ဗျာဒိတ်တော် 18

ဗာဗုလုန်ဗြို့ ပြိုက္လဟှူကြောန်း

1 အယ်ဘီးန ရရာတိုင်း ကီးဟှူ ခွမ့်အာဏာန ကောန်းဂန်ဟှ ဆင်းလာဟှူ တခြား ကောန်းဂန်တမန်တပါးဟှို ငါဗြင်ရဟှယ်။ မ္လေဂီးဟှာ သူ့ရဲ့ ဖောင်းသရေတော်ကြောန့် လန်းဘီးတော့-က်ပလေဟှယ်။ 2 ✝၁၈.၂ ဗျာ ၁၄.၈သူဟှာ ရရာတိုင်း က္လယ်ဟှူသံန ကြွေးကြော်ဘီး "ဗာဗုလုန်ဗြို့ဂီးဟှာ ပြိုက္လဟှားဘီ! ပြိုက္လဟှားဘီး! အယ်ဗြို့ဟှာ နတ်ဆိုးနေဟှူ နေရာ၊ ညစ်ညူးဟှူနတ်လေ နေဟှူနေရာ၊ ညစ်ညူးဟှူ ငှတ်ဘောန်းဇောင် မှီခိုဟှူနေရာန ညစ်ညူးဘီး ရွံဇာကောန်းဟှူ လိဆန်လေဂူလောင်း မှီခိုဟှူနေရာ ဖြစ်ဟှားဘီ။ 3 ဖြားဖြစ်ကြောန့်နူးဆိုဟှာ လူမျိုးဂူလောင်းဟှာ သူ့ရဲ့ တရားဘဲဟှူ မေထုန်နဆိုင်ဟှူ ဒေါသ စဗျစ်ဝိုင်ဟှို သော့-က်ဂေ့ဘီး မ္လေးဂီးရဲ့ မန်းဂီးလေဟှာ သူ့နတူးဒူ တရားဘဲဟှူ မေထုန်လောက်ဂေ့ဘီး ကမ္ဘာ့ကူသယ်လေဟှာ သူ့ရဲ့ လွန်ကျူးဟှူ ဇိမ်ခံရှင်း ရှီဝါကြောန့် ကြွယ်ဝလာဂေ့ဟှယ်" ဆိုဘီး ပြောဟှယ်။

