1 Wandugu zangu mwesekuwa wahinya wangi kwaviya mwamanya kuwa Muungu tendatiamwiiye muno swie wahinya kusima wantu watuhu. 2 Akini inga mntu khakoa masa kwa kutamwiiya kwakwe, naho uyo ni mtu mwekuiganiaye, na yee mwenye adaha kwekindia kugombeka mafyaimi. 3 Tadaha kumwegaa faasi hohose tukundaho kuita kwa kumuika ntii ya chuma mwe kanwa chakwe na kumzengeteza uzigi ili atitegeeze. 4 Kauwani meli, etiho ni khuu muno, yegalwa na khusi khai na kuhitulwa na usukani mdodo muno, hohose nahoza akundaho kuita. 5 Viyaviya ulimi ni kimamo kidodo muno mwe mwii, ata ivyo kwa sia yakwe wantu wagombeka ya kwevunia makuu.

Mamakhanya kuwa, ata moto mcheche wadaha kudagamiza mzitu mkuu muno. 6 Viyaviya ulimi ni inga moto, unu umema mavigaviga mbaimbai. Ulimi ni kimamo kimwe mwe vimamo vyetu vya mwii, akini watenda mntu agosoe mavigaviga mwe mbui zose amamakhanyazo na kugosoa. Naho ulimi ni inga moto wokao mntu na kumdagamiza mwe ugima wakwe wose kwa moto wesao kukomeka. 7 Wantu wadaha kufuga mbai zose za wanyama na wadege na wadudu wabuutikao na samaki. 8 Akini khahana mntu adahae kuufuga ulimi wakwe. Ni ufyaimi wesaokutwiiiya na umema sumu iyetayo ufe. 9 Tatumia ulimi kwaajii ya kumtogoa Zumbe Muungu ambae ni Tati yetu, viyaviya tatumia ulimi uwouwo tawagombekea wantu wapate mafyaimi ambao Muungu kawaumba kwa msimo wakwe. 10 Mwe kanwa ichoicho zalawa mbui za kutogoa na kuwagombekea wantu wapate mafyaimi. Ndugu zangu khaikundigwa kuwa ivyo. 11 Ivi soko mwenga ya mazi yadaha kulavya mazi yemwiiye na mazi ya munyu? 12 Wandugu zangu, ivi mti wa mkuyu wadaha kuvyaa chungwa hambu mti wa mchungwa wadaha kuvyaa tunda da mkuyu? Viyaviya soko mwenga ya mazi, khaidaha kulavya mazi ya munyu na mazi yamwiiye.

13 Ni ndai mwenye umanyi na akii gatigati yenu? Naho aonyeshe mbui iyo kwa kugosoa ntendwa zedi na kuwa na uhuhusi ulawao mwe umanyi wakwe. 14 Akini mkawa na kinyuu na wenye chuki na kujikundisa yee mwenye, mwesekwevuna kwaajii ya ayo na mwesekuiemeya kwei. 15 Umanyi inga uwo khaulawa kwa Muungu, iya ni umanyi ulawao kwa wantu wa inusi, naho walawa kwa shetani mwenye. 16 Kwaviya hohose hekuaho na kinyuu na kwekundisa wee mwenye, nee hekuaho na khumbizi, na kiya ntendwa fyaimi. 17 Akini umanyi ulawao uwanga kwa Muungu, yatitenda tiwe wang'azi he meso ya Muungu, naho yatitenda tiwe na uivanisi na wantu watuhu, yatitenda tiwe wahuhusi na yatitenda tiwategeeze wantu watuhu, na yatitenda tiwe na mbazi muno, na viyaviya yatitenda tigosoe ntendwa zedi muno, na yatitenda tisekuwabauwa wantu naho khaititenda tiwe watiizi. 18 Wantu waetao uivanisi kwa wantu watuhu wawa inga wantu wahandao mbeyu ya uivanisi, kisingi chezacho wendawabonde yakundigwayo he meso ya Muungu.