1 Muungu katamwiiya maa nyingi na mababa zetu kwembokea waoni, 2 akini mwe misi izi za kisiikizi kagombeka na swiswi kwembokea Mwanawe, kwa kwemboke uyo mwanawe Yesu Muungu kagoso inusi, akasagua vintu ivyo vyose viwe vyakwe. 3 Yee ating'azia ukuu wa Muungu na aonyesha viya Muungu eivyo, asababisha vintu kutozana hamwe inga vyeivyo kwa Mbui yenye udaho. Ekubindaho kuwazingua na kuwausia wantu mavigaviga, akaita kwekaa mkono wa kuume wa Muungu mwekuwae uwanga wa vyose.

4 Ivyo Mwana kagosolwa mkuu kusima wandima wa uwanga kwa Muungu na zina dakwe ekwekhigwado ni Muungu ni kuu kusima mazina yao. 5 Kwaviya Muungu khekumgombekea ata yumwe wa wandima wakwe wa uwanga kwa Muungu kuwa,

"Weye nee mwana yangu

Ivyeo mie khiwa Tati yako."

Naho khekutamwiiya kwa mndima yoyose wa uwanga kwa Muungu,

"Miye nendaniwe Tati yakwe,

Nae endaawe mwanayangu."

6 Nae Muungu ekumuetaho mvyaigwa yakwe wa bosi mwe inusi agombeka,

"Wandima wose wa uwanga kwa Muungu wamvike."

7 Akini kwa mbui ya wandima wa uwanga kwa Muungu, akagombeka

"Khiwatenda wandima wangu wa uwanga kuwa pheho,

Na wandima wangu kuwa miale ya moto."

8 Akini Muungu kagombeka ivi kwa mbui za mwanawe,

"Eee Muungu Useuta wako wendawekaise misi zose zesazo kuwa na kisiikizi!

Wendauwongowee wantu wako kugosoa viya vikundigwavyo.

9 Kukundisa mbui zikundigwazo na wakimwa na makwasukwasu.

Nee mana Muungu, Muungu yako kakusagua wee, na kukusisa mavuta matana ili uwe mkuu.

Na kwekhigwa nyemi na ntunyo,

kusima wezio wose."

10 Naho agombeka,

"Wee Zumbe aho bosi nee mwekuumba inusi,

Naho wee nee mwekugosoa uwanga kwa Muungu.

11 Izo zose zendazage iya wee wendawekaise,

Yose ayo yendayasakae inga magwanda.

12 Wendauzizingezinge inga koti dekusakaado,

Na zendazihitulwe inga magwanda.

Iya wee ni yudayuda,

Na myaka yako khaina kisiikizi."

13 Akini ni mndima yuhi wa uwanga kwa Muungu ekumgombekae ekaa mkono wangu wa kuume adi nendaho niwaike wamasa wako asi ya uwongweezi wako.

14 Wandima wa uwanga kwa Muungu wakina ndai? Ni ziya muye ambazo zigosoazo ndima ya Muungu, na kuwagiiwa kuwaambiza wada wantu wahokeao uwohozi.