ဗျာဒိတ်တော် 11

သတ်သေခံ နှေ့ယော့-က်

1 အယ်ဘီးန တောန်အူးန တူဟှူတိုင်းဇာ ကျူးရိုးတရှောန်းဟှို ငါ့ဟှို ပေးဘီးဟှာ "ထဘီး ဘုရားသခင်ရဲ့ ဗိမာန်တော်န ယဇ်ပလ္လင်ဟှို တိုင်းဘီးဟှာ အယ်နေရာမာ ဝတ်ပြုကိုးကွယ်နေဟှူ သူလေဟှို ရေလိုက်ပါ။ 2 ✝၁၁.၂ လု ၂၁.၂၄အယ်ဘေမဲ့ ဗိမာန်တော်ရဲ့ ခြံဝမ်း ပ္လန်ဖတ်မာရှိဟှူ တံဒိုင်းဟှာ လူမျိုးခြားလေဟှို ပေးဟှားဟှူကြောန့် တိုင်းဘဲန ချန်ဟှားလိုက်။ အယ်သူလေဟှာ သန့်ရှင်းဟှူ ဗြို့ဟှို လေးဆယ်နှေ့လ လောင်းလောင်း ခေန နန်းဂေ့လေ့မယ်။ 3 အယ်ခီမာ ငါဟှာ ငါ့ရဲ့ သတ်သေခံနှေ့ပါးဟှို လွှတ်မယ်။ သူးနို့ဟှာ ဝတ်ကြမ်းဟှို ဝတ်ဘီးဟှာ ရစ်ပေါန်း ၁,၂၆၀ လောင်းလောင်း ပရောဖက်ပြုဘီးဟှာ ဟောပြောဂေ့လေ့မယ်" ဆိုဘီး ပြောဟှယ်။

4 အယ်လူလေဟှာ မ္လေဂီးရဲ့ သခင်ရှေ့မာ ရှိဟှူ သံလွင်ပန်နှေ့ပန်န ဆီမီးခွပ် နှေ့လောင်းဖြစ်ဂေ့ဟှယ်။ 5 တယော့-က်ယော့-က်ဟှာ သူးနို့ဟှို ညှဉ်းဆဲပေးဟှို့ လောက်ဟှယ် ဆိုဟှာ သူးနို့ရဲ့ ဇပ်ပေါ့-က်ထဲဟှ မီးထွတ်လာဘီးဟှာ သူးနို့ရဲ့ ရန်သူလေဟှို လောန်စေဟှယ်။ တယော့-က်ယော့-က်ဟှ သူးနို့ဟှို ညှဉ်းဆဲဟှယ် ဆိုဟှာ သေသတ်ဇာဟှို ခံရမယ်။ 6 သူးနို့ ပရောဖက်ပြုဘီး ဟောပြောဟှူ နေ့ရစ်လေမာ မိုးဝါဘဲဟှို့တွပ် ကောန်းဂန်ဟှို ပိဟှားနိုင်ဟှူ ခွမ့်ရှိဘီး ရေဟှို သွီးမျိုး ဖြစ်ဟှို့တွပ် ပ္လောန်းလဲနိုင်ဟှို့ ခွမ့်ရဘီး သူးနို့လိုရှင်ဟှူ ခီတိုင်း မ္လေဂီးဟှို ဘေးဒန်ဘောန်းဇောင်န ဒန်ခတ်နိုင်ဟှူ ခွမ့်လေရှိဂေ့ဟှယ်။

