1 Nekwaawiiya waoni wa uhokho gatigati ya wantu, na ivyo wahinya uhokho wendawalawiiye gatigati yenu. Wantu awo wendawengize mahinyo potofu ya uhokho ya kuwapotosha wantu hata wendawamuemee Zumbe mwekuwaohoa na kwaajii ya ayo wendaweetee madagamizi ya vuu puu wao wenye. 2 Naho wantu wangi wendawazitongee izo sia mafyaimi na kwaajii yawo watuhu wendawaibee sia ya kwei. 3 Kwa khwiina zawo wendawapate mai kulawa kwenu kwa kuwamba ntamwiizi za uhokho. Akini uwamuiyo wao nee ugombekwa kuvokea aho kae na kudangamizwa kwao kwawagoja.

4 Muungu khekuwaonea mbazi wandima wa uwanga kwa Muungu wekugosoao mavigaviga, iya akawatambika mwe moto wesaho kukomeka, akawazengeteza na sigi za chuma mwe kiza kugoja msi uda wa uwamwiiyo. 5 Viavia inga Muungu khekuonea mbazi si ya aho kae, iya nee kaeta mazi mangi yekugubikayo si ida ya wantu wekwekaisao kwesiho kumuogoha Muungu, akini akamuohoa Nuhu ambae nee kabiikia via wantu wakundigwavyo kwekaisa kwa kumkundisa Muungu na wantu watuhu mfungate. 6 Viavia Muungu nee kawaamuiya wantu wa mizi ya Sodoma na Gomola, akawadagamiza kwa moto, akawagosoa watende msimo wa mbui zendazoziwapate wantu wesaokumtongea Muungu. 7 Nee amuohoa Lutu, mntu yedi mwekusikitishwa muno na mbui za ugoni za wantu wenao makwasukwasu. 8 Lutu nee kekaa hamwe na wantu awo na kwa misi mingi moyo wakwe neuwa mwe maatumatu makuu ekusikiaho mbui zao za makwasukwasu. 9 Kwa ivyo, Zumbe amanya ni viivihi adaha kuwaohoa mwe mageezo wantu wekaisao kwa kumtongea yee na viavia ni viivihi endavyoawaike wantu wenye makwasukwasu ili awekhe sugusa mwe msi uda wa uwamwiiyo, 10 hasa wada watongeao khwiina fyaimi za mwii na kubea udaho wa Muungu.

Wantu awo ni wakaidi na wenye kuhikuka, wavidumua na khawavitunya viumbe vyenye ukuu vya uwanga kwa Muungu, 11 iya hata wandima wa uwanga kwa Muungu wada ambao wana udaho muno kusima awo wahinyi wa uhokho, khawawadumua kisingi wawakoea masa hemeso ya Zumbe. 12 Wantu awo ambao ni inga wanyama wesao na akii ambao wavyaigwa ili wagwiwe na kudumulwa singo, wantu awo khawamanya yuda, Wendawadagamizwe kulawiana na ubanasi wao wenye, 13 na wendawaihwe masuumizi kwa suuba wekuwagosoeao watuhu. Wao ni inga madoa na waeta soni mwe ntafuno zenu uku wakiendeea kisingi washiiki mafyaimi yao. 14 Wawakauaho wavyee watamiwa ni ukianga na khawabada kugosoa na wawabibiiza wantu ambao khawana udaho wa muye, na wameo wekwembokesao, naho ni uvyazi wekubadiwao lazi na Muungu. 15 Waieka sia ya kwei na kuitongea sia fyaimi sia ida ya Balaamu, mwana wa Beoli ambae kakunda kwengiza mwengizo kwa kugosoa utiizi, 16 akini akakemewa kwaajii ya ubanasi wakwe, ni phunda, mnyama mwesaekudaha kutamwiiya, akatamwiiya kwa mgutio wa mntu na kukindia ukiau wa uyo muoni.

17 Wantu awo ni inga ngodi zekunyaazo, inga khungugu zipuuswazo na khusi, wantu awo kisiikizi chao wagojewa ni kiza kikuu. 18 Watamwiiya mbui ya kuhikuka na zesazokuwa na mana, kwa khwiina zao za mwii wawabibiiza wantu wada ambao ivi hehi walawa mwe wada wagosoao mbui za ufyaimi. 19 Wawaikia kiaga wantu watuhu kuwa wendawawe hulu, kisingi wao wenye wazengetezwa na mavigaviga, kwaviya mntu ni mtumwa wa kintu chochose kimuongoeacho. 20 Inga waikwa hulu kulawa mwe mbui za soni kunyiika kwa kummanya Zumbe na Mwoohozi wetu Yesu Klistu, vituhu wauya kugosoa mbui izo za soni, wekaisi wao wendauwe mfyaimi kusima uda wa bosi. 21 Nee iwa vyedi kwao, ati khawekuwa waimanye katu sia ya kwei, kusima kuimanya na wakaiemea amli ya Muungu ambayo nee wekhigwa. 22 Wekugosoacho chaigana na mesali yambayo, "Kui ayauwiiya vituhu matahika yakwe mwenye," na mesali ntuhu yambayo, "Nguuwe mwekubindae kusuntwa etengoosa vituhu mwe ntope."