1 Kwaviya Miko ya Msa ni kizui du cha vintu vyedi vyendavyovyeze na wala khio mbui zenye. Kwaajii inu khaidahika katu kwa sia ya miviko ilavigwayo kiya mwaka khazidaha katu kuwazingua wantu wamvikao Muungu. 2 Inga wantu ao wamvikiao Muungu ati newawa wasuntwa mavigaviga yao kwei nee khawekwendeea kweona vituhu kuwa na mavigaviga na ntambiko izo zose nee zibadwa. 3 Iya kwa sia ya ntambiko zia wantu wakumbuswa masa yao kia mwaka. 4 Kwaviya khaidahika phome ya njeku na vuata kuwausia wantu mavigaviga.

5 Kwaivyo Klistu ekwezaho mwe inusi nee kagombeka,

"Ntambiko na malavyo khwekuzikunda

Iya mwii kuniikia."

6 Malavyo ya kokwa

Na malavyo ya kuusa mavigaviga khwekuagizwa nazo.

7 Nee nekugombekaho, "Eeh Muungu kauwa nihanu,

Sheza kugosoa viya wekukundavyo

Inga nekuandikiwavyo mwe kitabu cha miko."

8 Aho uwanga akavoka kugombeka, "khukunda wala khutamiwa na ntambiko na malavyo ya kokwa na zakuusa mavigaviga." Kagombeka ivyo etiho malavyo ayo yose yalavigwa inga miko ikundavyo. 9 Naho akagombeka, "Niaha, sheza kuyagosoa yada uyakundayo." Ivyo Muungu akausa ntambiko zose za bosi na akaika ntambiko ntuhu mwenga. 10 Kwaviya Yesu Klistu nee kagosoa yada Muungu ekuyakundayo, swie tizingulwa mavigaviga yetu kwa ida ntambiko ya mwii wa Yesu Klistu ekuulavyao maa mwenga du.

11 Kia Mviki wa kiyahudi akagosoa ndima yakwe ya kuvika kia msi na kulavya malavyo yadayada maa nyingi, ntambiko ambazo khazidaha kuusa mavigaviga. 12 Akini Klistu kalavya ntambiko mwenga kwaajii ya mavigaviga, yenye udaho wa kugosoa ndima misi yose kwesiho kisiikizi, naho akekaa phande ya kuume ya Muungu. 13 Tangia kisingi icho agoja adi wamasa wakwe waikwe asi ya miundi vyakwe. 14 Kwaviya Klistu nee kelavya kuwa ntambiko maa mwenga, kawazingua mavigaviga na kuwatenda muwe wantu wakwe misi yose kwesiho kisiikizi.

15 Nae Muye wa Muungu viyaviya atigombeka mbui inu. Bosi agombeka,

16 "Idi nee Agane dangu nendadonigosoe nao

Bada ya misi izo, agombeka zumbe.

Nendaniike Miko mwe mioyo yao

Na kuziandika mwe akii zao."

17 Naho aomea kugombeka, "Khinanikumbuke vituhu mavigaviga yao, wala mbui zao za ubanasi." 18 Na mavigaviga yakabinda kuusigwa khakuna haja vituhu ya kulavya ntambiko za kuusa mavigaviga.

19 Naho, wandugu kwa phome ya Yesu khatiogoha vituhu kwengia Hantu Hang'azi. 20 Yee kativugwiiya sia mphya, sia ya ugima kwembokea dia pazia yaani mwii wakwe. 21 Tinaye Mviki Mkuu agookeae Nyumba ya Muungu. 22 Kwaivyo timtimie hehi Muungu kwa mioyo mitana yekumzumiiyao kwei, tukawa na mioyo yekuzingulwayo kulawana na mamakhanyi za ufyaimi za miili yetu na ikawa isuntwa na mazi matana. 23 Titozeeze kwei kauwiyo tidizumiado na tidigombekado, kwaviya Muungu mwekugosoa kiaga chakwe khahituka. 24 Naho takundigwa tigeane moyo ili tikundisane na kugosoeana yedi swie kwa swie. 25 Naho tesekubada kukintana hamwe inga yekuwavyo mazweeya ya wantu watuhu, iya tigeane moyo na kutendesa kugosoa ivyo kwa kadii muonavyo msi uda wa Zumbe kuwa uhehi.

26 Kwaviya tikaendeea kugosoa mavigaviga kwa makusudi bada ya kuumanya ukwei, khahana ntambiko ambayo yendayoilavigwe vituhu kwaajii ya kutiusia mavigaviga, 27 na kuigoja kwa kuogoha uwamuiyo wa Muungu na moto mkai wendaouwadagamize wantu wose wamuemeao Muungu. 28 Mntu yoyose mwesae kuutongea Mwiko wa Msa ekwekhigwao na Muungu, endaakomwe kwesiho mbazi ikaoneka kuna ugombekaji wa wantu waidi au watatu. 29 Mwamamakhanyani ivi mntu yuda ambeae Mwana wa Muungu na kweona kuwa phome ya agane da Muungu yekumzinguayo khio kintu, na amdumuaye Muye wa Muungu mwenye kueta mboto endaagewe sugusa? 30 Kwaviya tamanya kuwa Muungu kegombeka, "Ndima ya kuhiiza ni yangu, mie nendaeniize." Viyaviya kagombeka, "Zumbe endaawaamuie wantu wakwe." 31 Ni mbui ya kutisa kukintana na uwamuiyo wa Muungu ekuwae mgima.

32 Kumbukani misi zia za bosi mwekuvokaho kumzumia Klistu, etiho nee mpatwa na masuumizi akini mzizimiza. 33 Maa ntuhu mdumulwa na kugewa soni hemeso ya wantu, kisingi kituhu nemuwa mkiwaaambiza wada wekusuumizwao inga nywie. 34 Mana muwafiya mbazi wada wekuwao mwe kifungo, naho mkevana kwa nyemi kuhokwa vintu vyenu, uku mkamanya kuwa mwe mioyo yenu mwendamwekhigwe vintu vyekuwavyo vyedi muno na vya misi zose kwesiho kisiikizi. 35 Ivyo msekwaza utintimavu wenu kwaviya una funge khuu kulawa kwa Muungu. 36 Mwakundigwa kuzizimiza ili mkabinda kugosoa yada akundayo Muungu mwekhigwe kia ekuikacho kiaga. 37 Inga yagombekavyo Maandiko,

"Kusigaa kisingi kidodo du

Na yuda ezae endaeze,

Wala khanaacheewe.

38 Iya mntu yangu mgosoa yada nikundayo endaekaise kwa kunizumiia mie,

Nae ati akawa na khanga nikude na khanga nikueke,

Khina niwe na nyemi nae."

39 Akini swie khatimo inga wantu wabadao kumbasa Muungu na kwaga, iya tihamwe na wantu wamzumiao Muungu na kuoholwa.