7 ✝ ၁၁.၇ ဗျာ ၁၃.၅–၇; ၁၇.၈ သူးနို့လေဟှာ သတ်သေခံဘီးန နတ်ဆောင်းတွမ်းထဲဟှ တတ်လာဟှူ သားရဲလိဆန်ဟှာ သူးနို့န စစ်တိုက်ဟှူကြောန့် အောန်မြင်ဘီး သူးနို့ဟှို သတ်လေ့မယ်။ 8 သူးနို့ရဲ့ လောန်းလေဟှာ ဗြို့ဂီးလေရဲ့ လမ်းမထတ်မာ ကျန်ရစ်ဂေ့လေ့မယ်။ အယ်ဗြို့ဟာ သူးနို့ရဲ့ သခင်ဟှို လက်ဝါးကပ်တိုင်ထတ်မာ တန်ဘီးသတ်ခံရဟှူဗြို့ ဖြစ်ဟှယ်။ အယ်ဗြို့ဟှာ သောဒုံန အဲဂုတ္တုပြည်ဟှို ပေါန်ဆောန်ဟှားဟှူ ဗြို့ဖြစ်ဟှယ်။ 9 အယ်ခီမာ လူမျိုးနွယ်စုလေ၊ ဘာသာစကား ဘောန်းဇောင်ပြောဟှူ လူမျိုးလေန၊ တိုင်းနိုင်ငံ ဂူလောင်းဟှ လူလေဟှာ သူးနို့ရဲ့ လောန်းဟှို သောင်းရစ်ခွဲ လောင်းလောင်း ကေ့ဂေ့ဘီးဟှာ အယ်လောန်းလေဟှို သန်းခ္လိုင်းမာ သင်္ဂြိုဟ်ခွမ့် ပေးဘဲန နေဂေ့လေ့မယ်။ 10 မ္လေဂီးထတ်မာ နေဂေ့ဟှူ သူလေဟှာ အယ်လူလေရဲ့ ဖျစ်ပျစ်ကြောန့် ဝန်းသာဂေ့ဘီး၊ ပျော်ဂေ့ဘီးဟှား ယော့-က်နယော့-က် လတ်ဆောန်လေဟှို ပို့ပေးဂေ့လေ့မယ်။ ဖြားဖြစ်ကြောန့်နူးဆိုဟှာ အယ်ပရောဖက် နှေ့ယော့-က်ဟှာ မ္လေဂီးထတ်မာ နေဂေ့ဒူးဟှ သူးနို့လေဟှို ညှဉ်းဆဲဟှားကြောန့် ဖြစ်ဟှယ်။ 11 အယ်ဘီးန သောင်းရစ်ခွဲ ကြာဟှားဟှူ ခီမာ ဘုရားသခင်နားဟှ သတ်ဝိညာဉ်ဟှာ အယ်သူလေထဲဟှို ဝမ်ဟှားဘီး သူးနို့ဟှာ ထဘီးဟှာ မတ်တတ်ရပ်ဂေ့ဟှယ်။ အယ်လူလေဟှို ဗြင်ရဟှူ သူလေဟှာ ရရာတိုင်း ကြော့-က်ဂေ့ဟှယ်။ 12 အယ်ခီမာ ကောန်းဂန်ဟှ ရရာတိုင်း ကီးဟှူ သံဟှာ "အယ်နေရာဟှို တတ်လာဂေ့ပါ" ဆိုဘီး အယ်လူ နှေ့ယော့-က်ဟှို ပြောဇာဟှူ ကြားဟှူ ခီမာ သူးနို့ဟှာ မိုးတီန ကောန်းဂန်ဘောင်ဟှို တတ်ဟှားဂေ့ဟှယ်။ သူးနို့ရဲ့ ရန်သူလေဟှာ သူးနို့ဟှို ကေ့နေဂေ့ဟှယ်။ 13 ✝၁၁.၁၃ ဗျာ ၆.၁၂; ၁၆.၁၈အယ်ခီနာရီမာဘဲ ရရာတိုင်း ကြမ်းဟှူ မ္လေဂီးလှောက်ဟှူ ခီမာ ဗြို့ဆယ်ပေါင် တပေါင်ဟှာ ပြိုက္လဟှားဟှယ်။ အယ်မျိုး မ္လေဂီလှောက်ရှင်းကြောန့် လူ ၇,၀၀၀ သေဂေ့ဟှယ်။ ကျန်ရစ်ဟှူ သူလေဟှာ ရရာတိုင်း ကြော့-က်ဘီး ကောန်းဂန်ဘောင်ဟှ ဘုရားသခင်ရဲ့ နာမတော်န ဂေါင်တော်ဟှို ချီးမွမ်းဂေ့ဟှယ်။

