1 Bauwa inu yalawa hangu miye Paolo mfungwa kwaajii ya Klistu Yesu, na kulawa kwa ndugu yetu Timoseo.

Nakuandikia wee Filemoni mmbuya, mndima mwezwetu, 2 kwa Afiya umbu detu na Alikipo asikai mwezwetu mwe uzumizi, na zumwezumwe da wantu wamzumiiao Klistu dikintanado mwe nyumba yako.

3 Tawakundieni wedi na uivanisi kulawa kwa Muungu Tati yetu na kwa Zumbe Yesu Klistu.

4 Misi yose nivikaho nakukumbuka wee Filemoni na kumtogoa Muungu, 5 kwaviya nategeeza mbui ya uzumizi wako kwa Zumbe Yesu Klistu na ukundiso wako kwa wantu wekuikwao kwaajii Muungu. 6 Nakuvikia ili uzumizi uwo tekuaho hamwe na swie ukudahize kumanya muno majaiwa yose tihokeayo tiwaho hamwe mwe Klistu. 7 Ndugu ukundiso wako unietea nyemi khuu na kunekha moyo muno! Nawe kuisangaaza mioyo ya wantu wekuikwao kwaajii ya Muungu.

8 Kwaivyo hata inga nee khikuagiia mwe Klistu ugosoe ikundigwavyo, 9 akini kwaajii nakukundisa, ni ebae muno nikuombeze. Nagosoa ivi etiho mie Paolo ni mdaa naho ni mfungwa kwaajii ya Klistu Yesu. 10 Nakuombeza kwaajii ya Onesimo, ambae ni inga mwanagu mwe Klistu kwaani khiwa tati yakwe wakimuye nikawa mwe kifungo. 11 Aho kae Onesimo nee khekukufaa akini isasa akufaa wee na mie viavia.

12 Isasa namuagiia kwako, kwaviya namkundisa kwa moyo wangu wose. 13 Nee khikunda ekae hamwe nami hanu aniambize badala yako kisingi niwaho mwe kifungo kwaajii ya Mbui Yedi. 14 Akini shekukunda kugosoa chochose kwesaho uhusa yako. Khikunda kukushuutiza uniambize, kwani wedi wako wakundigwa kulawana na ukundavyo wee mwenye na khio kwa kushuutiza.

15 Yadahika Onesimo nee kahauka kwako kwa kisingi kijihidu, ili udahe vituhu kuwa nae misi yose, 16 yee khio inga mtumwa, iya ni mtana muno kusima ya mtumwa. Yee ni ndugu mkundiswa, ni wa mana muno kwangu mie na kwako endaawe yedi muno, inga mtumwa na ndugu mwe Zumbe.

17 Ivyo, ikawa wanimanya mie kuwa ni mwezwako mwe Klistu, mhokee inga viya wekunihokeavyo mie mwenye. 18 Inga nekawa kakugosweea kintu kifyaimi hambu nekawa na deni dako, nendaniihe bada yakwe. 19 Naandika mbui inu mie mwenye. Mie Paolo nendaniihe. Vituhu khina haja ya kugombeka wee unado deni kwangu. 20 Haika ndugu yangu naombeza nigosoea mbui inu kwaajii ya zina da Zumbe. Moyo wangu wekhe nyemi inga ndugu mwe Klistu.

21 Naandika nakukauwiia kuwa wendaunizumiie, naho namanya kuwa wendaugosoe hata kutendesa yada nikuombezayo. 22 Hamwe na ayo niikia hantu ha kugona kwaani nazumiia kwa miviko yenu, Muungu endaanijaie niwavuie.

23 Epafula ekuwae mwe kifungo hamwe na miye kwaajii ya Klistu Yesu, akuugusa. 24 Wandima wezwengu Maliko na Alisitaliko na Dema na Luka wakuugusa.

25 Nawakundieni nywie nyose mboto ya Zumbe Yesu Klistu.