1 Wakumbuse wantu wawatunye wakuu wao na wenye udaho, na kuwategeeza na wawe tayali kugosoa mbui zose zedi. 2 Wasekugombeka mafyaimu kwa mntu yoyose, wesekuwa wantu wa khumbizi na wawe wahuhusi na wanyenyekevu misi zose kwa wantu wose. 3 Kwaviya aho kae swie netiwa wahezi na wesaokutegeeza na wekwagao na netiwa watumwa wa mbui za ufyaimi na mbui zose zesazokumkundisa Muungu. Nee tikekaa mwe makwasukwasu na kinyuu, wantu nee wakatikima na swie tikawakima wao. 4 Akini wedi na ukundiso wa Muungu Mwoohozi wetu wekugubulwao, 5 nee katiohoa na khio kwaajii digosoa dedi dodose iya ni kwa mbazi zakwe kwembokea Muye wa Muungu ekutijaiaye kuvyaigwa uhya. 6 Muungu katekha Muye wa Muungu kwembokea Yesu Klistu Mwoohozi yetu, 7 ili kwa wedi wakwe kuzumiwa hemeso ya Muungu na tiwe wapazi wa ugima wa kae na kae tiukauwiao. 8 Mbui inu ni ya kwei.

Naonda ugombeke muno, ili wada wamzumiao Muungu watozeeze kugosoa yedi, mbui izo ni ntana na zina uwambiizi mkuu kwa wantu wose. 9 Akini ekaeni hae na uhigani wa kihezi na uhigani wa kutanga mazina ya muango na khumbizi hamwe na mahigano ya miko ya Msa, mbui izi khazina mwengizo wowose naho ni za bue. 10 Mhaze maa mbii mntu atendae wantu wabadane, akaendeea ekana nae. 11 Wamanya mntu inga uyo kaga muno, na mavigaviga yakwe yaonyesha kuwa keamuia.

12 Bada ya kumwaagiia Alitema au Tikiko kwako, gosoa kinyio weze hangu hanu Nikopoli, kwaajii khiamua kwekaa uku kisingi cha msimu wa pheo. 13 Fundana kumwambiiza Zenasi mntu wa miko na Apolo ili wadahe kuvoka ntambo yao na uwone kuwa wana kia kintu wakundacho. 14 Yakundigwa wantu wetu wahinye kwekaa kwa kugosoa yedi ili walavye uwambizi mwe vintu vikundigwavyo, wasekwekaa wekazi wesaokuwa na uwambizi kwa watuhu.

15 Wantu wose wekuwao hamwe na mie wakuugusa. Wauguse wantu wose wada watikundisao mwe uzumizi.

Mboto ya Muungu iwe hamwe nanywi nyose.