1 Mbui tiigombekayo ni inu tinae mviki mkuu ambae kekaa he mkono wa kuume wa kigoda cha kae cha useuta cha Muungu Mkuu. 2 Uko agosoa ndima ya Uviki Mkuu mwe tweya da uwanga kwa Muungu ambayo ni pang'azi muno hakuvikia, yekuzengwayo na Zumbe na khio mntu.

3 Kia Mviki mkuu kasagulwa ili alavye malavyo na ntambiko. Viyaviya Mviki Mkuu yetu akundigwa awe na kintu cha kulavya. 4 Inga Yesu nee kaendeea kwekaisa hanu mwe inusi nee khekuwa mviki katu, kwaani wauko waviki watuhu walavyao malavyo kutongeana na miko ya Msa ekwekhigwayo ni Muungu. 5 Wagosoa ndima ya uviki msimo wa kizui cha mbui za uwanga kwa Muungu. Msa ekuwaho yutayali kuzenga tweya nee kagombekwa ni Muungu, "Haika ugosoe kia kintu saasawa na kia wekuonyweshwacho kuda uwanga ya muima." 6 Akini isasa Yesu kekhigwa ndima ya Uviki wekuwao wedi muno kusima wowo, inga via yee ekuavyo mwivanisi wa Agane dekuado dedi muno kusima dia da kae, nado digooka mwe msingi wa viaga vyekuavyo vyedi muno.

7 Kwaviya ati nee khadina mapungufu mwe Agane da bosi nee khahekuwa na haja ya kuondeza Agane da kaidi. 8 Akini Muungu kawahaza wantu, nae akagombeka,

"Misi yeza amba Zumbe

Nendahonitende Agane dihya na wantu wa Isilaeli na wantu wa Yuda.

9 Khadinadiwe inga Agane dia nekuagana nawo mababa zao.

Mwe misi ida nekuwaongweyaho vitana niwalavye mwe si ya Misili.

Kwaviya khawekuditongea Agane dangu.

Miye nami nchekuwapatiiza agombeka Zumbe.

10 Zumbe agombeka idi nee Agane nendadonigosoe na wantu wa si ya Isilaeli

Mwe misi zezazo

Nendaniike Miko yangu mwe akii zao.

Na kuziandika mwe Mioyo yao.

Mie nendaniwe Muungu yao,

Nao wendawawe wantu wangu.

11 Mntu khanaamhinye vituhu mweziwe,

Wala mntu khanaamhinye nduguye na kumgombekea,

‘Mmanye Zumbe.’

Kwaajii wose wendawanimanye mie,

Kuvokea mwekuwa mdodo wa wose adi mwekuwa mkuu muno.

12 Kwaviya nendaniwaekee masa yao

Naho khina nikumbuke mavigaviga yao."

13 Kwa kudetanga Agane idi dihya Muungu kagosoa dia Agane da bosi kuwa disakaa, nacho kintu chochose cha kae kikavoka kusakaa kintu icho kihehi na kwaga.