14 ဒုတိယ အမင်္ဂလာ လွန်ဟှားဘီ။ တတိယ အမင်္ဂလာ ဗြန်းဗြန်ဟှား ရော့-က်လာလေ့မယ်။

သတ္တမ တံပိုးမှုဟှူကြောန်း

15 သတ္တမ ကောန်းဂန်တမန်ဟှာ တံပိုးမှုလိုက်ဟှူ ခီမာ ကောန်းဂန်ဘောင်မာ ရရာတိုင်း က္လယ်ဟှူ သံဟှာ ပေါ်လာဘီး၊

"ကမ္ဘာလောကဟှာ နို့လေရဲ့

ဘုရားသခင်န ခရစ်တော် ပိုင်ဟှူဇာ ဖြစ်ဟှားဘီ။

ကိုယ်တော်ဟှလည်း ကမ္ဘာဆစ်ဆစ် အောက်ချောက်လေ့မယ်" ဆိုဘီး ပြောဟှယ်။

16 အယ်ခီမာ ဘုရားသခင်ရှေ့မာ ပလ္လင်ထတ်မာ ထိုင်နေဂေ့ဟှူ သတ်ကီးဟှူသူ ၂၄ ပါးဟှာ ဘုရားသခင်ဟှို ပျပ်ဝပ်ကိုးကွယ်ဘီး၊

17 "ခုရှိဘီး ရင်းရင်ဒူးဟှလည်းရှိဟှူ အနန္တတဂိုးရှင် ဘုရားသခင်!

ကိုယ်တော်ဟှာ မဟာတဂိုးတော်ဟှို သောင်းပြုဘီးဟှာ

လောကဟှို အောက်စိုးဟှူကြောန့် ကျေးဇူးတော်ဟှို ချီးမွမ်းပါဟှယ်။

18 ကိုယ်တော်ရဲ့ မျစ်ဒေါသ ရော့-က်လာဟှူ ကာလရော၊

သေဟှားဟှူ သူလေဟှို တရားစီရင်ဟှူ ကာလရော၊

ခုခီမာ က္လရော့-က်လာဘီ ဖြစ်ဟှူကြောန့် လူမျိုးခြား ဂူလောင်းဟှာ မျစ်ဒေါသထွပ် ဂေ့ဟှယ်။

ကိုယ်တော်ရဲ့ စေခံ ပရောဖက်လေ၊ ကိုယ်တော်ရဲ့ သန့်ရှင်းဟှူ သူလေ၊

ကိုယ်တော်ရဲ့ နာမတော်ဟှို ကြော့-က်ဘီး ရိုသေဟှူသူ ကီးလေ ငယ်လေဟှာ ဆုလာဘ်ဟှို ယူဟှို့တွပ်

ခီကာလရော၊ မ္လေဂီးဟှို ဖျစ်စီးဟှူ သူလေဟှို

ဖျစ်ဆီးဟှို့ ခီကာလရော ရော့-က်လာဘီ"

ဆိုဘီး ဘုရားသခင်ဟှို လျှော့-က်ဟှားဂေ့ဟှယ်။

19 ✝ ၁၁.၁၉ က ဗျာ ၈.၅; ၁၆.၁၈; ခ ဗျာ ၁၆.၂၁ အယ်ဘီးန ကောန်းဂန်ဘောင်မာ ရှိဟှူ ဘုရားသခင်ရဲ့ ဗိမာန်တော်ဟှာ ပွမ့်ဟှားဘီး ဗိမာန်တော်ထဲမာ ကိုယ်တော်ရဲ့ ပဋိညာဉ် သစ်တာဟှို ဗြင်ရဟှယ်။ လန့်စစ်ဖ္လတ်ဇာ၊ သံဗြယ်ဇာ၊ မိုးချောင်းဇာ၊ မ္လေဂီးလှောက်ဇာန ရရာတိုင်း ကီးဟှူ မီုးသီးက္လဇာလေ ဖြစ်လေဟှယ်။