1 Kwaviya kiaga cha kwengia mwe hantu hakwe ha hakuumuiza ikeaho, tikauwe yumwe yetu asekweza kuvotwa kwengia. 2 Kwaviya Mbui Yedi ibiikiwa inga via yekubiikiwavyo kwa ao wantu wakae. Akini mbui iyo khayekuwaambiza dodose, kwaviya waitegeeza akini khawekuihokea kwa uzumizi. 3 Mana swie tekuzumiiyao tendatengie he kuhumwiiza diya inga via Muungu ekugombekavyo,

"Inga nekuaahavyo kwa maya yangu,

Khawanawengie mwe hantu hangu ha kuhumwiiza!"

Etiho ndima zakwe Muungu nee ziigania kuvokea ekugosoaho inusi. 4 Maandiko Mang'azi hana hantu hagombeka kuusu msi wa mfungate, "Muungu ekubindaho ndima zakwe zose mwe msi wa mfungate, akahumwiza." 5 Hantu aho kuandikwa vituhu, "Khawana wengie katu hantu hangu ha kuhumwiza." 6 Ivyo icho kiaga cha kwengia kiaho kwaviya wada wekubiikiwao Mbui Yedi aho kae nee wavotwa kwengia kwaajii ya kwa kutokukubali kwao. 7 Muungu nee kaika msi mtuhu akawetanga, "ivyeo." Yekwembokaho Myaka mingi akagombeka kwembokea Daudi kwa mbui zekugombekwazo.

"Inga mkategeeza mgutio wangu ivyeo

Msekuitenda itoge mioyo yenu."

8 Inga Yoshua ati nee akawatenda wantu wahumwize inga viya Muungu ekuwekhavyo kiaga, Muungu khekuwa agombekee vituhu mbui ya msi mtuhu. 9 Kwa ivyo kusigaa msi wa kuhumwiiza kwa wantu wa Muungu. 10 Kwaviya kia engiae hantu ha kuhumwiza, endaahumwiize kulawana na ndima yakwe inga via Muungu ekuhumwiizaho ekubindaho ndima zakwe. 11 Tigosoe kia tidahavyo kwengia mwe kuhumwiza uko, ili asekulawiya mntu yoyose mwe wamwe wetu endaeaemee kutegeeza inga wekugosoavyo watuhu.

12 Kwaviya Mbui ya Muungu ina ugima na ina udaho naho ni kai kusima paange disengado kosekose. Naho datunga ata kupanga moyo na muye na vimamo na mzumo yeumo ndani yakwe. Vituhu dina umanyi kwa yada ambayo moyo yamamakhanya na wakunda kugosoa. 13 Khahana kiumbe chochose chekwefisacho hemeso ya Muungu. Kia kintu kigubulwa na kuikwa pwii hemeso yakwe, kwa yee tendatikundigwe kulavya taazia kwa mbui zetu.

14 Kwaviya tinae Mviki Mkuu kusima wose ekwengiae uwanga kwa Muungu uyo Yesu Mwana wa Muungu, ivyo tigooke kwa utintimavu kwa kia tizumiacho na kukibiikia. 15 Tinae Mviki Mkuu kusima wose amanya usokezi wetu, yee mwenye kageezwa mwe sia zose inga swie, akini khekugosoa mavigaviga. 16 Kwaajii inu tikitimie hehi kigoda cha mbazi cha Muungu ili tihokee mbazi na wedi wa Muungu vitambize mwe viya tikundavyo.