4 အယ်ဘီးန ကောန်းဂန်ဘောင်ဟှ တခြားသံတခုဟှို ငါကြားရဟှယ်။ အယ်သံဟှ

"ထွပ်လာဂေ့။ ငါ့ရဲ့ လူစုလေ၊ သူ့နားဟှနေ ထွပ်လာဂေ့ပါ။

သူ့ရဲ့ ပြစ်လေထဲဟှို ဆစ်ဆံဘီး ပါဝမ်ဂေ့န။

သူ့နတူးဒူ ပြစ်ဒန်ဟှို ခံဂေ့န။

5 ဖြားဖြစ်ကြောန့်နူးဆိုဟှာ သူ့ရဲ့ ပြစ်လေဟှာ ကောန်းဂန်ဘောင်ထိ ရော့-က်ဘီး

သူ့ရဲ့ တရားဘဲဟှူမှုလေဟှာ ဘုရားသခင်ဟှို ဒိရစေဟှူကြောန့် ဖြစ်ဟှယ်။

6 သူပေးဟှားတိုင်း သူ့ဟှို ပ္လန်ပေးဂေ့ပါ။

သူလောက်ဟှားဇာလေဟှို နှေ့ဆတိုးဘီး ပ္လန်ပေးဂေ့ပါ။

သူရောစပ်ဟှားဟှူ ခွပ်မာ

သူ့တွပ်နှေ့ဆ ရောစပ်ပေးဂေ့ပါ။

7 သူဟှာ ကိုယ့်ကိုယ်ကိုယ် ချီးမြှော့-က်ဘီး စည်းဇိမ်ခံစားဟှားမျှ

သူ့ဟှို ညှဉ်းဆဲရှင်းန ဝန်းနဲကြေကွဲရှင်းလေဟှို ပေးဂေ့ပါ။

ဖြားဖြစ်ကြောန့်နူးဆိုဟှာ ငါဟှာ မိဖုရားဖြစ်ဟှယ်။ မောက်ဆိုးမ မှုဟှ။

ငါဟှာ ဝန်းနဲကြေကွဲရှင်းလေဟှို ဖယ်ခါလည်း တွိကြောင်ရဟှို့ မှုဟှ ဆိုဘီး

သူ့စိထဲမာ ပြောဟှူကြောန့်ဖြစ်ဟှယ်။

8 အယ်ကြောန်းကြောန့် ရောဂါဘေး၊ ဝန်းနဲကြေကွဲဟှူဘေး၊

စာရေဇာ ရရာတိုင်း ခေါန်းပါးဟှူဘေးလေဟှာ

သူ့ရဲ့ထတ်မာ တရစ်ဒဲ ရော့-က်လာလေ့မယ်။

သူဟှာ မီးရှို့ရှင်းဟှိုလည်း ခံရလေ့မယ်။

ဖြားဖြစ်ကြောန့်နူးဆိုဟှာ သူ့ဟှို

တရားစီရင်ဟှူ ဘုရားသခင်ဟှာ

တဂိုးကီးဟှူကြောန့် ဖြစ်ဟှယ်" ဆိုဘီး ပြောဟှယ်။

9 သူ့နတူးဒူ တရားဘဲဟှူမေထုန် လောက်ဂေ့ဘီး စည်းဇိမ်ခံစားဂေ့ဟှူ မ္လေဂီးရဲ့ မန်းဂီးလေဟှာ သူ့ဟှို လောန်နေဟှူမီးခိုးဟှို ဗြင်ဂေ့ဟှူ ခီမာ သူ့တွပ် ရရာတိုင်း ငိုဂေ့ဟှယ်။ 10 အယ်လူလေဟှာ သူခံရဟှူညှဉ်းဆဲရှင်းဟှို ကြော့-က်ဂေ့ဟှူကြောန့် ဝီးဟှရပ်ဘီး "ရရာတိုင်း ကီးဟှူဗြို့၊ အားကီးဟှူ ဗာဗုလုန်ဗြို့! နန်ဟှာ ဖြစ်မှဖြစ်ရလေ! ဖြစ်မှဖြစ်ရလေ! ဖြားဖြစ်ကြောန့်နူးဆိုဟှာ နန်ခံရဟှူ တရားစီရင်ရှင်းဟှာ ရရာတိုင်း တိုဟှူ ခီတခုမာ ပြစ်ဒန်စီရင်ရှင်းဟှို ခံရလေဘီ!" ဆိုဘီး ပြောဂေ့ဟှယ်။

11 မ္လေဂီးထတ်မာရှိဟှူ ကူသယ်လေဟှလည်း သူ့ရဲ့ ကူပစ်စီးလေဟှို ဝယ်ဟှို့သူ ယော့-က်လည်း မှေ့ဘဲဟှူကြောန့် သူ့တွပ် ဝန်းနဲကြေကွဲဘီး ငိုဂေ့ဟှယ်။ 12 သူးနို့လေရဲ့ ကူပစ်စီးလေဟှာ ရွှေ၊ ငွေ၊ က္လော့-က်မြတ်ရတနာ၊ ပုလဲ၊ ပိချော၊ ခရမ်းရောန်ဝတ်ထည်၊ ပိုးထည်၊ နီဟှူထည်၊ သစ်မွှီးဘောန်းဇောင်၊ ဆင်စွယ်ပစ်စီးဘောန်းဇောင်၊ ဖိုးကီးဟှူသစ်သား၊ ကြေးသံ၊ က္လော့-က်ဖ္လူလေန လောက်ဟှားဟှူ ပစ်စီးဘောန်းဇောင်၊ 13 သစ်ကြံပိုး၊ ဟမ်းရှစ်ဟှူမွှီးကြိုင်၊ နံ့သာပေါန်း၊ ဆီမွှီး၊ လောဗန်၊ စဗျစ်ဝိုင်၊ ဆီ၊ မုညစ်၊ ဂျောင်ဆန်၊ ကွဲနွားလိဆန်၊ သိုး၊ ဗြင်း၊ ဗြင်းရထား၊ လူ့ကိုယ်ခန္ဓာန လူလေရဲ့ သတ်လေဘဲ ဖြစ်ဂေ့ဟှယ်။ 14 ကူသယ်လေဟှ "နန်းနို့ရဲ့ စိနှလောင်းတတ်မတ်ဟှူ ရရာတိုင်း ကောန်းဟှူ သစ်သီးလေလည်း ပျော့-က်ဟှားဘီ။ စည်းဇိမ် ဂေါင်သရေလေလည်း ပျော့-က်ဟှားဘီ။ အယ်ဇာလေဟှာ ဖယ်ခါလည်းရဟှို့ မှုဘီ" ဆိုဘီး ပြောဟှယ်။ 15 သူ့အားဖြင့် ကြွယ်ဝလာဂေ့ဘီး အယ်ကူပစ်စီးလေဟှို ပိုင်ဂေ့ဟှူ သူလေဟှာ သူခံရဟှူ ညှဉ်းဆဲရှင်းဟှို ကြော့-က်ဂေ့ဟှူကြောန့် ဝီးဟှရပ်ဘီးဟှာ ငိုဘီး၊ ရရာတိုင်း ဝန်းနဲဘီး 16 "ပိချော၊ ခရမ်းရောန်ထည်န နီရောန်ထည်ဟှို ဝတ်ဟှားဘီး ရွှေတန်ဆာ၊ က္လော့-က်မြတ်ရတနာန ပုလဲလေဟှို ဆင်ဟှားဟှူဗြို့ဂီး! နန်ဟှာ ဖြစ်မှဖြစ်ရလေ! ဖြစ်မှဖြစ်ရလေ! 17 ဖြားဖြစ်ကြောန့်နူးဆိုဟှာ အယ်မျှလော့-က် များဟှူစည်းဇိမ်ဟှာ တနာရီထဲမာ လောင်းဝ ဖျစ်ဆီးရှင်းဟှို ခံရဟှယ်" ဆိုဘီး ပြောလေ့မယ်။ ရေယာဉ်မှူးန ခရီးသယ်လေဂူလောင်း၊ သန်းဖောသားလေန ရေလမ်းမာ ကူသယ်လောက်နေဂေ့ဟှူ လူလေ ဂူလောင်းဟှာ ဝီးဟှရပ်ဘီး

