1 Ivyo takundigwa tekauwe muno kia tekutegeezacho ili tisekweza kuyabada. 2 Kwaviya mbui ida ambayo wandima wa uwanga kwa Muungu wawekha wadaa wetu, ionyesha kuwa ni ya kwei ata mntu yoyose ambae khekuitongea hambu kuitegeeza nee wekhigwa sugusa inga yekukundigwavyo. 3 Tendatidahe vihi kuhona tikaubea uwohozi mkuu inga unu? Zumbe mwenye kavoka kuuambaza uwohozi unu, na wada wekumtegeezao nee watigombekea swie mbui inu ni yakwei. 4 Viyaviya Muungu akaonyesha uwohozi uwo kuwa ni kwei kwa kugosoa ntangio na vihii na viozo mbaimbai na kuwapangia wantu funge ya Muye inga ekukundavyo yee.

5 Muungu khekuwaika wandima wa uwanga kwa Muungu waigookee inusi yezayo yaani inusi tigombekavyo mbui zakwe. 6 Akini kuna hantu he Maandiko mntu yumwe nee kagombeka,

"Mntu ni kintu chani ata ummamakhanye, mwana wa mntu

Ni ndai ata umpatiize?

7 Kumtenda mdodo kidogo kusima wandima wa uwanga kwa Muungu kwa kisingi du,

Kumvika ntaji ya ukuu na ntunyo.

8 Khationa mntu akaongowea vintu vyose, kwakuika vintu vyose asi yakwe."

Yagombekwa kuwa, "Muungu khekubada kintu chochose ambacho khekukiika asi ya mntu." Akini isasa khationa mntu agookeae vintu vyose. 9 Iya tamuona Yesu mwekutendwa na Muungu kuwa mdodo kusima wandima wa uwanga kwa Muungu kwa kisingi kijihi, ili kwa mboto ya Muungu nee akundigwa auye na nyuma kwaajii ya wantu wose. Isasa tamuona kavikwa ntaji ya ukuu na ntunyo, kwaajii ya kusuumizwa na kuuya na nyuma kwakwe. 10 Kwaviya imkunda Muungu ambae nee kaumba vintu vyose na kuvitenda kuwa vitintimavu, amtende Yesu kuwa yedi kwembokea masuumizi ili awaete wana wangi kuwa hamwe he Ukuu wakwe. Kwajii Yesu nee awaongowea wantu mwe uwohozi.

11 Kwaviya yee awazinguae wantu mavigaviga yao, yee hamwe na wada wekuzingulwao, wose wanae Tate yumwe. Nee mana Yesu khaona soni kuwetanga awo ni wanduguze 12 Inga agombekavyo,

"Nendaniwambe wandugu zangu mbui zako,

Nendanikutunye mwe zumwezumwe dako."

13 Viyaviya agombeka, "Nendanimkauwie Muungu." Naho nee amba, "Mie niaha hamwe na wana ekunekhao Muungu."

14 Kwaviya wana awo ukunekhao wana phome na mwii, na Yesu mwenye nekawa mntu inga wowo ili kwaajii ya kuuya na nyuma kwakwe amdagamize Ibiisi mwenye udaho wa kuuya na nyuma, 15 na ivyo ili awaohoe wada wekuwao watumwa mwe wekaisi wao wose kwaajii ya kuogoha kuuya na nyuma. 16 Kwaviya ipwii kuwa yee khekweza kuwambiza wandima wa uwanga kwa Muungu, iya nee keza kuwaambiza wavyaigwa wa Ibulahimu. 17 Kwaajii iyo imkunda awe inga wanduguze kwa kia mbui, ili atende kuwa Mviki Mkuu ekuwae mzumiiwa na mwenye mbazi kwa kumgosoea ndima Muungu, ili awaekee na kuwausia wantu mavigaviga yao. 18 Kwaviya yee mwenye nee kasuumizwa ekugeezwaho, ili adahe kuwambiza wada wose wageezwao na kusuumizwa.