1 Naho badeni makwasukwasu yose na uhokho na ubakha na kinyuu na ntamwiizi za kumgombekea mtuhu mafyaimi zesekuoneka vituhu. 2 Na muwe inga wana wateke mtamiwe ni mee ya kwei ya kimuye ili yawambize kukua mwe uohozi, 3 kwaajii isasa mwamanya Zumbe ni yedi.

4 Mumtongee yee mwekua iwe da ugima, dekuemewado na wantu iya Muungu kadisagua na dina yombe khuu kwakwe. 5 Mtongeeni yee inga maiwe ya ugima mwekuzengwao na kuwa nyumba ya kimuye ambaho mwendamgosoe ndima inga waviki wekuikwao kwaajii ya Muungu na kulavya ntambiko za kimuye za kumkundisa Muungu kwembokea Yesu Klistu. 6 Kwaviya Maandiko ya Muungu yagombeka,

"Kauwa naika iwe uko Sayuni,

Iwe da msingi, dekusagulwado na da yombe,

Mntu yoyose endaeamzumiie uyo khana agewe soni."

7 Isasa kwenu nywinywi mzumiiao iwe ido ni da yombe khuu, Iya kwa wada wesaokuzumiia,

"Iwe wekudiemeado wazengi,

Diwa iwe kuu da msingi."

8 Vituhu Maandiko yamba,

"Iwe diwatendado wantu wekungwae,

Iwe khuu dakuwagwisa wantu."

Wantu wekugwaa kwaviya khawekuzumiiya ida Mbui, nee ivyo wekukusudiwavyo kuvokea aho bosi.

9 Akini nywinywi ni muango wekusagulwao, waviki wa kiseuta, si yekusagulwayo ni Muungu, wantu wakwe Muungu mwenye, mwekusagulwao muziambaze mbui khuu za Muungu ekuwetangiayo kulawa mwe kiza na kuwetanga mwengie mwe ung'azi wakwe mkuu. 10 Aho kae nywinywi khamwekuwa wantu wa Muungu, akini isasa muwa kae wantu wakwe, aho bosi khamwekwekhigwa mbazi ya Muungu, akini isasa mhokea mbazi.

11 Wambuya wangu nawahembeeza mkawa inga wageni na wembokao mwe inusi badeni mbui za ufyaimu za mwii ambazo zahigana na muye. 12 Kwekaisa kwenu kwakundigwa kuwe kwedi muno hemeso ya wantu wesao kummanya Muungu, ili wendaho wawashutumu kuwa mwagosoa mbui za ufyaimi, wadahe koona mbui zenu ni ntana na ivyo wadahe kumtogoa Muungu msi wa kweza kwakwe.

13 Tongeani kia kikundigwacho na wagookezi wekuikwao na wantu, iwe ni ya seuta ambae ni mkuu muno, 14 hamwe na wambiizi wakwe wekuikwao. Kwaviya Seuta kawaagiiya kuwekha sugusa wada wekukoao masa na kuwatogoa wada wagosoao mbui zedi. 15 Mana Muungu akunda mdahe kukanya kihephe ntamwiizi zao za kibahau za wantu wesao na akii kwa ntendwa zedi mgosoazo. 16 Ekaeni inga wantu wesao kuvutwa kokose na kwa via khamvutwa kokose mwesekufisa ufyaimu, iya ekaeni inga wandima wa Muungu. 17 Watunyeni wantu wose. Wakundiseni wandugu, mtongeeni Muungu, mtunyeni seuta.

18 Nywie wandima, mtongee miagiiyo ya wakuu wenu kwa ntunyo yose, wawe wedi hambu wahuhusi hambu ata wakai. 19 Kwa mana ni mbui ntana inga mntu akazizimiza asumiizwaho kwa uonevu kwaajii ya kumanya viya Muungu akundavyo. 20 Kwaviya mwendampate funge dani mkazizimiza masuumizi mwekhigwayo kwaajii ya masa yenu? Akini inga mkazizimiza masuumizi kisingi mwagosoa yekuwayo yedi, Muungu endaawajaie kwaajii iyo. 21 Ayo nee mwekwetangiwayo, mana Klistu mwenye kesuumiza kwaajii yetu na ivyo mgosoe inga ekugosoavyo yee. 22 Yee khekugosoa mavigaviga naho khegombeka uhokho. 23 Ekudumulwaho yee khekutambaisa kwa kudumua ekusuumizaho yee khekuwatisa, iya nee kaika makauwio yakwe kwa Muungu, muamua wa kwei. 24 Yee mwenye kayadoa mavigaviga yetu mwe mwii wakwe uwanga ya mhamba ili tiuye na nyuma kwaajii ya mbui za mavigaviga, na tekaise kwa kugosoa mbui zimkundisazo Muungu na kwa vionda vyakwe ninywi mhonywa. 25 Nywinywi nemuwa inga ngoto wekuwao waga, akini isasa mumuuwiya mwiisi na mgoji wa miuye yenu.