1 Bauwa inu ni kulawa hangu miye Petulo, muagiiwa wa Yesu Klistu, nawaandikia nywie mwekusagulwao na Tate Muungu, ambao mmwaganika na mwekaa inga wageni uko Ponto na Galatia na Kapadokia na Asia na Bisinia. 2 Yee nee kawasagua nywinywi kuigana na nteganyi yakwe na kwa Muye wa Muungu Tate mtendwa wantu wekuikwao kwaajii yakwe, ili mdahe kumtegeeza Yesu Klistu na kuzingulwa na phome yakwe.

Nawakundieni wedi na uivanisa uwe hamwe nanywi muno.

3 Timlavie ntogoo Muungu na Tate wa Zumbe yetu Yesu Klistu! Kwa mbazi zakwe zekutendesazo akativyaa maa ya kaidi ili tipate kauwio denye ugima kwa kuyuyuka kwa Yesu Klistu kulawa kwa wekufao. Katijaiya kauwio denye ugima, 4 na ivyo takauwia kwekhigwa vintu vingi viya ambavyo Muungu nee kawaikia wantu wakwe. Muungu kawaikieni vintu vingi viuko uwanga kwa Muungu ambaho khavidaha kuvunda hambu kubanika hambu kufubaa. 5 Vintu ivyo vyendaviwe vyenu nywinywi ambao kwa kuzumiia mwaindwa vyedi kwa udaho wa Muungu kwaajii ya uohozi ambao uikwa kae kugubulwa kisingi cha kisikiizi.

6 Mwendamuwe na nyemi muno kisingi iki, iya kwa isasa kwa mda mjihi nlazima msuumizwe na mageezo ya kia mbai. 7 Mageezo aya yawezea ili uzumizi wenu uoneke kuwa ni wayombe muno kusima zahabu, ambayo etiho yabanika yemboswa mwe moto ili iwe ntana, na uzumizi wenu uete ntunyo na ukuu na kutunywa ili kisingi Yesu Klistu endahoagubulwe. 8 Nae mwamkundisa etiho khamokumuona ambae nahodu isasa khammuona yakini mwamzumiiya, na ivyo mna nyemi kwa nyemi yesayo kutamwiizika na yenye ukuu, 9 kwaajii mwahokea uohozi wenu na nee kauwio da kuzumiia kwenu.

10 Mwe mbui ya uohozi uwo waoni wa Muungu nee waondeza na kusunguumanya na wakatabii mbui ya mboto yendayomwekhigwe nywie. 11 Nee wageeza kumanya ni kisingi kihi ambacho Muye wa Klistu mwekuwae umo mwao nee kawa aonyesha kisingi ekuwaho atabii kuusu mbui ya masuumizi ya Klistu na ukuu uda wendaoutongee. 12 Muungu kawagubuiya waoni awo kuwa khawokuwa wagosoa ndima kwa manufaa yao iya kwa manufaa yenu. Hada wekutamwiiyaho kuusu mbui izo ambazo isasa mzitegeeza kulawa kwa wantu wada ambao wawabiikia Mbui Yedi kwa udaho wa Muye wa Muungu, mbui izo ata wandima wa uwanga kwa Muungu nee wawa watamiwa kuziona.

13 Kwaiyo ziikeni akii zenu ziwe tayali kwa ndima, ekaeni hae na khwiina zesazokumkundisa Muungu na muike kauwio denu mwe mboto ambayo yendaietwe kwenu hada Yesu Klistu endahoagubulwe. 14 Inga wana wategeezao, msekugosoa vituhu mbui zenu za ufyaimu za aho bosi hada mwekuwaho khamuumanya ukwei wa Muungu. 15 Iya mwakundigwa muwe muikwa kwaajii ya Muungu mwe mbui zose mgosoazo, inga ekuwavyo yuda mwekuwetangae. 16 Maandiko ya Muungu yamba, "Mwenda muwe muikwa kwaajii ya Muungu inga mie neivyo."

17 Kisingi cha kuvika kwenu nywie mwamwetanga Tate yee aamuiae kia mntu kuigana na mbui zakwe kwesiho kubahua, ivyo tumiani mda wenu wekusigaao hanu mwe si ambayo khio yenu kwa kumvikia Muungu. 18 Nanywi mwamanya ya kuwa muoholwa mbadane na wekaisi wesao kuwa na mana ambao nee muupaa kulawa kwa baba zenu, khio kwa vintu vibanikavyo inga madini ya feza hambu zahabu, 19 Iya kwa phome ya galama ya Klistu yuda ambae nekawa inga mwanangoto mwesekuvia na mwesekuwa na doa. 20 Yee nee kasagulwa kae na Muungu kabla ya inusi kugosolwa, akaonyeshwa misi izi za kisikiizi kwaajii yenu. 21 Kwa sia yakwe mwamzumiiya Muungu, mwekumyuyusa kulawa kwa wekuuyao na nyuma na kumwekha ukuu, ivyo kuzumiia kwenu na makauwio yenu yauko kwa Muungu.

22 Kwaviya isasa mtegeeza ukwei, na nywie mwezingua wenye ili muonyeshe ukundiso wa kwei kwa ivyo kundisaneni kia yumwe kwa moyo wenu wose. 23 Mana kwa sia ya Mbui ya ugima ya Muungu nywie mvyaigwa uhya, naho khio inga wana wa tate adahae kuuya na nyuma, iya Tate mwesae kuuya na nyuma misi zose kwesiho kisiikizi. 24 Inga Maandiko ya Muungu yambavyo,

"Kia mntu yuuko inga mani.

Na ukuu wakwe wose inga mauwa ya koongo.

Mani yanyaa na mauwa yagwa,

25 Akini Mbui ya Zumbe yekaa misi zose kwesiho kisiikizi."

Inu nee Mbui Yedi mwekubiikiwayo.