1 Naho Agane dia da bosi nediwa na mitongeo yakwe ya mviko na hantu hakwe hang'azi mwe inusi. 2 Mwe tweya nee mna chumba cha bosi ambacho ni hantu hang'azi. Umo nemuwa na kiango cha taa na meza ya mabumunda yekulavigwayo hemeso ya Muungu. 3 Na hemgongo wa pazia da kaidi nehawa na chumba cha kaidi ambacho ni hantu hang'azi muno. 4 Umo nemuwa na ingo da zahabu kwaajii ya kufukiza ubani na sanduku da Agane, ambado nee digubikwa na zahabu phande zose na mda ndani nemuwa na nyungu ya zahabu yekuwayo na khande yetangwayo Mana na ngoda ya Haluna yekuwayo ichanua mani, naziya ntii mbii za maiwe yekuwavyo yaandikwa Agane. 5 Na uwanga ya sanduku nekuna na viumbe vyenye mawawa vionyeshavyo Ukuu wa Muungu na mawawa yao yanyooshwa kugubika ngubiko ya sanduku da agane ambado viyaviya wetanga kigoda cha mbazi. Akini kisingi iki khatidaha kuyagombeka vitana ayo yose inga yeivyo.

6 Ivi nee vyeivyo vikupangwavyo vitu ivyo vyose waviki wengia kia msi mwe chumba cha bosi cha tweya na kugosoa ndima zao. 7 Akini Mviki Mkuu ikedu nee engiae mwe kia chumba cha kaidi cha tweya, maa mwenga kwa mwaka. Engia na phome ambayo endaamuavie Muungu kwaajii yakwe mwenye na kwaajii ya mavigaviga ya wantu. 8 Kulawana na mbui izo Muye wa Muungu ationyesha kuwa sia ya kwengia hantu hang'azi muno nee khayekuvugulwa kwa wantu watuhu. 9 Mbui inu ni msimo wa kisingi cha isasa koonyesha malavyo na ntambiko zekuwavyo zalavigwa kwa Muungu khazikudaha kumtenda yuda avikae asekuwa na masa. 10 Ayo yose ni kwaajii ya mazweeya ya khande na vidomea na mbui za kusunta mii, yose ayo ni miagiiyo ya chongoi na nguvu yakwe yauya na nyuma, Muungu endahoaike vitana vintu vyose.

11 Akini Klistu keza kae inga Mviki Mkuu wa mbui zedi zekwezazo yee agosoa ndima he tweya ntuhu ambado ni ntana muno hema tuhu ambado ni tana zaidi naho kamiifu kusima diya da bosi. Tweya ido khadikugosolwa ni wantu, ivyo tweya ido khio da inusi. 12 Yee kengia hang'azi maa mwenga du, akini khekwengia kwa phome ya mbuzi na njeku, iya kwa phome yakwe mwenye akatekha uohozi wa misi yose kwesiho kisikizi. 13 Wantu wekuwao najisi newadaha kuzingulwa na kuwa safi wekudodezwaho phome ya mbuzi na ya njeku na mazeu ya ndama. 14 Akini kwa phome ya Klistu, mbui khuu zagosoka! Kwa udaho wa Muye wa Muungu wa misi yose kwesiho kisiikizi, Klistu keavya yee mwenye kuwa ntambiko bola kwaajii yetu kwa Muungu, phome yakwe yendaitisunte mioyo yetu kulawana na mbui zetu zietazo kuuya na nyuma, ili tidahe kumgosoea ndima Muungu ekuwae mgima.

15 Na kwaajii inu Klistu ni mwivanisa wa Agane Dihya kwa ili wada wekwetangwao ni Muungu wadahe kuhokea kia kiaga cha upazi wa kae na kae. Kwaajii Klistu nee kauya na nyuma ili kuwaika hulu kulawa mwe mavigaviga ambazo wantu newawa wagosoa.

16 Misi yose bauwa yekuandikwayo kwaajii ya kulisi mai za mntu ekuuyaenanyuma, yagosoa ndima hada ambaho ekuandikae kauyananyuma kwei. 17 Kwaajii usia wawa na udaho kisingi mntu kauya kae na nyuma, khaudaha kugosoa ndima kisingi yuda ekuandikae yuke mgima. 18 Nee mana ata dia Agane da bosi khadikudaha kugosoka kwesiho phome. 19 Msa kavoka kuwaambazia wantu wose amli zose inga yekuwavyo mwe Miko, naho akadoa phome za njeku hamwe na phome za vuata hamwe na mazi akakihugutia kia kitabu cha Miko na kwa wantu kwa kutumia matambi ya mani yekwetangwayo hisopo hamwe na mazoya mekhundu ya ngoto. 20 Akagombeka inu nee phome yekuonyeshayo kuwa diagane idi ni dakwei na muamuiwa ni Muungu mdibase. 21 Viyaviya phome ida akaihuhutia mwe dia tweya na via vya uviko. 22 Kwakwei mwiko wakunda kuwa kia kintu kuzingulwa kwa phome na kwesaho kwetiwa phome khahana kuekewa mavigaviga.

23 Vintu ivi ni msimo du wa vintu vya kwei vya uwanga kwa Muungu nee vikundigwa kusuntwa kwa namna iyo. Akini vintu vya uwanga kwa Muungu vyakunda ntambiko yekuwayo yedi kusima izi. 24 Kwaviya Klistu khekwengia hantu hang'azi hekugosolwaho na mntu, ambaho ni msimo wa kia chekuwacho kwei. Yee nee kengia uwanga kwa Muungu henye ambaho isasa agooka hemeso ya Muungu kwaajii yetu. 25 Wala khekwengia uwanga kwa Muungu ili adahe kweavya maa kwa maa inga viya Mviki Mkuu wa Wayahudi engiavyo hantu hang'azi muno kia mwaka kwa phome ambayo khio yakwe mwenye. 26 Inga neiwa ivyo Klistu nee kakundigwa kusuumizwa maa nyingi kuvokea kugosolwa inusi. Akini isasa, visingi viwaho hehi na kiisikizi chakwe, yee kalawia kamwe du, na kuusa mavigaviga kwa kwelavya yee mwenye ntambiko. 27 Inga viya wantu wekuikiwavyo kuuya na nyuma kamwe du, na wekubindaho kuuya na nyuma ni uamuiiyo. 28 Viyaviya Klistu kaavigwa maa mwenga du na kuwa ntambiko ili ayadoe mavigaviga ya wantu watuhu nae endaeze maa ya kaidi na khio kwakudoa mavigaviga iya kuwaetea uohozi wada wamkauwiiyao kwa hovu muno.