1 Naho tegeezani nywie wenye vintu vingi! Iyani kwa mgutio na kutoa bwaimbo kwaajii ya suuba zendazoziwalawiiye nywie. 2 Vintu vyenu vingi vivunda na magwanda yenu yaigwa na mswa. 3 Zahabu zenu na madini ya feza vyendaviwe na khutu, na khutu iyo yaonyesha mweivyo wachoyo nayo yendaide mii yenu inga moto, kwaviya muwa mkaika vintu vingi mwe misi izi za kisiikizi. 4 Tegeeza viya wandima wenu wanung'unikavyo, wawagosoea ndima mwe minda yenu iya khamwekuwaiha, Zumbe Muungu mwenye udaho wose khategeeza kuiya kwa awo wekuwabondeao khande zao. 5 Mwekaa na kwetamiza vintu vingi muno mwe inusi inu, na mweisa na kuwa vitana kwaajii ya msi wa uamuiyo inga mnyama mwekuiswae na kuwa vitana ambae kaikwa kae kudumulwa singo. 6 Muwaamuiya wagosoao yedi, na mkawakoma wala khawekuhigana na nywie.

7 Ivyo wandugu zangu, zizimizani uku mkagoja adi endahoauye Zumbe Yesu Klistu. Kauwani viya muimi agojavyo mnda ulavye khande ntana yenye miyengizo na viya azizimizaho kugoja fua za mwaka na za vui. 8 Na nywie zizimizani naho gookani kwa utintimavu kwaviya kweza kwa Zumbe kwa maa ya kaidi kuhehi.

9 Wandugu zangu, mwesekung'ung'uzikiana ili mwesekweza kuamuiwa na Muungu, muwe meso muamua yuhehi kuuya. 10 Wandugu zangu wakauweni waoni wa Muungu, wekugombekavyo inga viya Zumbe ekuwagombekavyo wagombeke, ili kwa msimo uwo mzizimize mwe suuba. 11 Inga mmanyavyo wada wazizimizaho tawetanga wajaiwa. Mtegeeza mbui za uzizimizi wakwe Ayubu na mwamanya kiya ambacho Zumbe kamgosoeya. Zumbe ana mbazi nyingi nani yedi muno.

12 Kwemboka yose wandugu zangu, mwesekuaha, uwanga kwa Muungu hambu kwa inusi hambu kwa kintu chochose, mgombekaho eeh iwe na mana ya eeh na mgombekaho khivyo iwe na mana khivyo, mkesekugosoa ivyo mwendamuamuiwe.

13 Ivi kuna mntu yoyose gatigati yenu mwekuwa na suuba? Akundigwa kuvika kwa Muungu. Hambu yuaho mntu yoyose mwenye nyemi, aho akundigwa atoe wiya wa kumtogoa Muungu. 14 Ivi kuna yoyose wamwe wenu mwekuwaye mtamu? Naho akundigwa awetange waongoezi wa zumwezumwe da wantu wamzumiao Klistu, wamvikie na kumsisa mavuta kwa zina da zumbe. 15 Wakavika kwa kuzumiiya, mtamu endaahone, na Zumbe endaamwekhe ugima, na ata inga utamu wakwe ulawana na mavigaviga endaaekewe. 16 Kia mntu na agombeke mavigaviga yakwe kwa mweziwe na mvikiane, neaho mwendahomhonywe matamu yenu, mviko wa mntu agosoae akundayo Muungu ina nguvu na yagosoa ndima. 17 Eliya nekawa mntu inga swie nee kavika kwa moyo wakwe wose fua isekunya nayo khayekunya mwe inusi kwa miyaka mitatu na miongo mntandatu. 18 Naho akavika vituhu fua inye, nayo ikanya na sanga ikalavya khande yakwe.

19 Wandugu zangu yumwe yenu akabada ukwei na mtuhu akamvuza, 20 manyani kuwa amvuzae mwenye mavigaviga kulawa mwe sia yakwe ya ufyaimi, endaaiohoe muye uyo, na endaamuekee mavigaviga yakwe mangi.