1 Ivyo wandugu zangu, wantu wa Muungu mwekwetangwao muwe wana wa Muungu, mamaakhanyani uyo Yesu Muagiiwa na Mviki Mkuu wa uzumizi tiugombekao. 2 Uyo kawa mzumiiwa kwa Muungu mwekumsagua kugosoa ndima yakwe inga via Msa, ekuwavyo mwe nyumba yose ya wantu wa Isilaeli. 3 Akini Yesu akundigwa kuhokea ntunyo khuu kusima Msa, inga viya mzengi wa nyumba ahokea ntunyo itendesayo kusima iyo nyumba yenye. 4 Kwaviya kia nyumba yazengwa na mntu, akini Muungu nee mgosozi wa kia kintu. 5 Msa nekawa mkwei mwe kia kintu na kugombeka mbui ziya ambazo Muungu nee endaagombeke kisingi chezacho. 6 Akini Klistu yee ni mwana mzumiiwa ambaye agookea wantu wa nyumba ya Muungu na swie nee wantu awo inga tindatitendese kuwa wantintimavu na kwevunia mwe mbui ziya tikauwiazo.

7 Kwa ivyo inga Muye wa Muungu ugombekavyo,

"Inga mkautegeeza mgutio wakwe ivyeo,

8 Mwesekuigosoa mioyo yenu itoge,

Inga wekugosoavyo mababa zenu kisingi kia wekuwaho wanigeeza kuda mwe kiwawe.

9 Uko nee mababa zenu wanigeeza na kunihima,

Etiho waona yada nekugosoayo kwa kisingi cha myaka makumi mane.

10 Kwaajii iyo nikakimwa na kivyazi icho, naho nikagombeka,

‘Wantu awa wana makwasukwasu na misi yose,

Khawakunda kubasa sia zangu.’

11 Ivyo nee nakimwa na nikaaha,

‘Khawana wengie mwe si ambayo nendaniwekhe wahumwiize!’"

12 Wandugu zangu ekauweni asekuwaaho yumwe yenu mwenye moyo mfyaimi na kutokuzumiiya na kwekaa hae na Muungu mwenye ugima. 13 Akini ambizaneni kwa kia msi wetangwao "Ivyeo" ili yumwe asekuwa na moyo utogao na kutiiwa na mavigaviga. 14 Kwaviya swie twatozana na Klistu inga tikatozeezana na kauwio detu tekuwado nado aho bosi.

15 Inga Maandiko yagombekavyo,

"Ati mkategeeza mgutio wakwe ivyeo,

Mwesekuitenda mioyo yenu itoge, inga via wekutendavyo mababa zenu

Hada wekumbadaho Muungu."

16 Awo ni wahi wekumtegeezao Muungu na kumbada? Niwada wose wekuongoewao na Msa kulawa Misili. 17 Naho ni wahi ambao wamgea maya Muungu myaka makumi mane? Ni wada wose wekugosoao mavigaviga na vimba vyao vimwaganika kuda he kiwawe. 18 Muungu ekuahaho, "Khawana wengie hantu hakwe," nee akawagombekea wakina ndai? Nee awagombekea wada wekumbadao. 19 Ivyo khawekudaha kwengia kwaajii khawekuzumiiya.