1 Miye Yakobo, mndima wa Muungu na wa Zumbe Yesu Klistu.

Nawaandikia nywie mbai kumi na mbii wekumwaganikao mwe si mbaimbai, nawaugusa.

2 Wazumizi wezwangu muwe na nyemi muno mpatwaho na suuba mbaimbai. 3 Kwaviya mwamanya uzumizi wenu ugeezwaho, kuzizimiza kwenu kwawagosoa kuwa watintimavu. 4 Naho mwendeee kuzizimiza adi kisiikizi, ili mdahe kuigania muno kwesiho kuhungukiwa na kintu chochose. 5 Inga yumwe yenu akihungukiwa na umanyi avike kwa Muungu nae endaamwekhe, kwaviya Muungu awekha wantu wose umanyi kwesiho ubahuzi na kwa moyo wedi. 6 Akini avikaho, akundigwa avike kwa kuzumiiya kwesiho kuwa na maatu kwaajii mntu mwenye maatu ni inga mkubwaniso wa mazimshindo, didoigwado na khusi na kwasigwa uko na uko. 7 Mntu inga uyo asekumamakhanya ati enda apate kintu kulawa kwa Zumbe. 8 Kwaajii yee ni mntu mwenye mamakhanyi mbii, mwenye khana uwamuiyo umwe mwe mbui zakwe.

9 Akini mzumizi yoyose mkiwa akundigwa awe na nyemi, kwaajii Muungu khambeya mntu uyo. 10 Na mwenye vintu vingi akundigwa kuwa na nyemi kwaajii Muungu kawatenda wawe wahuhusi. Kwaviya mwenye vintu vingi endaage inga uwa hemnda. 11 Kwaviya zua daka na kizuguto chakwe chanyaza mimea, maua yagwa na khayawa matana vituhu. Viyaviya, mwenye vintu vingi endaauye na nyuma akawa khana kintu.

12 Kajaiwa mntu yuda azizimizae kisingi cha kugeezwa kwaajii akivota ayo mageezo endaekhigwe funge ya ugima, Muungu ekuwaikiao kiaga wada wamkundisao. 13 Mntu ageezwaho asekugombeka, nageezwa na Muungu. Kwaviya Muungu khadaha kumgeeza na mafyaimi wala yee khamgeeza mtu yoyose. 14 Akini kiya yumwe ageezwa kwa kubibiizwa na kutiiwa na khwiina zakwe fyaimi. 15 Khwiina ikatendesa yamtenda mntu agosoe mavigaviga naho mavigaviga yakatendesa yaeta ufe.

16 Wandugu zangu niwakundisao, mwesekutiiwa. 17 Kia kintu kilavigwacho chekuwacho chedi na chekuiganiacho chalawa uwanga kwa Muungu, kulawa kwa Tate mwekuumbae ung'azi wose ya uwanga, ambae khahituka hituka inga kizui kisamavyo samavyo. 18 Kwa mbui yakwe mwenye kativyaa na kutitenda tiwe wana wakwe, ili tiwe wa bosi mwe wamwe wa viumbe vyakwe vyose.

19 Wandugu zangu niwakundisao kumbukani mbui inu, kia mntu awe na kinyio cha kutegeeza, akini asekuwa na kinyio cha kutamwiiya wala kuwa na maya. 20 Kwaviya mntu ekuwaye na maya khagosoa yakundigwayo na Muungu. 21 Ivyo badeni kugosoa mbui zose fyaimi hamwe na makwasukwasu yose na kuhokea Mbui ambayo Muungu kaiika mwe mioyo yenu kwaviya nee idahayo kuwaohoa.

22 Mwesekwetiiya kwa kuwa wantu wa kutegeeza du Mbui ya Muungu, iya muwe wantu mgosoao inga viya Mbui igombekavyo. 23 Mntu yoyose ategeezae Mbui ya Muungu na asekugosoa igombekacho, yee ne inga mntu ekauwaye cheni chakwe mwe kioo. 24 Akabinda kwekauwa ahauka hemeso ya kioo na ahoaho ajaa viya eivyo. 25 Akini mntu akauwae vitana muno miko yekuiganiayo ambayo yawatenda wantu walawe mwe utumwa, akaendeea kutoza na kugosoa ekuyategeezayo, uyo nee endayeajaiwe kwa kugosoa ivyo.

26 Mntu akeona amvikia Muungu inga ikundigwavyo, akini khaukindia ulimi wakwe, uyo etiiya mwenye na ayo agosoayo khayamwambiza kintu. 27 Akini Mntu amvikiyae Muungu ikundigwavyo, akundigwa agosoe aya, kuita kuwaambiza wesaokuwa na wavyazi na wekufiwao na wagosi mwe suuba zao, na kweinda na khachu za wantu wesaokumzumiiya Muungu.