna kintu chochose kikundigwacho hemeso ya Muungu kwa wada wamamakhanyayo ya ufyaimi na wesaokuzumiiya kwaviya zamila zao na akii zao zaga. 16 Wantu inga awo wetenda kuwa wammanya Muungu, akini kwa mbui zao wamuemea Muungu, ni wantu wa kusukiza muno na wesaokutegeeza na khawafaa kwa mbui yoyose ntana.