1 Wandugu zangu, kwaviya mumzumiiya Zumbe Yesu Klistu, Zumbe mwenye ukuu, mwesekuwabahua wantu. 2 Kwa msimo mntu akeza mwe zumwezumwe da wantu wamzumiiyao Klistu akawa kevaiya phete ya zahabu na magwanda matana, viyaviya akeingia mkiwa mwenye magwanda yekusakaayo, 3 na nywie mkamhokea kwa ntunyo yuda ekuvaiyae magwanda matana na kamwamba, "Ekaa hanu hantu hatana" akini yuda mkiwa mkamwamba, "Weye gooka hada, hambu ekaa hanu asi hehi yangu." 4 Ivi, khamuona kuwa mwagosoa ubahuzi gatigati yenu? Ivi khamuona kuwa mwaamua kwa mamakhanyi zenu fyaimi?

5 Wandugu zangu tegeezeni, ivi Muungu khakuwasagua wada wakiwa wa inusi wawe wenye vintu vingi kwa kuzumiiya na kuuhokea useuta ambao Muungu nee kawaikia kiaga wada wamkundisao? 6 Akini nywie mwawabea wakiwa, ivi, mjaa kuwa wenye vintu vingi nee wawatendao nywie kupata masuumizi na kuwegaa he mkonga? 7 Ivi, khio wowo wadidumuado zina dia ntana da Zumbe yetu?

8 Inga mwagosoa ida miko ya kiseuta yekuandikwayo mwe Maandiko ya Muungu, "Mkundise mntu wa hehi yako inga wekundisavyo mwenye." Mwendamuwe mwatenda vitana. 9 Akini mkawabahua wantu, mwagosoa mavigaviga na miagiiyo yawaamuiya nywie kuwa wafyaimi. 10 Kwaviya mntu atozae miagiiyo yose, akini akesekugosoa inga ikundavyo muagiiyo umwe endaawe na masa kwa miagiiyo yose 11 Kwaviya ekugombekae kuwa wesekuwa mkianga nee mwekugombeka wesekukoma, ivyo inga khaugosoa ukianga akini kukoma, wataazika kuwa unamasa mwe miagiiyo. 12 Ivyo muwe mwagombeka na kugosoa inga wantu wendaowaamuiwe kwa miagiiyo ida iwatendayo wantu waekewe. 13 Mntu yoyose esaekuekea mwezie nae Muungu khana amuekee, ata mwe kuamwiiya Muungu endaawafiiye mbazi wantu.

14 Wazumizi wezwangu, ivi mntu endaapate mbwai akagombeka amzumiiya Muungu, akini khaonyesha kwa ntendwa? Ivi kuzumiiya uko kwadaha viivihi kumwohoa? 15 Ikawa ndugu yako wa kigosi hambu wa kivyee anasakaza wala khana khande, 16 na yumwe yenu mntu akegombeka, "Hitani kwa uivanisi, na mkaote moto na kweguta akini asekuwekha yada mkundayo," ivi, yendaiambize mbwai? 17 Mbui izo ni inga mntu kumzumiiya kwesiho ntendwa.

18 Akini mtuhu adaha kugombeka, "Wee wamzumiiya Muungu, na mtuhu endaagombeke wee una ntendwa zedi," aho nendanimwambe wadaha viivihi kunionyesha kuwa wamzumiiya Muungu ikawa khuna ntendwa zedi? Akini miye nendanikuonyeshe kuwa namzumiiya Muungu kwa ntendwa zangu zedi. 19 Ivi wazumiiya kuwa yuaho Muungu yumwe? Vitana! Akini ata mazaiko nayo yazumiiya naho yazingiza kwa kuogoha muno. 20 Kwa mbwai kukunda kuva! Ivi, wakunda kuonyeshwa kuwa uzumiizi kwesiho ntendwa ifa? 21 Ivi Tate yetu Abulahamu nee kuzumiwa na Muungu kwa kia ekukigosoacho hada ekumlavyaho Isaka mwanawe he ingo? 22 Waona viya kuzumiiya kwakwe Ibulahimu kwekugosoaho ndima hamwe na ntendwa zakwe, ivyo kuzumiiya kwakwe kuiganizwa kwa sia ya ntendwa zakwe. 23 Ivyo yendayaiganiye yada Maandiko ya Muungu yagombekayo, "Ibulahimu nee kamzumiiya Muungu, na Muungu nae akamzumiya na ivyo Ibulahimu aketangwa mbuyaye da Muungu." 24 Mwaona kuwa Muungu amzumiya mntu kulawana na ntendwa zakwe zedi, khio kwa kuzumiiya ikedu.

25 Msimo mtuhu ni yuda Lahabu ekuwae mkianga, yee nee kazumiiwa na Muungu kwaajii nee kawahokeea wada wekuagiiwao kusunguumanya mzi na kuwaambiza wahauke kwembokea sia ntuhu.

26 Naho inga viya mwii kwesiho muye uuya na nyuma, viyaviya uzumiizi kwesiho ntendwa ufa.