1 Kia Mviki Mkuu mwekusagulwa kulawa gatigati ya wantu kaikwa kwaajii ya wantu mwe mbui zimhusuzo Muungu ili adahe kulavya ntambiko na malavyo yose kwaajii ya mavigaviga ya wantu. 2 Mviki mkuu anaweza kuwaonea mbazi wantu wagosoa mavigaviga bila kumanya kwamba yee nae ni mtenda mavigaviga. 3 Kwaajii iyo akundigwa kulavya ntambiko kwaajii ya mavigaviga yakwe mwenye na viavia kwaajii ya mavigaviga ya wantu watuhu. 4 Khahana mtu esaguaye yee mwenye kuwa Mviki Mkuu, kwani kia yumwe asagulwa na Muungu kuwa Mviki Mkuu inga Haluna ekusagulwaho.

5 Viavia Klistu khekwedoea yee mwenye ntunyo ya kuwa Mviki Mkuu, iya Muungu nee kamwamba,

"Weye ni Mwanangu,

Ivi yeo khiwa Tati yako."

6 Inga agombekavyo hantu hatuhu, "Weye ni Mviki wa misi yose, mwe ndima ya Mviki Melikizedeki." 7 Yesu mwe wekaisi wakwe hanu he inusi, nee kawa akivika na kumuombeza Muungu kwa kuiya kwa mesozi ekuwae na udaho wa kumwohoa na ufe, kwaajii nee akamntunya muno Muungu. 8 Etiho yee ni Mwana wa Muungu kehina kutegeeza kulawana na masuumizo ekupatayo. 9 Ekuiganywavyo akawa chando cha uohozi wa misi yose na kwa wantu wose wamtegeezaho, 10 nae Muungu kamuika kuwa nee Mviki Mkuu inga ekuwavyo Melikizedeki.

11 Tinayo mangi ya kugombeka mwe mbui inu, akini vyatoga kuwatamwiizia, kwaajii nywie khio wekuhuhao kuva. 12 Kisingi iki nee mkakundigwa kuwa wahinyi akini bado mwamkunda mntu wa kuwahinya vituhu mahinyo ya bosi ya mbui ya Muungu, baada kukunda kuda khande itogayo, ivyo mwakunda kokha mee. 13 Mntu yoyose ekaisae kwa kokha mee uyo yuke mwana mteke kwaviya khamanya yahi ni yedi na yahi niyaufyaimi. 14 Akini wekudahaao nee wadao khande itogayo na kuhinywa kumanya yekuwayo yedi na mafyaimi.