18 သူ့ဟှို လောန်နေဟှူမီးဟှ မီးခီုးလေဟှို ဗြင်ဘီး "ဖယ်ခါဒူးဟှလည်း အယ်ဗြို့ထတ် ခမ်းနားဟှူဗြို့ ရှိဖူးဟှ!" ဆိုဘီး အော်ပြောဂေ့ဟှယ်။ 19 သူးနို့ဟှာ မ္လေမုဟှို သူးနို့ခေါန်းထတ်ဟှို ပစ်တန်ဘီး၊ ဝန်းနဲကြွေကွဲဘီး၊ ငိုဂေ့ဘီးဟှာ "သူးနို့ရဲ့ ဖိုးတန်ဟှူ ပစ်စီးလေကြောန့် ပန်လယ်ထဲမာရှိဟှူ သန်းဖောလေဟှို ပိုင်ဂေ့ဟှူသူ ရှိမျှဟှို ကြွယ်ဝစေဟှူ ရရာတိုင်း ကီးဟှူဗြို့! နန်ဟှာ တနာရီထဲမာဘဲ လောင်းဝ ဖျစ်ဆီးရှင်းဟှို ခံရဟှူကြောန့် ဖြစ်မှဖြစ်ရလေ! ဖြစ်မှဖြစ်ရလေ!" ဆိုဘီး အော်ဘီးပြောဂေ့ဟှယ်။

20 ကောန်းဂန်ဘောင်ဟှစဘီး သန့်ရှင်းဟှူသူလေ၊ တမန်တော်လေန ပရောဖက်လေ၊ အယ်ဗြို့ရဲ့ ဖြစ်ပျစ်ကြောန့် ဝန်းသာဂေ့ပါ။ ဖြားဖြစ်ကြောန့်နူးဆိုဟှာ ဘုရားသခင်ဟှာ နန်းနို့ ဖတ်မာနေဘီး အယ်ဗြို့ထတ်ဟှို ပြစ်ဒန်စီရင်ရှင်းဟှို ရော့-က်စေဟှယ် ဆိုဘီး ပြောဇာဟှို ငါကြားရဟှယ်။

21 အယ်ဘီးန ခွန်အားကီးဟှူ ကောန်းဂန်တမန်တပါးဟှာ ရရာတိုင်း ကီးဟှူ က္လိဆောင်မျိုး က္လော့-က်တောင်း တတောင်းဟှို ခီဘီးဟှာ ပန်လယ်ထဲဟှို ခ္လဘီး "ဗာဗုလုန်ဗြို့ဂီးဟှာ အယ်မျိုးဘဲ ပစ်ခ္လရှင်းဟှို ခံရဘီး လောင်းဝ တွိရဟှို့ မှုဘီ။ 22 စောန်းသမား၊ ဂီတသမား၊ ပလွေသမား၊ တံပိုးခရာမှုမားလေရဲ့ တီးမှုသံဟှို နန်းနို့ထဲမာ လောင်းဝ တွိရဟှို့ မှုဘီ။ က္လိဆောင်သံဟှိုလည်း လောင်းဝ ကြားရဟှို့ မှုဘီ။ 23 ဆီမီးရဲ့ လန်းရောန်ဟှိုလည်း နန်းနို့ထဲမာ လောင်းဝ လန်းဟှို့ မှုဘီ။ ဒို့သားန ဒို့သမီးလေရဲ့ သံဟှိုလည်း နန်းနို့ထဲမာ လောင်းဝ ကြားရဟှို့ မှုဘီ။ ဖြားဖြစ်ကြောန့်နူးဆိုဟှာ နန့်ရဲ့ ကူသယ်လေဟှာ မ္လေဂီးရဲ့ အာဏာကီးမားဟှူ သူလေ ဖြစ်ဂေ့ဟှယ်။ လူမျိုးဂူလောင်းဟှာ နန်းနို့ရဲ့ ပြုစားရှင်းန လှည့်ဇားဇာဟှို ခံရဂေ့ဟှယ်" ဆိုဘီး ပြောလေဟှယ်။

24 ပရောဖက်လေ၊ သန့်ရှင်းဟှူသူလေန မ္လေဂီးထတ်မာ သေသတ်ခံရဟှူ လူလေ ဂူလောင်းရဲ့ သွီးလေဟှိုလည်း အယ်ဗြို့မာတွိရဟှယ်။