1 Ivi, mwamanya kutoana na khumbizi gatigati yenu kwalawiiya hahi? Vyalawa mwe khwiina zenu fyaimi ambazo zahigana umo mwenu. 2 Mwatamiwa muno kupata vintu na kwaviya khamvipata naho mwakoma watuhu, mwatamiwa muno kupata vintu, akini khamvipata, ivyo mwagosoa khumbizi na kutoana. Khampata vintu ambavyo mwavikunda kwaviya khamviombeza kwa Muungu. 3 Naho, muombezaho khampata kwaviya mwaombeza kwa nia fyaimi, ili mvitumie kwa khwiina zenu. 4 Nywie ni wantu mwesao kuzumiiwa ni Muungu inga wakianga. Ivi, khammanya kuwa mmbuya wa inusi ni kuwa mmasa wa Muungu? Yoyose akundae kuwa mmbuya wa inusi etenda mmasa wa Muungu. 5 Mwesekumamakhanya kuwa Maandiko ya Muungu yagombeka mbui zabue, yagombekaho, "Uyo Muye ambae Muungu kamwiika umu mwetu anakinyuu kikuu." 6 Akini wedi tekwekhigwao na Muungu una udaho muno, inga yagombekavyo Maandiko ya Muungu, "Muungu ahigana na wada wevunao akini wanyenyekevu awajaiya mboto."

7 Ivyo mtegeezeni Muungu, nae muemeeni shetani nae endaawaguuke. 8 Mtimieni hehi Muungu nae endaawatimie nywie. Nywie wenye mavigaviga ekani mavigaviga yenu na mgosoe yekuwayo yedi. Na nywie wenye nia mbii mbade mamaakhanyi zenu fyaimi na mamaakhanyani mbui zedi. 9 Oneni usungu kwaajii ya ufyaimi wenu, iyani na kutoa bwaimbo, na kuseka kwenu kuwe kuiya, na nyemi yenu iwe usungu. 10 Mtegezeni Zumbe, nae endaawekhe ntunyo.

11 Wandugu zangu mwesekugombekeana ya ufyaimi nywie kwa nywie. Mntu yoyose amgombekae mafyaimi ndugu yakwe na kumuamwiiya, uyo aigombekea ufyaimi na kutamwiiya miagiiyo ya Muungu. Uiamwiiyaho miagiiyo naho khautegeeza miagiiyo iya wetenda kuwa muamuwa wa miagiiyo. 12 Muungu mwenye nee mwekuika miagiiyo na kuamuiya. Ni yee mwenye adahae kuohoa na kudagamiza. Naho wee ni ndai ata umuamwiiye mntu mtuhu?

13 Naho tegeezani nywie mgombekao, "Ivyeo hambu kioi tendatiite mwe mzi unu hambu uda na kwekaa uko mwaka mgima na kugua na kutaga vintu na kwepatia myengizo."

14 Akini khammanya yendayoyalawiiye kioi. Ugima wenu ni mbwai? Nywie ni inga khungugu ambayo yaoneka kwa kisingi kidodo naho kwaga. 15 Mwakundigwa kugombeka, "Zumbe akakundisa tendatekae na kugosoa idi hambu diya". 16 Akini nywie mwevuna na kwesasanta kwaajii ya mbui mkundazo kugosoa, kwevuna uko ni kufyaimi.

17 Naho mntu yoyose amanyae kugosoa mbui yedi za kugosoa, akini khayagosoa, mntu uyo agosoa mavigaviga.