1 Endeeani kukundisana inga ikundigwavyo kwa wantu wamzumiiyao Klistu. 2 Mwesekujaa kuwahokea wageni mwe kaya zenu, mana kwa sia inu watuhu wahokea wandima wa uwanga kwa Muungu kwesiho kumanya. 3 Wakumbukani wada wekuwao mwekifungo inga viya mfungwa hamwe nao, naho wakumbukani wada wasuumizwao, inga viya ninywi mwasuumizwa hamwe nao.

4 Ndoza na itunywe na wantu wose wavyee na wagosi mwakundigwa kuwa wazumiiwa, kwaviya Muungu endaawekhe sugusa wakianga na wagonao na wakaza wantu.

5 Mwesekuwa wantu wakukundisa hea toshekani na viya vintu mwekuwavyonavyo, Muungu mwenye kagombeka, "Khina nikubade naho khunauhungukiwe." 6 Nee mana tadaha kugombeka kwa untintimavu,

"Zumbe nee mwambizi yangu

Khinaniogohe.

Mntu endaanitende mbwai?"

7 Msekuwajaa wagookezi wenu wekuwahinyao Mbui ya Muungu. Kumbukani viya wekwekaisavyo na kuuyananyuma na kutomgea kuzuiia kwao. 8 Yesu niyee yuda zana na ivyeo na misi yose kwesiho kisiikizi. 9 Mwesekuzumia mahinyo ya kigeni, kwaviya ni vyedi mioyo izumie wedi wa Muungu, naho khio kwa kutongea miko mwe khande zesazokuwa na uambizi kwa mntu yeyose azitongeae.

10 Swie tina ingo da kumvikia Muungu, na awo waviki wa Kiyahudi wekuwao wakagosoa ndima hantu hakuvikia Hakiyahudi khawekukundigwa kuda malavyo yekuikwayo uwanga ya ingo detu. 11 Mviki Mkuu wa Kiyahudi aeta phome ya wanyama kwe hantu hang'azi muno na kuilavya ntambiko kwaajii ya mavigaviga, akini nyama za awo wanyama zokwa chongoi ya khambi. 12 Ivi nee vyeivyo kwaajii ya kusuumizwa na kufa chongoi ya mzi ili awazingue kwa phome yakwe mwenye. 13 Natimtimie uko chongoi ya khambi na tibewe inga via ekubewavyo. 14 Kwaviya aha he inusi khatina mzi wendaowekaise misi zose kwesiho kisiikizi iya taugoja uda wezao. 15 Kwa kwembokea Yesu tiendeee kumlaviya Muungu ntambiko ya ntunyo ya misi zose kwesiho kisiikizi, kwaviya mbui zetu zakumtogoa yee niinga malavyo yetu timlaviiaayo. 16 Endeeani kuwaambiza wezwetu kwa vintu mwekuwavyo navyo kwaviya kwaketenda ivyo nee ntambiko yenu imtamizayo Muungu.

17 Wategeezani wawagookeao na kutoza miko zao yao wanayowagiia, wekulavywao kwaajii yenu kwesaho kuemea na wakundigwa kugombekea ndima yawo hemeso ya Muungu. Inga mkawatongea wendawagosoe ndima zao kwa nyemi, hambu khivyo wendawazigosoe kwa kufa maya, ivyo khainaiwe na yombe kwenu.

18 Mtivikie na swie. Tamanya kuwa mioyo khaizati kutionyesha kuwa tikoamasa kwamana tagosoa kiya ikungigwavyo kugosoa yedi kwa wantu wose. 19 Nawaombeza mnivikie niuye kwenu kwa haaka.

20 Muungu ambae kumyuyusa Zumbe wetu Yesu Klistu yee ndie mviki mkuu wa ngoto kwaviya kalavya phome yakwe yekuonyeshayo diagane da misi zose kwesiho kisiikizi ni dakwei. 21 Muungu awekhe udaho wa kugosoa yada akundayo. Naho agosoe mwe mioyo yenu mbui zose zimtamiazo kwasia Yesu Klistu. Yee atogolwe misi zose kwesiho kisiikizi! Pepa.

22 Ndugu zangu muwe mwayabasa maneno ya kuwagea moyo ambayo nimeyaandika mwe bauwa inu kwa ujihi, isasa wandugu zangu nawahaza mhokee kwa utana mbui inu na kuwekha moyo, inu ni bauwa njihi du nekuwaandikiiayo. 23 Nakunda mmanye ndugu yetu Timoseo kaekewa kulawa mwe kifungo, inga akeza kinyio nendaneze hamwe nae kuwavuiya.

24 Wauguseni waongoezi wenu wose hamwe na wazumizi wezwenu, Wantu wanao mwamini Yesu wa uko Italia wawaugusa.

25 Tunaombea Muungu aendelee kuwagea wedi ninywi nyose.