1 Naho, tiyabade yada mahinyo tekuhinywayo tekuwaho khatimanya dodose mwe Mbui ya Klistu, tiendeee na mahiyo yada yekutintimayo na khio kwa kuika msingi wa kutamwiiiza kuekana na wekaisi wesaokumtamiza Muungu na yada mahinyo yakugombeka mbui za kumzumiia Muungu, 2 na mahinyo ya ubatiizi na kuwaombea kwa kuwaikia wantu mikono na ya kuyuyuka kwa wekuuyao na nyuma na uamuiyo wa misi yose wesaokuwa na kisiikizi. 3 Kwakugosoa ivyo tendatiendee kudahaa na kukua mwe kuzumiia Muungu akitijaiya.

4 Kwaviya wantu ambao wabinda kae kumanya ukwei wa Muungu na wada wekuhokeao vintu vitana kulawa uwanga kwa Muungu kwa sia ya Muye wa Muungu. 5 Wamanya vitana Mbui ya Muungu kuwa ni ntana na viyaviya wamanya vitana udaho wa uwongoezi wa Muungu mwe inusi yezayo, 6 na wantu ao wakabada uzumizi wao khaidahika kuwatenda wahituke na kubada mavigaviga, kwaviya wamgong'ondea he mhamba Mwana wa Muungu vituhu, na kumgea soni hewazo.

7 Sanga ihokeayo fua maa kwa maa yalavya khande na yaeta yombe kwa muimi na sanga iyo ijaiwa ni Muungu. 8 Iya iyo sanga ikalavya miwa na mainde khaina iwe na yombe, yawa hehi na kubadiwa lazi ambayo kisikiizi chakwe ni kudagamizwa kwa moto.

9 Nywie wambuya zangu, etiho kiwaandikia kwa tamwiizi zitogazo, ata ivyo namanya kwei kuwa mwagosoa yedi yaonyeshao kwei muoholwa. 10 Kwaviya Muungu ni yedi, khanaaijae ndima yenu na ukundiso wenu mwekuonyeshao kwaajii yakwe mwe kuwaambiza wantu wakwe, naho mwaendeea kuwaambiza. 11 Hovu detu nikuwa kia yumwe yenu aendeea kuonyesha bidii adi kisikiizi, ili yada muyakauwiiayo yadahe kuigania. 12 Ivyo msekweza mkawa wabwa, iya muwe inga wada wazumiiao na wenye uzizimizi, wakahokea yada Muungu ekuwaikiayo kiaga.

13 Muungu ekumwekhaho Ibulahimu kiaga chakwe nee kaaha kwa zina dakwe mwenye, kwaviya khahekuwaaho mtuhu ekuwae mkuu kusima yee, ambae nee kadaha kuaha kwa zina dakwe ivyo Muungu nee kaaha kwa zina dakwe mwenye. 14 Muungu akagombeka, "Haika nendanikujaiye na kukwekha uvyazi mwingi. 15 Naho Ibulahimu azizimiza na ivyo akahokea kia ekuikiwacho kiaga na Muungu." 16 Kwaviya wantu waaha kwa yee mwekuwae mkuu kusima wowo na kiaga icho kigenyea kwa kia chekugombekwacho na kubinda mahigano. 17 Naye Muungu nee katintimaza kiaga chakwe kwa kiaho; na kwaajii iyo kawaonesha pwii wada wekuekao kiaga endaahitue nia yakwe. 18 Muungu kagosoa vintu ivi viidi ambavyo ni kiaga na muma, ili atigee moyo swie ambao timemguukia ili tuditoze kauwio da mbui zezazo. 19 Tinado kauwio ido dekuwado tintimavu na kuinda mioyo yetu inga kigomogomo kitozavyo mei. Kauwio ido dengia adi hantu hada hekuikwaho kwaajii ya Muungu uko uwanga kwa Muungu. 20 Hantu ambaho Yesu nee kaongoa kwengia kwaajii yetu, kawa Mviki Mkuu wa misi zose zezazo kuwa na kisikizi inga ekuwavyo Melikizedeki.