ဗျာဒိတ်တော် 19

ဗြင်းဖ္လူစီးဟှူသူကြောန်း

11 အယ်ဘီးန ငါကေ့လိုက်ဟှူ ခီမာ ကောန်းဂန်ဟှာ ပွမ့်နေဘီး ဗြင်းဖ္လူတကောန် ရှိဟှယ်။ ဗြင်းထတ်မာ ထိုင်နေဟှူသူဟှာ သစ်စာရှိဟှူသူ၊ မှန်ကန်ဟှူသူ ဆိုဘီး ခေါ်ရှင်းဟှို ခံရဟှယ်။ သူဟှာ ဖြောန့်ဖြောန့်မတ်မတ်ဟှား တရားစီရင်ဘီး စစ်တိုက်လေဟှယ်။ 12 သူ့ရဲ့ မျစ်စိလေဟှာ မီးလျှံမျိုးဖြစ်ဘီး သူ့ရဲ့ ခေါန်းထတ်မာ သရဖူလေ ဆောန်းဟှားဟှယ်။ သူ့မာရေးဟှားဟှူ နာမတခုရှိဘီး အယ်ဇာဟှို သူကိုယ်တိုင်ဘဲ့သိဘီး ဖယ်သူလည်းသိဟှ။ 13 သူဟှာ သွီးန နှစ်ဟှားဟှူဝတ်ဟှို ဝတ်ဟှားဘီး သူ့ရဲ့နာမယ်ဟှာ ဘုရားသခင်ရဲ့ စကားတော် ဆိုဘီး ခေါ်ဟှယ်။ 14 ကောန်းဂန် ဗိုလ်ခေလေဟှာ စင်ကြယ်ဟှူ ပိချောထည်ဟှို ဝတ်ဟှားဂေ့ဘီး ဗြင်းဖ္လူဟှို စီးဘီးဟှာ သူ့နော့-က်ဟှို လိုက်ဂေ့ဟှယ်။ 15 ✝၁၉.၁၅ ဗျာ ၁၄.၂၀လူမျိုးဘောန်းဇောင်ဟှို နှိမ်နင်းဟှို့တွပ် ထတ်ဟှူ သန်လျက်ဟှာ သူ့ရဲ့ ဇပ်ပေါ့-က်ထဲဟှ ထွပ်နေဟှယ်။ သူဟှာ အယ်သူလေဟှို သံလှံတံန အောက်စိုးလေ့မယ်။ သူဟှာ အနန္တတဂိုးန ပ္လဲ့ဇောင်ဟှူ ဘုရားသခင်ရဲ့ မျစ်တော်န ဆိုင်ဘီး ပြင်းထန်ဟှူ စဗျစ်ဝိုင်န စဗျစ်သီးနယ်ဟှူ တွမ်းဟှို တတ်နန်းလေ့မယ်။ 16 သူ့ရဲ့ဝတ်န ပေါန်မာ မန်းဂီးလေရဲ့ မန်းဂီး၊ သခင်လေရဲ့ သခင် ဆိုဘီး ရေဟှားဟှူ ဘွဲ့နာမရှိဟှယ်။

17 အယ်ဘီးန နေထဲမာရပ်နေဟှူ ကောန်းဂန်တမန် တပါးဟှို ငါဗြင်ရဟှယ်။ သူဟှာ ကောန်းဂန်လယ်မာ ပ္လံနေဟှူ ငှတ်ဂူလောင်းဟှို "ဘုရားသခင်ရဲ့ ညဉ့်ဇာစားဗွဲဟှို လာဘီးစုဂေ့ပါ။ 18 မန်းဂီးလေရဲ့ သား၊ တပ်မှူးလေရဲ့ သား၊ စစ်သားလေရဲ့ သား၊ ဗြင်းန ဗြင်းစီးဟှူ သူလေရဲ့ သား၊ လူလွတ်န ကျွန်လေဟှစဘီး လူဂီးလူငယ်ရှိမျှလေရဲ့ သားဟှို လာဘီးစားဂေ့ပါ" ဆိုဘီး ရရာတိုင်းက္လယ်ဟှူသံန ကြွေးကြော်ဂေ့ဟှယ်။

19 အယ်ခီမာ သားရဲတကောန်ဟှစဘီး မ္လေဂီးရဲ့ မန်းဂီးလေန သူးနို့ရဲ့ ဗိုလ်ခေလေဟှာ ဗြင်းစီးဟှူသူန သူ့ရဲ့ ဗိုလ်ခေလေဟှို စစ်တိုက်ဟှို့တွပ် စုနေဇာဟှို ငါဗြင်ရဟှယ်။ 20 ✝၁၉.၂၀ ဗျာ ၁၃.၁–၁၈သားရဲန ပရောဖက် တုယောန်လေဟှာ ဖမ်းခံရဟှယ်။ အယ်ပရောဖက် တုယောန်ဟှာ သားရဲရဲ့ရှေ့မာ နိမိတ်လတ်ခဏာလေဟှို လောက်ဘီး၊ အယ်နိမိတ်လတ်ခဏာအားဖြင့် သားရဲရဲ့ဇိဟှို ယူဘီး သူ့ရဲ့ရောက်ထုဟှို ကိုးကွယ်ဟှူ သူလေဟှို လှည့်ဇားဟှူ သူဖြစ်ဟှယ်။ သတ်ရှင်ဘီးရှိနေဟှူ အယ်သူ နှေ့ယော့-က်လောင်းဟှာ ကန့်နရောဘီး လောန်နေဟှူ မီးအိုင်ထဲဟှို ရှင်လတ်လတ် ပစ်ခ္လရှင်းဟှိူ ခံရဂေ့ဟှယ်။ 21 ကျန်ရစ်ဟှူ သူလေဟှ ဗြင်းစီးဟှူသူရဲ့ ဇပ်ပေါ့-က်ထဲဟှထွပ်ဟှူ သန်လျက်န သတ်ပစ်ရှင်းဟှို ခံရဘီး ငှတ်ဂူလောင်းဟှာ သူးနို့လေရဲ့ သားဟှို ဗိုက်ဝအောန် စားရဂေ့ဟှယ်။