1 Viavia nywie wavyee wategeezeni wagosi wenu, ili inga wauko wesaokuzumiia ida Mbui ya Muungu, wadahe kuzumiia kulawana na myendo yenu, hata inga khamnamgombekee dodose, 2 kwaajii wendaowaione myendo yenu inga wantu wekuikwao kwaajii ya Muungu na ni yantunyo, naho ni ya kumtongea Muungu. 3 Kwehamba kwenu kwesekuwa kwa chongoi, inga via mitindo ya kusuka fii kwevaiya mahambo ya zahabu na magwanda ya mahambo, 4 iya utana wenu uwe niweuko ndani ya mioyo yenu yesaokuoneka kwa mahambo yesayo kubanika kwa utana wa muye wenye uhuhusi na wekutwiiao ambao ni yombe khuu hemeso ya Muungu. 5 Ivyo nee vyekuwavyo wakehamba wavyee wekuwao waikwa kwaajii ya Muungu wa aho kae nee wakamkauwia Muungu na kuwategeeza wagosi wao. 6 Inga via Sala ekumtegeezavyo muumewe Abulahamu na kumwetanga zumbe yakwe. Nywinywi ni wandee wa Sala inga mkagosoa yekuwayo yedi kwesiho kuogoha.

7 Viavia nywinywi wagosi, mwe kukaisa na wavyee wenu wakundigwa kwekaa nao kwa sia ya umanyi na mkawaonyesha ntunyo inga wapazi wa kipaji cha ugima hamwe na wao. Gosoani ivyo ili kwesekuwa na kintu chochose cha kuwakindia mwe miviko yenu.

8 Mbui ya kisikizi ni inu, nywinywi nyose mwakundigwa kwekaisa kwa kutegeezana yumwe na mtuhu na kuoneana mbazi yumwe na mtuhu na kukundisana na kuwa wedi na wanyenyekevu, 9 Mwesekuiha da ufyaimu kwa ufyaimu au kibui kwa kibui, iya wakundieni majaiwa, kwaviya nywinywi nee mwetangwa ni Muungu kuhokea majaiwa. 10 Inga Maandiko ya Muungu yambavyo,

"Akundae kutamiwa wekaisa,

Na koona misi mingi yenye majaiwa,

Yakundingwa ekindie ulimi wakwe kugombeka mafyaimu

Na miomo yakwe yesekugombeka uhokho.

11 Mntu uyo akundigwa abade ya ufyaimu agosoe yekuwayo yedi,

Akunde kwekaa kwesiho khumbizi na kuendeea kwekaa ivyo.

12 Kwaviya meso ya Zumbe ya wakauwa wada wantu wedi,

Na magutwi yakwe yategeeza miviko yao,

iya yee ahigana na wada wagosoao ya ufyaimu."

13 Nindai mwenda awazuu nywinywi inga mkagosoa mbui zekuwazo zedi? 14 Akini inga mkasuumizwa kwaajii ya kugosoa yekuwayo yedi mjaiwa. Mwesekumuogoha mntu yoyose wala mwesekuwa na maatumaatu. 15 Akini mtogoeni Klistu inga Zumbe mwe mioyo yenu. Mwe tayali kumtambaisa mntu yoyose mwendaawauze uwanga ya makauwio yekuwayo mwe mioyo yenu, 16 akini gosoani ivyo kwa uhuhusi na ntunyo ikani mioyo yenu iwe mitana, nia yenu iwe ntana kusudi wada ambao wawadumuao kuusu myendo yenu mitana inga waone soni wakawakoeeya masa. 17 Ni vyedi kusuumika kwaajii yakugosoa yedi inga Muungu akundavyo kusima kugosoa mafyaimi. 18 Kwaviya Klistu mwenye kauya na nyuma kwaajii ya wose, kauya na nyuma maa mwengadu na ikasia, yee khekuwa na mavigaviga nee kauya na nyuma kwaajii ya wenye mavigaviga ili awaete ninywi kwa Muungu. Nee kauya na nyuma mwe mwii akini akawa mgima mwe muye, 19 ivyo kwa sia ya muye akaita kubiikia muye zekuwazo mwe kifungo. 20 Muye izo ni zia aho kae khazokutegeeza, kisingi kia uzizimizi wa Muungu wekuwaho ukagoja mwe misi ya Nuhu ekuwaho akazenga safina. Newawa ni wantu wachechedu, yani wantu nane wekuhonao khawekudagamia na mazi mangi, 21 ayo mazi ni inga simo ambao isasa muoholwa, nahodu khio kwa kuusa usama mwe mwii, iya inga kiaga cha moyo wekung'aao kwa Muungu. Ubatiizo uo nee uwaohowao kwembokea kwa kuyuyuka kwa Yesu Klistu, 22 yuda ambae kaita uwanga kwa Muungu na isasa kekaa phande ya kuume ya Muungu na wandima wa uwanga kwa Muungu na wakuu na wenye udaho waaho asi yakwe.