1 Kumzumiia Muungu ni kuwa na haika kwamba mbui tizikauwiazo zendazigosoke, naho na kukauwiya mbui ambazo khatiziona isasa. 2 Kwa sia iyo ya kumzumiia Muungu wadaa wetu wa kae wamtamiza Muungu.

3 Kwa kuzumiia tamanya kuwa inusi igosolwa kwa Mbui ya Muungu, vintu vionekavyo vilawana na vintu vyesavyokuoneka.

4 Habili kwa kuzumiia kwakwe kamlaviya Muungu ntambiko yedi kusima ya Kaini. Na kwa kuzumiia kwakwe akazumiiwa na Muungu kuwa yedi, Muungu mwenye akazumiiya malavyo yakwe. Etiho Habili kauya na nyuma akini kuzumiia kwakwe kwaendeea kuwa msimo mtana kwetu adi ivyeo.

5 Kwa kuzumiia Muungu kumtenda Henoko adoigwe kulawa mwe inusi kwesiho kuuya na nyuma, khekuoneka vituhu kwaajii Muungu kamdoa. Kwaviya maandiko yaonyesha kuwa kisingi khazati kudoigwa, yee nekawa akimtamiza. 6 Khahana mntu yoyose amtamizae Muungu kwesiho kumzumiia Muungu. Kwaviya kia mntu ambasae Muungu akundigwa azumiie kuwa Muungu yuuko na awekha funge wada wamtongeao kwa kutendesa.

7 Kwa kuzumiia Nuhu kumtenda amtegeeze Muungu ekumhazaho uwanga ya mbui zendazo zeze ambazo yee nekawa khaziona. Aho, akagosoa Safina ili Muungu awaohoe yee hamwe na wantu wakaya yakwe na kuwaamuiiya wantu wa inusi wekuwao khawamtegeeza Muungu. Kwaajii iyo ikamtenda Nuhu azumiiwe na Muungu.

8 Kwa uzumizi Ibulahimu ekwetangwaho, aite si ida ambayo Muungu kamwekha itende yakwe, akategeeza na akahauka mwe si yakwe na kwesiho kumanya aitako. 9 Kwa kuzumiiya kwakwe Ibulahimu akekaa mwe si ekuikiwayo kiaga ni Muungu inga mgeni mwe si yesayokuwa yakwe. Akekaa mwe tweya inga wekukaisavyo Isaka na Yakobo, ambao viyaviya wakahokea yadayada yekugombekwayo Muungu. 10 Kwaviya Ibulahimu nekawa akakauwiya mzi wenye msingi utogao, ambao Muungu mwenye nee mwekuumamakhanya na kuuzenga.

11 Kwa kuzumiia ata Sala mwenye etiho nekawa mdaa na khekudaha kuwa na mwana, akini Muungu akamjaiiya na akenua ifu. 12 Kulawa kwa mntu yumwe Ibulahimu ambae nekawa inga kauya na nyuma, newalawia wantu wangi wesaokutaazika inga ntoondo za uwanga kwa Muungu na msanga wa phwani.

13 Wantu wose awa wauya na nyuma uku wakawa wamzumiia Muungu kwesiho kuhokea mbui zia ambazo Muungu kawaikia kiaga, akini kwa hae wakayaona na kuwa na nyemi na wakazumiia kuwa newawa wageni na watambaji. 14 Wantu wagombekao mbui inga izo waonyesha pwii kuwa waondeza si yao wenye. 15 Ati newawa wakamamakhanya si wekulawayo mwande, nee wapata phasi ya kugotoka uko. 16 Akini isasa wakunda si yekuwayo yedi muno yani si ya uwanga kwa Muungu nemana Muungu khekuona soni wowo wakamwetanga Muungu yao, kwaviya yee mwenye kawagoswoeya mzi wao.

17 Ibulahimu kwa kumzumiia kwakwe Muungu kukamtenda azumiie kumlavya ntambiko Isaka kisingi Muungu ekumgeezaho. Uyo Ibulahimu nee mwekuwaye kahokea viaga vya Muungu, akini ata ivyo akazumiiya kumlavya ntambiko mwanawe ya ikedu, 18 etiho Muungu nekawa kamgombeka, "Uvyao wako wendaulawane na Isaka." 19 Ibulahimu akazumiiya kuwa Muungu adaha kuwayuyusa wekuuyao na nyuma, inu ni inga viya Ibulahimu akampata vituhu Isaka kulawa mwe ufe.

