1 Nawahembeza wadaa weaho henu mie ambae ni mdaa mwezuwenu, mie nekuonae masuumizi ya Klistu na nendaniwe hamwe mwe ukuu wendaougubulwe misi yezayo, 2 dikauweni zumwezumwe da Muungu mwekwekhigwado, diiseni khio kwa kushuutizwa akini kwaajii mtayali inga viya Muungu akundavyo mgosoe khio kutongea khwiina ya hea iya kwaajii mwakunda kugosoa ndima ya Muungu. 3 Msekuwagookea kwa nguvu awo wekuikwao asi ya ukauwizi wenu, iya muwe msimo kwa ido zumwezumwe da Muungu. 4 Nae mwiisi mkuu endahoagubulwe, nywinywi mwendamhokee ntaji ya ukuu yesayokubanika.

5 Viyaviya na nywinywi wabwanga mwakundigwa kuwategeeza wadaa. Kia yumwe yenu amtunye kwa mwenzakwe, kwaviya Maandiko ya Muungu yamba, "Muungu ahigana na wenye vibui iya awekha wanyenyekevu majaiwa." 6 Isasa nyenyekeani asi ya mkono wa Muungu wenye udaho ili awatende muwe na ntunyo kwa kisingi kifaacho. 7 Mwekheni suuba zenu zose kwaajii yee awapatiiza.

8 Mwekae ahe na mcheeze! Mana mmasa wenu ambae ni Ibiisi ni inga simba atuntumae akoondeza mntu amkwache. 9 Mumkindie na muwe watintimavu mwe kuzumiia, uku mkamanya kuwa wandugu zenu hohose mwe inusi wapatwa na masuumizi inga ayo. 10 Nywinywi mkabinda kusuumizwa kwa mda mjihi, Muungu wa mboto yose mwekuwetanga kwengia mwe ukuu wakwe wa kae na kae mwe Klistu, yee mwenye endaawagosoe uhya na endaawavuze na kuwekha udaho na kuwatintimaza ili msekuzingiza. 11 Udaho una yee kae na kae. Pepa.

12 Khiwaandikia bauwa inu njihi kwa wambiizi wa Silivano, ndugu ambae namuona kuwa mklistu mwenzetu na ni wa kwei, nakunda kuwagea moyo na kuwatamwiiza kuwa mbui inu nekuonayo ni mboto ya Muungu kwei, gookani kwa utintimavu mwe iyo.

13 Wantu wamzumiiao Klistu weuko Babeli wawaugusa na viavia Maliko mwanangu wa kimuye awaugusa. 14 Ugusaneni kwa ukundiso wa Klistu.

Uivanisi na uwe hamwe na nywi nyose mwekuao ndani ya Klistu.