1 Kwaviya Klistu nee kasuumizwa mwe mwii wakwe, nywinywi nanywi kuweni na mamakhanyi inga idaida kwaviya inga msuumika mwe mwii mbadana na mavigaviga. 2 Kuvokea isasa mda wenu wekusigaao mwe inusi yakundigwa mwekae via akundavyo Muungu na khio kutongea khwiina fyaimi za mwii. 3 Kwaajii mda wekwembokaho utosha kugosoa mbui ambazo wantu wesaokummanya Muungu watamiwa kuyagosoa. Nee mwekaa kwa ukianga, na khwiina fyaimi na kukolwa muno na kuvina mkwiti na kuvika vizuu ambavyo ni sukizo kwa Muungu. 4 Isasa wantu awo wesaokummanya Muungu wahondomaa wawaonaho khamwenda hamwe nao vituhu he kugosoa makwasukwasu yatendesayo, ivyo wawagombekea mafyaimi, 5 akini wakundigwa kulavya ntaazia hemeso yakwe yee, ekuwae tayali kuwaamuia wekuwao wagima na wekuuyao na nyuma. 6 Kwaajii inu nee mana Mbui Yedi nee ibiikiwa ata kwa wantu wekuuyao na nyuma ili waamuiwe mwe mwii inga waamuiwavyo watuhu, wekaise mwe muye inga akundavyo Muungu.

7 Kisikiizi cha mbui zose kihehi naho muikindie mioyo mcheeze, uku mkimvikia Muungu. 8 Kundisaneni kwa moyo wose, kwaviya ukundiso wagubika mavigaviga mangi. 9 Hokeaneni nywinywi kwa nywinywi kwesiho manung'uniko. 10 Kia yumwe akundigwa agosoe ndima kipaji kia ekwekhigwacho ni Muungu kuwaambiza watuhu, inga wakauwaji wedi wa vipaji mbaimbai vilawavyo kwa Muungu. 11 Agombekae kintu, ntamwiizi zakwe iwe inga ntamwiizi za Muungu agosoae ndima akundigwa agosoe kwa udaho ekujaiwao ni Muungu, ili mwe mbui zose, Muungu atogolwe kwembokea Yesu Klistu ambae ukuu na udaho ni vyakwe kae na kae! Pepa.

12 Wambuya wangu mwesekuvotwa na mageezo yenye maumevu muno, mkayaoona inga kintu kigeni kulawiiya kwenu, 13 akini inga mshiikivyo masuumizi ya Klistu muwe na nyemi ili na mwe ukuu wakwe wendahougubulwe muwe na nyemi na kutoa khegee. 14 Mjaiwa kwaviya mwadumulwa kwaajii kumtongea Klistu, mbui iyo yamanyisa kuwa Muye wa ukuu, yani Muye wa Mungu ekaae umo mwenu. 15 Akini asekuoneka mntu yoyose gatigati yenu esuumizae kwaviya ni mkomaji hambu mbavi hambu mbanasi hambu epishae na mbui za wantu watuhu ili awasongeeze. 16 Inga mntu akesuumiza kwaajii ya kumzumia Klistu, asekuona soni iya amtogoe Muungu kwaajii mntu uyo etangwa kwa zina da Klistu.

17 Kwamana kisingi kibua na kuamuiwa kuvoka mwe Nyumba ya Muungu na inga ikavoka na swie, kisikiizi yendaiwe viivihi kwa awo wesaokutegeeza Mbui Yedi ya Muungu? 18 Viavia,

"Mntu agosoae yada akundayo Muungu, vyatoga kweohoa,

Yendaiwe viivihi kwa yuda mwesaekumtegeeza Mungu na mta mavigaviga?"

19 Kwa ivyo, wada wasuumizwao kutongeana na viya akundavyo Muungu, wakundigwa kwa ntendwa zao zedi weavye kwa Muungu yao ambae ni wakuzumiwa uku watendese kugosoa yedi.