20 Kwaajii ya kuzumiia Isaka akawajaiya Yakobo na Esau, wekhigwe majaiwa yendayoyeze kwa kisingi chezacho.

21 Kwa kuzumiia Yakobo ekuwaho hehi na kuuya na nyuma, kumtenda akawajaiya wana waidi wa Yusufu na kumvika Muungu uku kaegama mwe kome dakwe.

22 Kwa kuzumiia kwakwe Yusufu ekuwaho yuhehi na kuuya na nyuma kutamtenda akaitamwiiya mbui ya kulawa kwa wana wa Isilaeli uko Misili na akawekha miagiiyo ya mavuha yakwe.

23 Kwa kuzumiia kwao wavyazi wa Msa kukawatenda wamfise Msa kwa miongo mitatu bada ya kuvyaigwa kwaajii nee wamwoona ni mwana atamae, naho khawekuiogoha amli ya Seuta wa Misili.

24 Kwa kuzumiia kwakwe Msa kukamtenda ekuwaho mntu mgima akaemea kwetangwa mwana wa binti Falao, 25 akoona ni ebae kwekhigwa usuumizi hamwe na wantu wa Muungu kusima kutamiza mwe mavigaviga kwa kisingi kijihi. 26 Akoona kuwa kusuumika kwaajii ya Klistu kuna yombe khuu kusima utana wa si ya Misili, mana nee akakauwiya funge ambado Muungu endaamwekhe misi zezazo.

27 Kwa kuzumiia kwakwe Msa ukamtenda alawe mwe si ya Misili kwesiho kuogoha maya ya seuta, naho khekuuya mgeeka kwaajii nekawa inga mntu mwekumuonae yuda Muungu mwesaekuoneka. 28 Kwa kuzumiia akaigosoa Pasaka akaagiiya phome isiswe uwanga ya miimo ya vyuvi, ili yuda mndima wa uwanga kwa Muungu adagamizae asekuwakoma wavyaigwa wa bosi wa wantu wa Isilaeli.

29 Kwa kuzumiia kwao wantu wa Isilaeli wakemboka mwe mazimshindo ya Shamu inga viya wemboka mwe sanga khavu, akini kisingi Wamisili wekugeezaho kwemboka wakauya na nyuma wose.

30 Kwa kuzumiia kanto zekuzunguukazo mzi wa Yeliko zikagwa hada wantu wa Isilaeli wekubindaho kuzunguka kanto izo kwa misi mfungate. 31 Kwa kuzumiia kwakwe Lahabu mwekuwa mkianga kumtenda khekukomwa hamwe na wada wekumuemeao Muungu kwaviya kawahokea wada wekuagiiwao kuikauwa si yao kwa uivanisa.

32 Naho nigombeke mbwai muno? Kwaviya kisingi ni kicheche kuzitamwiiya mbui za Gideoni na Balaka na Samsoni na Yefuta na Daudi na Samweli na Waoni wa Muungu. 33 Kwa kuzumiia awa wose wakatoana khondo na Maseuta na wakavota wagosoa mbui zedi na wakahokea yada ekuikayo kiaga Muungu. Wakavugaa vywana vya simba, 34 wakakoma miale mikai ya moto na kunyiika kukomwa he khondo, newawa wasokea iya wakapata nguvu, viyaviya newawa watintimavu he khondo na wakawavota watoanaji wa kigeni. 35 Wavyee wekuzumiiyao nee wakavuziwa wantu wao wekuwao wauyakae na nyuma wakawa wameyuyuswa.

Akini wamwe wao wakaemea kuvuguiwa, wakasuumizwa adi kuuya na nyuma ili wapate kuyuyuswa na kwengia mwe wekaisi wedi muno. 36 Watuhu wakabewa na kutoigwa makoto na watuhu wakagewa phingu na kugewa geezani. 37 Watuhu watoigwa kwa maiwe na watuhu nee wasengwa ntii mbii kwa msumeno, watuhu wakakomwa kwa uhamba, waangadika uku wevaiya mababu ya ngoto na mababu ya mbuzi, newawa wantu wakiwa wekusuumizwao na kugosoewa mbui za ufyaimi. 38 Wantu wa mwe inusi khawekukunda kuwa na wantu wedi inga awo, kwaiyo ikawa wazunguke mwe viwawe na kwe miima na kwefisa mwephanga na mwe matubwi ya alizi.

39 Wantu ao wose wamtamiza Muungu kwaajii ya kuzumiia kwao. Akini khakuna hata yumwe mwekuhokea yada ambayo Muungu nee kawagombeka endaawekhe, 40 khawokuyapata ayo kwaajii Muungu katiikia mbui ntana muno ili swie hamwe na wowo tiyahokee yada ambayo Muungu kamba enda atekhe.