1 Uyu Melikizedeki nekawa Seuta wa mzi wa Salemu na viyaviya nekawa mviki wa Muungu mkuu muno, ekukintanaho na Ibulahimu ekuwaye auya kulawa mwe khondo ambaho nee kawakoma maseuta wane, Melikizedeki akamjaiya Ibulahimu, 2 nae Ibulahimu akamwekha hantu hakumi dimwe ya kia kintu ekulawanacho uko kwe khondo. Mana ya bosi ya zina ido Melikizedeki ni Seuta wa akundavyo Muungu viyaviya Seuta wa Salemu mana yakwe Seuta wa uivanisi. 3 Khahana amanyae tati yakwe na mami yakwe wawa wakina ndai na walawia kuhi. Na khahana amanyae kavyaigwa ini na kauya na nyuma ini. Melikizedeki ni inga Mwana wa Muungu kwa via misi zose endaawe Mviki.

4 Mmaakhanyani mntu uyu ekuwavyo Mkuu, ambae Ibulahimu tati yetu nee kamwekha hantu ha kumi dimwe ya vintu ekudoavyo kulawa mwe khondo. 5 Tamanya kuwa kutongeana na miko, uvyao wa Lawi ambao watendwa kuwa waviki nee wakundigwao kuhokea hantu ha kumi dimwe kulawa mwa wandugu zao etiho viyaviya wowo ni uvyao wa Ibulahimu. 6 Akini Melikizedeki khekulawa mwe uvyao wa Lawi, etiho nee kahokea hantu ha kumi dimwe kulawa kwa Ibulahimu, naho akamjaiya Ibulahimu mntu ambae nee kahokea kiaga kulawa kwa Muungu. 7 Khahana matumatu ata maa mwenga, kuwa alavyae majaiwa ni mkuu kusima yuda ekhigwae majaiwa. 8 Naho awo waviki wahokeao hantu ha kumi dimwe ni wantu ambao wauyao na nyuma, akini hanu ahokeae hantu ha kumi dimwe, yaani Melikizedeki yagombekwa yee khauya na nyuma. 9 Tadaha kugombeka kuwa Lawi ambae wantu wa muwango wakwe kuhokea hantu ha kumi dimwe, naye nee kalavya hantu hakumi dimwe kwa Melikizedeki kwembokea kwa Ibulahimu. 10 Kwaajii Melikizedeki ekukintanaho na Ibulahimu, Lawi nee khazati kuvyaigwa, ila nee kawa mwe kigudi cha baba yakwe Ibulahimu.

11 Waisilaeli nee wekhigwa miko ya Msa na miko iyo nee zalawana na uviki wa Walawi. Akini ata ivyo uviki khaukuigania, ivyo ikakundigwa weze uviki mtuhu inga via Melikizedeki ambao khauho inga uviki wa Haluni. 12 Kwaviya yalawiiyaho mahituko ya uviki, viyaviya nayo miko yakundigwa ihituke. 13 Naye Zumbe ambae mbui izo zose zagombekwa uwanga yakwe, nekawa mtu wa mbai ntuhu na khahana mtu wa mbai yakwe mwekugosoa ndima ya uviki mwe ingo. 14 Yamanyika pwii kuwa yee kavyaigwa mwe mbai ya Yuda amabado Msa khekuditaja ekuwaho agombeka uwanga ya Waviki.

15 Kwaviya mbui inu imanyika pwii kuwa Mviki mtuhu ekuwaye inga Melikizedeki kalawiiya kae. 16 Yee khekutendwa mviki kwa miko na miagiiyo ya wantu, iya nee kawa mviki kwa udaho wa ugima wakwe wesaokuwa na kisikiizi. 17 Kwaviya Maandiko yagombeka "Weye nee mviki wa misi zose zesazo kuwa na kisiikizi kutongeana na uviki wa Melikizedeki." 18 Ivyo mwiko uda wa kae kuusu uviki iusigwa kwaajii neuwa usokea naho khauna ndima. 19 Kwaviya miko ya Msa ekwekhigwayo na Muungu khayokutenda kintu chochose kiiganie. Akini isasa tietewa kauwio dedi ambado datieta hehi na Muungu.

20 Kisingi Walawi waikwa kuwa waviki khahokuwa na muma wowose, akini hanu kuna muma wa Muungu. 21 Akini Yesu neekatendwa Mviki kwa muma, hada Muungu ekumgombekavyo,

"Zumbe kaaha,

Nawala khana ahitue mamaakhanyi zakwe,

Weye ni Mviki wa misi zose zesazo kuwa na kisiikizi."

22 Kwaajii ya muma unu, Yesu kaonyesha ukwei wa diagane dekuwado dedi muno kulawa kwa Muungu kwaajii ya wantu wakwe.

23 Kwaviya waviki watuhu nee wawa ni wantu du, ivyo kisingi chao chekubuacho cha kuuya na nyuma wekubuwaho wakauya na nyuma, ili wasekuendeea na ndima zao inu nee mana wawa wangi. 24 Akini Yesu ekaisa misi zose zesazo kuwa na kisiikizi, na uviki wakwe khausia. 25 Kwajii iyo Yesu adaha kuwaohoa wada wezao kwa Muungu kwa kwembokea yee kwaajii yee ekaisa misi zose zesazo kuwa na kisiikizi ili awavikie.

26 Ivyo Yesu nee Mviki Mkuu timkundae, yee khana mavigaviga, wala masa yoyose, Muungu nee kambahuwa kulawa kwa wata mavigaviga na akamkweza uwanga kwa Muungu. 27 Yee nee kawa tofauti na waviki watuhu, khekuwa akalavya ntambiko kia msi kwa kuvoka kulavya ntambiko kwaajii ya mavigaviga yake mwevye akabinda aho kwaajii ya mavigaviga ya wantu watuhu. Yee kagosoa ivyo maa mwenga du, kwaajii ya mavigaviga ya wantu wose, ekwelavyaho yee mwenye na iyo khaiuiwa vituhu. 28 Akini kwa kutongea miko ya Msa ekwekhigwayo na Muungu, wantu waikwa kuwa Waviki Wakuu nee watenda mavigaviga. Akini baadae kwa muma Mungu kamsagua Mwana awe Mviki Mkuu ambae ni khana masa misi zose.