1 Akini wee wakundigwa kubiikia mahinyo ya kwei. 2 Wagombeke wadaa wa kigosi kuwa wakundigwa wawe wantu watwiivu na wawe wantu wakutunywa na wakuikindia mioyo na wakundigwa wawe wantu wakazumiia mahinyo ya kwei na ukundiso na uzizimizi. 3 Viavia wahinye wadaa wa kivyee kwekaa kwa kumtegeeza Muungu naho wasekuwa wasongeezi au wasekudomea muno phombe akini wakundigwa kuhinya mbui zedi, 4 ili wadahe kuwahinya wavyee wekutengulwao ambao wake wandee wawakundise wagosi wao na wana wao, 5 wadahe kuikindia mioyo yao na wakundigwao hemeso ya Muungu na wakauwe vitana mbui za mwe nyumba zao na wawe wedi na wawategeeze wagosi wao, ili mbui ya Muungu isekweza kubewa.

6 Viavia wabwanga nao uwagee moyo, waikindie mioyo yao. 7 Mwe mbui zose wakundigwa wee mwenye kuwa msimo kwa kia mbui yedi. Wakundigwa wekauwe na kuhinya mahinyo yenye ukwei. 8 Gombeka mbui zifaazo ambazo khazina zidahe kukosolwa ili wamasa wako waone soni, wesekupata dodose da ufyaimi da kugombeka kuusu swie.

9 Watumwa wakundigwa kuwategeeza wakuu wao na kuwatamiza mwe mbui zose, naho wasekutambaisana nao, 10 wala wasekuwabaia vintu vyao. Akini wakundigwa koonyesha kuwa wao ni wantu wedi ili kwa ntendwa zao zose yaete ntunyo ntana mahinyo ya Muungu Mwohozi yetu.

11 Kwaviya wedi wa Muungu ugubulwa kwaajii ya uohozi wa wantu wose. 12 Wedi wa Muungu watihinya kuemea mbui zose zesazokumkundisa Muungu na khwiina za mwe inusi ili tekae wekazi wa kuikindia mioyo yetu na wekazi wekunyookao na yamkundisayo Muungu mwe inusi ya isasa, 13 tikagoja kauwio denye majaiwa kisingi wendahougubulwe ukuu wa Muungu Mkuu na Mwoohozi yetu Yesu Klistu. 14 Yee Klistu kelavya mwenye kwaajii yetu ili atiohoe kulawa mwe makwasukwasu yose na kutigosoa tikundigwvyo hemeso yakwe, wantu wakundao kugosoa yedi.

15 Wahinye wantu mbui izi kwa udaho wako wose, uku ukawagea moyo na kuwahaza na mntu yoyose asekukubea.