1 Bauwa inu ni kulawa hangu mie Simoni Petulo, mndima na mwaagiiwa wa Yesu Klistu, nawandikia nywinywi ambao kwa kwei yakwe Muungu yetu na Mwoohozi Yesu Klisitu.

Mhokea uzumizi wa yombe khuu inga udauda tekujaiwayo swie.

2 Nawakundia wedi na uivanisi mwe kummanya Muungu na Yesu Zumbe yetu.

3 Kwa udaho wakwe wa Muungu, katijaiya vintu vyose tikundavyo ili tekae kwa kumtongea Muungu kwa kummanya yee mwekutetanga mwe ukuu na wedi wakwe yee mwenye. 4 Kwaajii iyo katijaiya kiaga kikuu na cha yombe, ili kwembokea kwa izo tidahe kuhamwe mwe udaho wa Kimuungu na kulawa mwe ubanasi weuko mwe inusi kwaajii ya khwiina fyaimi. 5 Kwaajii iyo, fundana kugenyeza uzumizi wenu kwa fazii, fazii yenu kwa umanyi, 6 mwe umanyi wenu genyeza kuikindia mioyo, na kwa kuikindia mioyo kwenu genyeza uzizimizi na kwa uzizimizi wenu genyeza kumtongea Muungu. 7 Kumtongea Muungu kwenu kwa umbuya wa kiundugu na umbuya wenu wa kiundugu mgenyeze ukundiso. 8 Aya yose yakagenyea kwenu khamna muwe wabwa, na wala khayanayawakindie kugosoa mbui zedi mwe mbui ya kummanya Zumbe yetu Yesu Klistu. 9 Akini mntu yoyose mwese na izo ntunyo khaona ahe na ni tuntu, na kajaa ati kaekewa na kuusiwa kae mavigaviga yakwe ya kae.

10 Kwa ivyo, wandugu zangu, fundana kutendesa kuugosoa uwo wetango wenu mwekwetangiwao na Muungu uwe mbui ya misi zose he kwekaa kwenu, ati mkekaa ivyo khamnamgwe katu, 11 Kwa sia iyo mwendamjaiwe kwekhigwa haki kamii ya kwengia mwe useuta wa kae wa Zumbe na Mwohozi yetu Yesu Klistu.

12 Ivyo nenda niwakumbuse mbui izo misi yose, hata etiho mwayamanya na mtintimaa vyedi mwe Mbui ya Muungu mwekuhokeayo. 13 Ni mbui yedi kwangu, kisingi chose niendeeaho kwekaisa mwe inusi, kuwekha moyo na kuwakumbusa mbui izi. 14 Kwaajii namanya ivi hehi nendaniuike khandani mwii unu wenye ufe, inga Zumbe ekunigombekavyo pwiii. 15 Nendanigosoe kia nidahacho kusudi bada ya ufe wangu mdahe kukumbuka mbui izi kia kisingi.

16 Kisingi tekuwahinyaho ukuu wa kweza kwakwe Zumbe yetu Yesu Klistu, khatekutongea ntamwiizi za kinyanyi. Akini teonea wenye ukuu wakwe kwa meso yetu. 17 Kwaajii nee kekhigwa ntunyo na ukuu kulawa kwa Muungu Tate, kisingi mgutio wekumwezeaho kulawa kwakwe mwenye ukuu Mkuu ukamba, "Uyu ni mwanangu nimkundisae nekutamiwae nae." 18 Naho, swie wenye tisikia migutio iyo kulawa uwanga kwa Muungu kisingi tekuaho hamwe naye uwanga ya uda mwiima wa Muungu.

19 Viyaviya, mbui za waoni zaonyesha mbui iyo, nanywi mwagosoa vyedi ati mkautozeeza, mana ni inga taa imuikayo hantu henye kiza adi msi uda kwendahokuche na mng'ao wa ntoondo ya keokeo yendahoingangazike mwe mioyo yenu. 20 Hamwe na ayo yose, kumbuka kuwa mntu yeyose adahae mwenye kusosoa mwenye uwoni weumo mwe Maandiko ya Muungu. 21 Ila wantu newagombeka mbui za Muungu inga wekuongoewavyo na Muye wa Muungu.