1 Wambuya wangu, inu ni bauwa ya kaidi niwaandikiayo. He bauwa izi mbii khigeeza kuwakumbusha muwe na mamakhanyi zimkundisazo Muungu. 2 Nakunda mkumbuke mbui yekugombekwayo ni waoni wa Muungu, na ida amli ya Zumbe na Mwohozi mwekwekhigwayo kwembokea kwa waagiwa wenu. 3 Bosi ya yose manyani misi ya kisiikizi wendaweze wantu ambawo wendawabee na wendawaongoee na khwiina zao fyaimi, 4 wakauza, "Yee mwenye kaika kiaga kuwa endaauye, isasa yu kuhi? Mbui ni ziazia kuvokea mababa zetu wekuuyao na nyuma, kia kintu kieendeea inga kikuendeeavyo kuvokea inusi ikugosolwaho!" 5 Wantu awa wajaa wakamanya kuwa Muungu nee kagombeka na kwa Mbui ya Muungu uwanga kwa Muungu na inusi nee zigosolwa. Inusi nee igosolwa kulawa mwe mazi, kwa kusudi ati bosi Muungu kagombeka, nazo inusi na uwanga kwa Muungu iumbigwa kulawa he mazi na kwa mazi, 6 kwembokea kwa mazi yadayada ya ghalika, inusi ya kisingi kia nee idagamizwa. 7 Kwembokea kwa Mbui ya Muungu inusi ya isasa ziikwa kwaajii ya msi wa uwamuiyo na kudangamizwa kwa wantu wesaokumzumiiya Muungu.

8 Akini wambuya wangu, msekujaa kintu kimwe kuwa hemeso ya Zumbe msi umwe ni inga myaka elufu na myaka elufu ni inga msi umwe. 9 Zumbe khacheewa kugenyeza yada ekuikiayo kiaga inga wantu watuhu wamamakhanyavyo kuusu kucheewa. Yee ana uzizimizi kwaajii yenu, mana khakunda katu yumwe age, iya kuwavuta wose wadahe kueka mavigaviga.

10 Msi wa Zumbe wendaweze inga mbavi. Msi uwo mbingu zendazage kwa msindo mkuu na viumbe vyeumo umo vyendavidagamie kwa moto, na inusi yendaiuswe hamwe na kia kintu cheumo ndani yakwe. 11 Kwa viya vintu vyose vyendavibanangwe, nywie mwakundigwa muwe wantu wa viivihi? Mwakundigwa kwekaisa wekaisi wekuikwao kwaajii ya Muungu na kwa kumtongea Muungu, 12 mkahufiizia msi uda wa Muungu na kuigosoa yeze kinyio. Kwaajii msi uwo si zendazidagamizwe kwa moto na kubanangwa, na viumbe vyeumo uwanga vyendavilolomoke kwa kizuguto. 13 Akini inga ekutiikiavyo kiaga, tahafiiza uwanga kwa Muungu kuhya na si mhya hada ambaho wantu wagosoa du mbui zia zimkundisazo Muungu.

14 Kwaajii inu, wambuya zangu kwaviya mwakauwiya kwa nyemi mbui izi, gosoani mdahavyo msekuvia wala mwesekutamwiiwa ya ufyaimi na muwe na uivanisi nae. 15 Mwakundigwa kumanya uzizimizi wa Zumbe nee uwatendao wantu waoholwe ni inga via ndugu yenu mumkundisae Paolo ekuwaandikiavyo kwembokea umanyi ekwekhigwayo ni Muungu, 16 Inga ekugombekavyo kuusu mbui izi mwe bauwa zakwe zose. Mbui ntuhu mwe bauwa izi zatoga kuzimanya, mbui ambazo wantu wabahau na wantu wesao kuwa na ugookezi mwe kumzumia Klistu, wayaza inga wazavyo hantu ntuhu za Maandiko ya Muungu ivyo utenda madagamizi yao wenye.

17 Akini nywie wambuya wangu, mmanya kae mbui inu. Naho muwe meso msekweza kwazigwa na masa ya wantu awa wesaokutongea miko, mkagwa kulawa mwe kugooka kwenu kwa utintimavu mwe uzumizi wenu. 18 Akini tendesani kugenyea mwe mboto na mwe kummanya Zumbe yetu na Mwohozi wetu Yesu Klistu. Ukuu uwe kwakwe, isasa na hata kae na kae! Pepa.