1 Ivyo inga teivyo na zumwezumwe kuu da wagombekao wekutizungukao tiuse kia kikindio kitikindiacho na yada mavigaviga yatitozayo kinyio, tiguuke kwa kuzizimiza mwe yada mavotano ya uguuko yekuikwayo hemeso yetu. 2 Timtongee Yesu ambae nee mwekuuvoka uzumizi wetu na ambae endaaibuze kisiikizi. Kwaajii ya nyemi ikuwayo ya mgojea yee akazizimiza ufe wa mhamba, wala khekuoona soni yakwe na isasa ekaa phande ya kuume he kigoda cha Ukuu cha Muungu.

3 Mmamakhanyani muno yee mwekustahimili uhigani mkuu kulawa kwa wantu wenye mavigaviga nanywi ili mwesekweza kufa maya na kuumzumiiya Muungu. 4 Inga mwahigana kuvotana na mavigaviga akini khamzati kutoana adi kwetiya phome. 5 Ivi mjaa mbui za kugea moyo hada Muungu ekuwetangao nywie wanawe? Yagombekayo

"Mwanayangu wesekumbea Zumbe akuhazaho

Naho wesekufa maya akakuwakia."

6 Kwaviya Zumbe amwekha sugusa kia amkundisae,

Naho amwekha sugusa kia ekuzumiae kuwa mwanawe.

7 Zizimizani sugusa kwaajii ya kwehinya na Muungu awagosoea nywie inga wanawe. Mana ni mwana yuhi mwesaekwekhigwa sugusa na tati yakwe? 8 Muungu awekha sugusa wanawe wose inga Muungu khana awekhe sugusa mmanye nywie ni wana wa chongoi wa ndoza na khio wanawe. 9 Hamwe na ayo tinao tati zetu wa kimwii, wekutekhao sugusa nao tikawategeeza, ivyo takundigwa kumtegeeza muno Tate wa Muye zetu ili tekaise. 10 Tati zetu watekha sugusa kwa kisingi kicheche inga wekuonavyo woo wenye vyafaa, akini Muungu atekha sugusa kwa yombe yetu ili tidahe kuwa wang'aa inga yee. 11 Khakuna mtu aitamiaye sugusa iya ahuzunika, akini wantu wekwehinyao kuwa na khachu ntana kwa sia ya kwekhigwa wekaisa kwa uivanisi na kugosoa mbui zimtamiiazo Muungu he meso yakwe.

12 Ivyo enueni mikono yenu yekuegeayo na kutintimaza mavindi yenu yazingizayo. 13 Endeeani kwenda mwe sia yekunyookayo ili kia chekuviacho chesekubondeka iya kihonywe.

14 Ondezani muno kuwa na myevano na wantu wose na kwekaisa kwesiho kutenda mavigaviga, kwaajii mntu yoyose esae kwekaisa ivyo khana amuone Muungu. 15 Ekauweni muno mntu yoyose asekweza kuvotwa kwa kuvotwa kuupata wedi wa Muungu. Muwe meso ili kwesekweza kuwa na yoyose endaeawe inga zindo da mti msungu na kuota nakueta masuumizo mangi kwa sumu yakwe. 16 Asekuwaaho mkiayanga wala esaekumtongea Muungu, inga Esau mwekutaga upazi wakwe wa uvyaigwa wakwe wa bosi kwaajii ya khande ya msi umwe. 17 Mana mwamanya ata ekukundaho vituhu kupata majaiwa yekuwayo yakwe, akaemewa kwaviya khekupata phasi ya kuhituka na kubada mavigaviga, etiho kaiyondeza kwa mesozi.

18 Nywie khamkubua he muima sinai udahao kutozeka inga wekugosoavyo wana Isilaeli, khamkubua mwe moto wakao he kiza na tufani, 19 na mgutio wa gunda na mgutio wa mbui, ambao wada wekuutegeezao wakaheembeeza wasekwembigwa mbui ntuhu, 20 kwaviya khawekudaha kuzizimiza amli yekuagiiwayo, "Endayeadonte muima unu hata inga ni mnyama endaatoigwe maiwe adi auye na nyuma." 21 Ayo yose yaoneka ni yakutisa muno hata Msa akagombeka, "Naogoha muno na kuzingiza."

22 Akini nywie mbua mwe Muima Sayuni, Mwe mzi wa Muungu ekuwae mgima mbua Yelusalemu ya uwanga kwa Muungu, ambako wawahamwe wandima wa uwanga kwa Muungu magana kwa magana wesaokudahika kutaaziwa wenao nyemi. 23 Mbua he zumwezumwe kuu da wavyaigwa wa bosi wa Muungu, ambao mazina yao yaandikwa uwanga kwa Muungu. Mwagooka hemeso ya Muungu ekuwae muamua wa wose na hemeso ya muye za wantu wedi ambao Muungu kawatenda awazumiiye he meso yakwe. 24 Mbua kwa Yesu ambae ni muivanisi wa wantu na Muungu mwe diagane dihya na phome yakwe yekuhutiwayo igombekayo mbui zedi kusima phome ya Habili.

25 Naho ekauweni mwesekweza kuemea kumtegeeza yee agombekae nanywi. Inga wada wekuemeeao kumtegeeza yuda mwekuwahaza hanu mwe inusi khawekuoholwa, swie tadaha viivihi kuoholwa iga tikaemea kumtegeeza yuda atihazae kulawa uwanga kwa Muungu? 26 Ambae mgutio wakwe uizingiza inusi kwa kisingi kia, akini isasa kaika kiaga akagombeka. Nendanizingise inusi vituhu akini khio inusi ikedu viyaviya ni hamwe na uwanga kwa Muungu. 27 Mbui iyo ambayo yagombeka "Vituhu" Yaonyesha pwii vintu vyose ekuumbavyo Muungu hanu mwe inusi vyenda vizingize na kuusigwa, ili visigae vintu via ambavyo khavidaha kuzingiza.

28 Kwaviya tahokea Useuta uda ambao khaudaha kuzingizwa na tiwe na ntogoo, ivyo timvike Muungu kwa viya vimtamwizavyo kwa kweonyesha kumtunya muno. 29 Kwaviya Muungu yetu ni inga moto mkai udagamizao.